លោកចូ បៃដិនថា អាមេរិកបោះជំហានទៅមុខជាថ្មី

0
34

នៅ​សហរដ្ឋអាមេរិក ប្រធានាធិបតី​លោក​ចូ បៃដិន​បាន​ថ្លែង​សុន្ទរកថា​លើកទី១ នៅ​ក្នុង​សភា​នា​ថ្ងៃ​ពុធ ទី២៨ មេសា។ គឺ​ជា​សុន្ទរកថា​ស្តីពី​តុល្យការ​នៃ​ការ​កាន់​អំណាច​រយៈពេល ១០០ថ្ងៃ​របស់​លោក។ នៅ​ក្នុង​សុន្ទរកថា លោក​បៃដិន​បាន​លើក​ឡើង​ដោយ​មោទនភាព​ពី​ជោគជ័យ​ដែល​រដ្ឋបាល​របស់​លោក​សម្រេច​បាន​ក្នុង​រយៈពេល ១០០ថ្ងៃ ដូច​យ៉ាង​យុទ្ធនាការ​ចាក់​វ៉ាក់សាំង​បង្ការ​កូវីដ១៩ ឬ​មួយ​ក៏​ផែនការ​ផ្តល់​សន្ទុះ​សេដ្ឋកិច្ច​ជា​ដើម។ សុន្ទរកថា​របស់​លោក​បៃដិន​ជា​សុន្ទរកថា​ស្តីពី​តុល្យការ​នៃ​ការ​កាន់​អំណាច​ប្រធានាធិបតី​រយៈពេល ១០០ថ្ងៃ​របស់​លោក។ ដោយ​មិន​និយាយ​ចំ​ឈ្មោះ​អតីត​ប្រធានាធិបតី​លោក​ដូណាល់ ត្រាំ លោក​បៃដិន​បាន​រៀបរាប់​ពី​ស្ថានការណ៍​ប្រទេស​ជួប​វិបត្តិ​ធ្ងន់ធ្ងរ ពិសេស​វិបត្តិ​សុខភាព និង​វិបត្តិ​សេដ្ឋកិច្ច​នៅ​ពេល​ដែល​លោក​ទើប​ចូល​កាន់​តំណែង​ប្រធានាធិបតី។

តែ​បន្ទាប់​ពី​បាន​កាច់​ចង្កូត​ប្រទេស​អស់​រយៈពេល ១០០ថ្ងៃ​មក លោក​បៃដិន​បាន​ថ្លែង​ដោយ​អំណួត និង​មាន​មោទនភាព​ពី​ការ​ដែល​អាមេរិក​បាន​រក​ឃើញ​ឡើង​វិញ​នូវ​កន្លែង​របស់​ខ្លួន ហើយ​អាមេរិក​នឹង​បោះជំហាន​ទៅ​មុខ​ជា​ថ្មី។ មាន​សមិទ្ធិផល​សំខាន់​ចំនួន ២ ដែល​លោក​បៃដិន​បាន​លើក​ឡើង គឺ​យុទ្ធនាការ​ចាក់​វ៉ាក់សាំង​បង្ការ​កូវីដ១៩ និង​ផែនការ​ផ្តល់សន្ទុះ​សេដ្ឋកិច្ច​ឡើង​វិញ។ ក្នុង​រយៈពេល ១០០ថ្ងៃ លោក​បៃដិន​បាន​ចាយ​លុយ​ចំនួន ៦ ០០០ ០០០ដុល្លារ​ដើម្បី​ស្តារ​ប្រទេស​ឡើង​វិញ ពិសេស​ស្តារ​សេដ្ឋកិច្ច​ពី​វិបត្តិ​កូវីដ១៩។ នៅ​ក្នុង​ខ្ទង់​ចំណាយ​នេះ​ក៏​មាន​ការ​ជួយ​ពលរដ្ឋ​ដែល​បាន​បាត់​បង់​ការងារ និង​កំពុង​ត្រូវ​ការ​ខ្លាំង​ដោយ​ឲ្យ​ម្នាក់ៗ​ចំនួន ១ ៤០០ដុល្លារ។ លោក​បៃដិន​យល់​មិន​ខុស​ទេ​ថា លុយ​នេះ​នឹង​អនុញ្ញាត​ឲ្យ​ពលរដ្ឋ​ធ្វើ​ការ​ចាយវាយ​ប្រចាំ​ថ្ងៃ ហើយ​ការ​ចាយ​វាយ​របស់​ពលរដ្ឋ​នឹង​ផ្តល់​ឲ្យ​មាន​ឡើង​វិញ​នូវ​សង្វាក់​សេដ្ឋកិច្ច​ជាតិ។ « ឥឡូវនេះ អាមេរិក​ត្រៀម​ខ្លួន​ដើម្បី​ហោះ​ឡើង​វិញ​ជាមួយ​នឹង​ការ​ព្យាករណ៍​កំណើន​សេដ្ឋកិច្ច ៦% » នេះ​ជា​ការ​គូសបញ្ជាក់​របស់​លោក​បៃដិន។ បន្ទាប់​មក លោក​បៃដិន​បាន​សន្យា​កាត់​បន្ថយ​ចំនួន​អ្នកក្រីក្រ​ឲ្យ​បាន​ពាក់កណ្តាល និង​ចង់​ឲ្យ​មាន​ប្រព័ន្ធ​សុខាភិបាល​ប្រសើរ​ចំពោះ​ក្រុម​មនុស្ស​ដែល​ងាយរង​គ្រោះ​ខ្លាំង។ អ្វី​ជា​ការ​កត់សម្គាល់ លោក​បៃដិន​បាន​តាំង​ខ្លួន​ជា​អ្នក​គិតគូរ និង​ការពារ​ពលរដ្ឋ​អាមេរិក​ថ្នាក់​មធ្យម។ នៅ​ក្នុង​ន័យ​នេះ លោក​បៃដិន​បាន​លើក​ឡើង​ពី​មហា​ផែនការ​វិនិយោគ​ក្នុង​ទឹកប្រាក់ ១ ០០០ ០០០លានដុល្លារ និង​កាត់​បន្ថយ​ការ​បង់ពន្ធ​របស់​ពលរដ្ឋ​ថ្នាក់​មធ្យម​ក្នុង​ទឹកប្រាក់​សរុប ៨០០ ០០០លានដុល្លារ។ មហាផែនការ​វិនិយោគ ពិសេស​ក្នុង​វិស័យ​អប់រំ និង​ហេដ្ឋារចនាសម្ព័ន្ធ​នឹង​បង្កើត​ការងារ​រាប់លាន​ការងារ​សម្រាប់​ពលរដ្ឋ​បាន​បាត់បង់​ការងារ និង​ពលរដ្ឋ​ដែល​ត្រូវ​បាន​សង្គម​បំភ្លេច​ចោល។

