កូវី​ដ​១៩​នៅ​ថៃ​៖ កូន​យក​ឪពុក​កើតកូ​វីដ​១៩​មក​ទម្លាក់ចោល​នៅ​វត្ត និង​កូនស្រី​ភ្ញាក់ឡើង​ដេក​នៅ​ជាមួយ​សព​ម្តាយ​កើតកូ​វីដ​

0
99

ប្តី​ប្រពន្ធ​មួយគូ​បាន​ដឹក​ឪពុក​ចំណាស់​៨០​ឆ្នាំ​ដែល​ពួកគេ​ហៅ​”​ពុកៗ​” ទៅ​ទម្លាក់ចោល​នៅ​វត្ត​មួយ​ក្នុង​ខេត្ត​នគរ រ៉ា​ជ​សី​ម៉ា និង​បាន​បើករថយន្ត​ចេញ​ទៅ​បាត់​។​​លោកតា​កំសត់​នេះ ក្រោយមក​ត្រូវ​បាន​បញ្ជាក់ថា កើតកូ​វីដ​១៩​។​

​អ្នកលេង​ហ្វេ​សប៊ុក​ម្នាក់​បាន​និយាយថា បុគ្គលិក​ពេទ្យ​ម្នាក់​បាន​បង្ហោះ​រូប​ភាពបុរស​ចំណាស់​ម្នាក់​ដេក​លើ​ផ្លូវ​ដី​ជិត​វត្ត ផាធ​ម្មា សាវ៉ាត​ឌី នៅក្នុង​ភូមិ​មួយ​។​រូបភាព​នេះ​អម​ដោយ​សារ​ថ្កោលទោស​​ចំពោះ​ការប្រព្រឹត្ត​មិន​គប្បី​របស់​កូនស្រី​ម្នាក់​លើ​ឪពុក​ចំណាស់​របស់​នាង​។​

​ចៅអធិការ​វត្ត​ខាងលើ​បាន​និយាយថា ស្ត្រី​ម្នាក់​និង​ប្តី​របស់​នាង​បាន​នាំ​បុរស​ចំណាស់​នេះ​មក​វត្ត​កាលពី​ថ្ងៃអាទិត្យ​។​ពួកគេ​ថា​បុរស​នេះ​ធ្លាប់​ស្គាល់​ចៅអធិការ​វត្ត​នេះ​កាលពី​រស់នៅក្នុង​ខេត្ត​ខុន​ឃែន​​និង​ចង់​ស្នាក់​នៅក្នុង​វត្ត​ជាមួយ​ព្រះអង្គ​។​ពួកគេ​បាន​បើករថយន្ត​ចាកចេញ​ទៅ​ទាំង​ប្រញាប់ប្រញាល់​ដោយ​ទុកតា​ចាស់​នេះ​និង​ខោអាវ​មួយ​បង្វេច​នៅ​វត្ត​។​

​បុរស​ចំណាស់​នេះ​បាន​ប្រាប់​ប្រធានភូមិ​ថា រូបគាត់​ត្រូវ​កូន​នាំមក​ពី​ខេត្ត​ឡុប បូរី និង​ទុក​គាត់​ចោល​នៅ​វត្ត​នេះ​។​

​នៅ​ព្រឹក​ថ្ងៃ​អង្គារ​នេះ​បុរស​ចំណាស់​បាន​ដើរចេញ​ពី​វត្ត​និង​ក្រោយមក​ត្រូវបាន​គេ​ប្រទះឃើញ​ដេក​ដួល​លើ​ផ្លូវ​ដី​មួយ​ទាំង​មេឃ​កំពុង​ភ្លៀង​។​បុគ្គលិក​សុខាភិបាល​មូលដ្ឋាន​បាន​នាំ​គាត់​ទៅពិនិត្យ​​និង​ឃើញ​វិជ្ជ​មានកូ​វីដ​១៩​ហើយ​ត្រូវបាន​បញ្ជូន​ទៅ​ពេទ្យ​នៅ​ឯ​ខេត្ត​ខុន​ឃែន ដោយសារ​គាត់​មាន​ស្រុកកំណើត​នៅ​ទីនោះ​។​

​ឥឡូវ លោក​សង្ឃ​នៅ​ក្នុង​វត្ត​ខាងលើ បុគ្គលិក​ពេទ្យ និង​អ្នក​ជួយ​សង្គ្រោះ​ដែល​ប៉ះពាល់​បុរស​នេះ​ត្រូវ​ធ្វើ​ចត្តា​ឡី​ស័ក​១៤​ថ្ងៃ​។​

