ចិន​ពិន័យ​ពន្ធ ៤៦ លាន​ដុល្លារ​លើ​កំពូល​តារា​សម្តែង​ស្រី​ម្នាក់​និង​ប្រាប់​ផលិតករ​ឈប់​ជួល​នាង​មក​ថតកុន​ទៀត ខណៈ​ក្រុម​មន្ត្រី​បង្កើន​យុទ្ធនាការ​ប្រឆាំង​តារា​ល្បីៗ​

0
253

តារា​សម្តែង​ទូរទស្សន៍​ចិន​លំដាប់​កំពូល​ម្នាក់​ត្រូវបាន​អាជ្ញាធរ​ទីក្រុង​ប៉េកាំង​ពិន័យ​ប្រាក់​ពន្ធ ៤៦​លាន​ដុល្លារ​ហើយ​បញ្ជា​ឱ្យ​ផលិតករ​ទាំងអស់​កុំ​ជួល​​នាង​ថតកុន​ទៀត​។​

​រដ្ឋាភិបាល​ក្រុង​ប៉េកាំង​កំពុង​បំពេញ​បេសកកម្ម​ដើម្បី​ទប់ទល់​នឹង​អ្វី​ដែល​ខ្លួន​ហៅ​ថា “​វប្បធម៌​អ្នកគាំទ្រ​ដ៏​វឹកវរ​” និង​ភាព​ហួសហេតុ​របស់​តារា​ល្បីៗ​បន្ទាប់ពី​មាន​រឿងអាស្រូវ​ជាច្រើន​នៅ​ប៉ុន្មាន​​ខែ​ចុងក្រោយ​នេះ​ដែល​បាន​បំផ្លាញ​តារា​សម្តែង​ល្បី​បំផុត​របស់​ចិន​រួម​ទាំង​តារាចម្រៀង គ្រីស វូ ដែល​ត្រូវបាន​ចាប់ខ្លួន​ពី​បទ​សង្ស័យ​រំលោភ​សេពសន្ថវៈ​កាលពីដើម​ខែ​នេះ​។​

​អាជ្ញាធរ​ពន្ធ​សៀង​ហៃ​កាលពី​ថ្ងៃ​សុក្រ​ទី​២៧​សីហា​បាន​ពិន័យ​នាង ចេង សួង ចំនួន ២៩៩ លាន​យ័ន (៤៦ លាន​ដុល្លារ​អាម៉េរិក​) ពី​បទ​គេចពន្ធ​និង​ប្រកាស​ប្រាក់ចំណូល​មិន​ពិត​នៅ​ចន្លោះ​ឆ្នាំ ២០១៩ និង ២០២០ ខណៈ​កំពុង​ថត​រឿង​ភាគ​ទូរទស្សន៍​។​

​នាង​ចេង​អាយុ ៣០ ឆ្នាំ​បាន​ក្លាយជា​ឈ្មោះ​ល្បីល្បាញ​នៅក្នុង​ប្រទេស​ចិន​បន្ទាប់ពី​បាន​សម្តែង​ក្នុង​រឿង​ភាគ​តៃវ៉ាន់​ថត​ឡើងវិញ Meteor Shower កាលពី​ឆ្នាំ ២០០៩​ព្រម​ទាំង​រឿង​ភាគ​និង​​ខ្សែភាពយន្ត​ជោគជ័យ​ជាច្រើន​ទៀត​។​

​និយតករ​ការផ្សាយរ​បស់​រដ្ឋ​ចិន​ក៏​បាន​ដក​រឿង​ភាគ​របស់​នាង​ចេង​ចេញពី​ទូរទស្សន៍​ផងដែរ និង​បញ្ជា​ឱ្យ​ផលិតករ​កុំ​ជួល​នាង​ថត​រឿង​នាពេល​អនាគត​។​

​រដ្ឋបាល​វិទ្យុ​ភាពយន្ត​និង​ទូរទស្សន៍​បាន​បន្ថែមថា ខ្លួន​មិន​អត់ឱន​ចំពោះ​ការ​គេចពន្ធ ការបង់ប្រាក់​ឈ្នួល​ថត​ខ្ពស់កប់ពពក និង​”​កិច្ចសន្យា​យិន​យ៉ាង​”​ដែល​សំដៅលើ​កិច្ចសន្យា​ពីរ​ផ្សេង​គ្នា​មួយ​​ចុះ​តំលៃ​ខ្លួន​ពិត មួយទៀត​ក្លែងក្លាយ​ដើម្បី​បង់ពន្ធ​ទាប​។​

​ទន្ទឹមនឹងនេះ ពាក្យ​យោង​ណាមួយ​របស់​តារាភាពយន្ត ចា​វ វៃ (​ត្រចៀកាំ​) ត្រូវបាន​លុប​ចេញ​ពី​វេបសាយ​វីដេអូ​ទាំងអស់ ខណៈ​ទីក្រុង​ប៉េកាំង​បង្កើន​យុទ្ធនាការ​ប្រឆាំង​វប្បធម៌​ប្រជាប្រិយ​។​

​ប្រព័ន្ធ​ផ្សព្វផ្សាយ​របស់​រដ្ឋ​កំពុង​បង្កើន​ការ​ជម្រុញ​យ៉ាង​ខ្លាំងក្លា​ឱ្យមាន​ការផ្លាស់ប្តូរ​វប្បធម៌​កម្សាន្តរ​បស់​ចិន​។​

​ទូរទស្សន៍ CCTV​បាន​និយាយ​កាលពី​ថ្ងៃ​អង្គារ​សប្តាហ៍​មុន​ថា “​សម្រាប់​បច្ចុប្បន្ន ការបរាជ័យ​ខាង​ក្រម​សីលធម៌​របស់​តារា​សិល្បៈ​និង​ការរំលោភច្បាប់ ការបណ្តុះ​ឱ្យ​មាន​តារា​និមិត្តរូប​ក្មេងៗ និង ក្រុម​អ្នកគាំទ្រ​ដ៏​វឹកវរ បាន​ទាក់ទាញ​ការចាប់អារម្មណ៍​យ៉ាង​ទូលំទូលាយ​នៅក្នុង​សង្គម​។ យើង​ត្រូវតែ​ស្តារ​ឡើងវិញ​ជា​ដាច់ខាត​នូវ​អក្សរសិល្ប៍​ដ៏​ស្អាតស្អំ​និង​ខ្ពង់ខ្ពស់​ឡើង​វិញ​ព្រមទាំង​បរិយាកាស​​សិល្បៈ​ដល់​សាធារណជន​”​។​

​កាលពី​ថ្ងៃ​ព្រហស្បតិ៍ ការស្វែងរក​ពាក្យ ចា​វ វៃ ដែល​គេ​ស្គាល់​ជា​ទូទៅ​ថា វី​ក​គី ចូ​វ (​ត្រចៀកាំ​) ត្រូវ​បាន​ហាមឃាត់​ពី​វេបសាយ​វីដេអូ​ធំៗ​របស់​ចិន​៕

LEAVE A REPLY

Please enter your comment!
Please enter your name here