កំពង់ស្ពឺ៖ លោកឧត្តមសេនីយ៍ទោ សម សាមួន ស្នងការនគរបាល ខេត្តកំពង់ស្ពឺ បានបញ្ជាក់ នៅព្រឹកថ្ងៃទី១២ ខែសីហា ឆ្នាំ២០២១នេះថា លោកបាន ចាត់ឱ្យលោកស្នងការរងទទួលផែន បុគ្គលិកចុះធ្វើការស្រាវជ្រាវបន្ថែម និងដក លោកវរសេនីយ៍ត្រី អ៊ុ ចំរើន អធិការនគរបាលស្រុកបសេដ្ឋ មកបញ្ឈរជើងក្រោយ មានពាក្យបណ្តឹងរបស់ក្រុមមន្ត្រីថ្នាក់ក្រោម ដែលមានអធិការរង ប្រធានផ្នែក នាយរងផ្នែក និងនាយនគរបាលប៉ុស្តិ៍។
មន្ត្រីនគរបាលជាច្រើននាក់នៅស្រុកបសេដ្ឋ ខេត្តកំពង់ស្ពឺ រាប់តាំងពីអធិការរង ប្រធានផ្នែក នាយរងផ្នែក និងនាយនគរបាលតាមបណ្តាញប៉ុស្តិ៍ បានរួមគ្នាប្តឹងទៅ កាន់សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ, នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកឧត្តម សេនីយ៍ទោ សម សាមួន ស្នងការ នគរបាលខេត្ត សុំឲ្យផ្លាស់ប្តូរអធិការនគរបាល ស្រុកបសេដ្ឋ លោក អ៊ុ ចំរើន ចេញដោយសារមន្ត្រីនគរបាលរូបនេះ បានប្រព្រឹត្ត កំហុសជាច្រើន ដែលពួកគាត់មិនអាចទទួលយកបាន និងមិនព្រមឲ្យបន្តតំណែង ជាអធិការនគរបាលស្រុកទៀត។
នៅក្នុងពាក្យបណ្ដឹងរបស់មន្ត្រីនគរបាលស្រុកបសេដ្ឋ ទទួលបាននៅព្រឹកថ្ងៃទី១១ ខែសីហា ឆ្នាំ២០២១នេះ បានរៀបរាប់ថា លោក អ៊ុ ចំរើន បានប្រព្រឹត្តទង្វើមួយ ចំនួនរួមមាន៖ រាល់ការតែងតាំង និងផ្លាស់ប្ដូរមុខងារមន្ត្រីក្រោមឱវាទ តែងទាមទារ លាភសក្ការៈ ពោលគិតតែផលប្រយោជន៍ផ្ទាល់ខ្លួន, ចំពោះការងារកសាងអង្គភាព និងហេដ្ឋារចនាសម្ព័ន្ធផ្សេងៗវិញ គ្មានរីកចម្រើនទាល់តែសោះ, មិនឲ្យតម្លៃដល់ មន្ត្រីក្រោមឱវាទរបស់ខ្លួន ដឹកនាំខ្វះក្រមសីលធម៌ ហើយគ្មានការទទួលខុសត្រូវ, ចំពោះចរិតឫកពាមិនសមជាថ្នាក់ដឹកនាំ ឬមិនធ្វើជាគំរូដល់កូនចៅជារឿយៗបាន ជេរប្រមាថមើលងាយកូនចៅក្រោមឱវាទ តាមវិទ្យុទាក់ទង មិនស្គាល់ចាស់ស្គាល់ក្មេង និយាយអួតក្អេងក្អាងថា ខ្លួនមានតួនាទីធំ និងមានអ្នកនៅពីក្រោយខ្នងជាអ្នក ធំផងដែរ។
ជាមួយគ្នានេះ ក្រុមមន្ត្រីនគរបាលទាំងនេះ បានចោទថា លោកវរសេនីយ៍ត្រី អ៊ុ ចំរើន គ្មានភាពជាអ្នកដឹកនាំឡើយ ជាពិសេសខ្វះសាមគ្គីភាពផ្ទៃក្នុងយ៉ាងខ្លាំងជាហេតុនាំ ឲ្យសុំធ្វើការផ្លាស់ប្តូរចេញ៕/PC 