ដើម្បី​មាន​លុយ​សម្រាប់​ចំណាយ​នៅ​ក្នុង​ផែនការ​ស្តារ​សេដ្ឋកិច្ច លោក​បៃដិន​បាន​ប្រើ​នយោបាយ​យក​លុយ​ពី​អ្នក​មាន​ទៅ​ជួយ​អ្នក​ក្រ និង​អ្នក​មធ្យម។

ផែនការ​ដែល​លោក​បៃដិន​គ្រោង​អនុវត្តន៍ គឺ​លុបចោល​វិញ​នូវ​ការ​បន្ធូរ     បន្ធយ​ពន្ធ​ចំពោះ​អ្នក​មាន​ជាង​គេ​ដែល​អតីត​ប្រធានាធិបតី​លោក​ដូណាល់ ត្រាំ​បាន​អនុវត្ត និង​ដំឡើង​ពន្ធ​លើ​ប្រាក់ចំណូល​របស់​មហាសេដ្ឋី​ធំៗ។ តែ​លោក​បៃដិន​បាន​សន្យា​ថា គ្មាន​ការ​ដំឡើង​ពន្ធ​ចំពោះ​ពលរដ្ឋ​អាមេរិក​ណា​ដែល​មាន​ប្រាក់​ចំណូល​តិច​ជាង ៤០០ ០០០ដុល្លារ​ក្នុង​មួយ​ឆ្នាំ​ទេ។ ក្រៅ​ពី​នយោបាយ​ផ្ទៃក្នុង លោក​បៃដិន​មិន​ភ្លេច​និយាយ​ពី​នយោបាយ​ការបរទេស​ដោយ​ផ្តោត​សំខាន់​លើ​ទំនាក់ទំនង​ជាមួយ​ចិន និង​រុស្ស៊ី។ ជាមួយ​រុស្ស៊ី​ត្រូវ​បាន​លោក​បៃដិន​បញ្ជាក់​ថា លោក​បាន​និយាយ​ប្រាប់​ប្រធានាធិបតី​រុស្ស៊ី​លោក​ពូទីន​ត្រង់ៗ​ពី​ការ​ដែល​អាមេរិក​មិន​ស្វែង​រក​ភាព​ប្រទូស្រ្តាយ និង​ព្រមាន​ថា ទង្វើ​លូកដៃ​របស់​រុស្ស៊ី​នៅ​ក្នុង​ការ​បោះឆ្នោត      ​អាមេរិក និង​ការ​វាយប្រហារ​តាម​អ៊ីធ័រនែត​លើ​ស្ថាប័ន និង​ក្រុមហ៊ុន​អាមេ    រិក​នឹង​ទទួល​ផលវិបាក។ ជាមួយ​ចិន​វិញ លោក​បៃដិន​​បាន​និយាយ​ប្រាប់​ប្រធានាធិបតី​ចិន​លោក​ស៊ី ជីនពីង ​ពី​ការ​ដែល​អាមេរិក​មិន​ស្វែង​រក​ជម្លោះ និង​ថា អាមេរិក​ការពារ​ផលប្រយោជន៍​អាមេរិក​នៅ​លើ​គ្រប់​វិស័យ​ទាំង       ​អស់។ តាម​លោក​បៃដិន អាមេរិក​មិន​ជំទាស់​នឹង​ការ​ប្រកួតប្រជែង​ក្នុង​ផ្នែក​ពាណិជ្ជកម្ម​ទេ តែ​ប្រឆាំង​ដាច់​ខាត​នឹង​ការ​ប្រកួតប្រជែង​ដែល​មិន​ស្មើ​ភាព៕ AP

LEAVE A REPLY

Please enter your comment!
Please enter your name here