​នៅ​ខេត្ត សាមុត ប្រា​កាន ជិត​ក្រុង​បាងកក ក្មេងស្រី​២​នាក់​បាន​ភ្ញាក់ពីដេក​កាលពី​ព្រឹក​ថ្ងៃ​ចន្ទ និង​បាន​ឃើញ​ម្តាយ​ស្លាប់​នៅលើ​កម្រាល​ឥដ្ឋ​ជិត​ពួកគេ​។​សាកសព​ម្តាយ​និង​កូនស្រី​ទាំងពីរ​​ក្រោយមក​ត្រូវបាន​ពិត្យ​ឃើញ​មានផ្ទុ​កកូ​វីដ​១៩​។​

​យោង​តាម​សារព័ត៌មាន​ថៃ ម្តាយ​នេះ​បាន​ឈឺ​ជាច្រើន​ថ្ងៃ​មកហើយ ហើយ​ប៉ូលិស​ជឿថា គាត់​ស្លាប់​ដោយ​ជំងឺ​កូវី​ដ​១៩​។​

​កូនស្រី​អាយុ​៧​និង​៩​ឆ្នាំ​បាន​និយាយថា ម្តាយ​នាង​ដែល​ជា​ស្ត្រី​ម៉ាស្សា​បានចាប់ផ្តើម​ក្អក​ចេញឈាម ឈឺ​ទ្រូង​និង​ខ្នង ក្អួត​និង​មាន​បញ្ហា​ដកដង្ហើម​។​អ្នកជិតខាង​បាន​នាំ​ទៅ​រក​គ្រូពេទ្យ​និង​បាន​​ថ្នាំ​ខ្លះ តែ​កាលពី​ព្រឹក​ថ្ងៃ​ចន្ទ ពួក​នាង​បាន​ភ្ញាក់ពីដេក​និង​ឃើញ​ម្តាយ​ដេក​ផ្កាប់មុខ​ទៅ​នឹង​ឥដ្ឋ​មិន​កំរើក​សោះ​។​

​ជុំវិញ​កូវី​ដ​១៩​នៅ​ថៃ​ដែរ សាកសព​ជនអនាថា​ស្លាប់​ដោយកូវី​ដ​១៩​នៅតែ​ត្រូវបាន​ប្រទះ​ឃើញ​តាម​ដង​វិថី​នៃ​ក្រុង​បាងកក​។​សារព័ត៌មាន​ថៃ​បាន​និយាយថា​សាកសព​បែប​នេះ​យ៉ាងតិច​៤​ត្រូវ​​បាន​ប្រទះឃើញ​តាំងពី​មុន​មក ដោយ​បុរស​មិន​ស្គាល់​អត្តសញ្ញាណ​ម្នាក់​បាន​ស្លាប់​នៅតាម​ដងផ្លូវ​នៃ​ក្រុង​បាងកក​កាលពី​ថ្ងៃ​អង្គារ​ទី​២៧​កក្កដា​។​

​សាកសព​បុរស​នេះ​ត្រូវបាន​ទុកចោល​លើផ្លូវ​រាប់​ម៉ោង​ដោយ​មិន​មាន​ពេទ្យ​ឬ​សមត្ថកិច្ច​មក​ទទួលយក​ទេ​។​

​ប្រជាជន​បង្ហាញ​ការភ័យខ្លាច​និង​ថប់​អារម្មណ៍​ដោយ​ឃើញ​រូបភាព​បែបនេះ​កាន់តែ​ញឹកញាប់​ទៅ​។​បុគ្គលិក​ជួយសង្គ្រោះ​ដែល​បាន​មកដល់​កន្លែងកើតហេតុ​បាន​និយាយថា ទាំង​បុគ្គលិក​និង​សម្ភារ​​រួម​មាន​អាវ​ការពារកូ​វីដ​ឥឡូវ​មាន​កំរិត ហើយ​បុគ្គលិក​ធ្វើការ​ទាំង​ហត់​ហេវ​អស់កម្លាំង​ខ្លាំង​គ្មាន​ពេល​ឈប់​សម្រាក​ទេ​៕

ប្រភព : រស្មីកម្ពុជា

LEAVE A REPLY

Please enter your comment!
Please enter your name here