លោកស្នងការ​ខេត្តកំពត សង្គ្រោះ​សត្វ​ខ្លា​ពពក មួយ​ក្បាល ពី​កណ្តាប់ដៃ​ព្រាន ដើម្បី​លែង​ក្នុងព្រៃ​វិញ​

0
212

កំពត​: លោកស្នងការ​នគរបាល​ខេត្តកំពត និង​មានការ​ចូលរួម ពី​មន្ត្រីក្រោមឱវាទ មួយចំនួន បាន​ជួយសង្គ្រោះ​សត្វ​ខ្លា​ពពក មួយ​ក្បាល​ដោយ​ទិញ ពី​ព្រានព្រៃ ដើម្បី​លែង​ចូលក្នុង​ព្រៃ​វិញ​។​

​លោក ម៉ៅ ច័ន្ទ​មធុ​រិ​ទ្ធ ស្នងការ​នគរបាល​ខេត្តកំពត បាន​ប្រាប់​ឱ្យដឹងថា កាលពី​រសៀល ថ្ងៃទី​១៥ ខែកក្កដា ឆ្នាំ​២០២១ លោក​បាន​ទ​ទូល​ដំណឹង អំពី​ការដាក់​អន្ទាក់​របស់​ពលរដ្ឋ ថា ឃុំ​ស្ទឹង​កែវ ស្រុក​ទឹកឈូ ជាប់​សត្វ​ខ្លា​ពពក មួយ​ក្បាល​។ ជាមួយ​ព័ត៌មាន​នេះ លោក​នៅចាំ​ប្រសាសន៍​ណែនាំ របស់​រដ្ឋមន្ត្រីក្រសួង​បរិស្ថាន ទើប​លោក និង​មន្ត្រី ក្រោម​ឱវាទ មួយចំនួន សម្រេច​ទិញ​សត្វ​កម្រ​នេះ ដើម្បី​យកទៅ​លែង​ចូលក្នុង ព្រៃ​វិញ​។​

​លោកស្នងការ បានបញ្ជាក់​ថាៈ ព្រោះតែ​ស្ថានភាព​សត្វ​ខ្លា កំពុងមាន​របួស​ដោយ​សារ ខ្សែ​អន្ទាក់ ដូច្នេះ​លោក ត្រូវ​ប្រើ​ពេលវេលា ដើម្បី​ព្យាបាល​សិន​។ នៅពេល​សុខភាព បានល្អ​ប្រសើរ​ឡើងវិញ លោក​នឹង​នាំយកទៅ​លែង នៅក្នុង​ព្រៃ ទី​ដែលមាន​សុវត្ថិភាព សម្រាប់​សត្វ ដែល​កំពុង​ប្រឈម នឹង​ការ​ជិត​ផុត​ពូជ​នេះ​។​

​សូមបញ្ជាក់ថា ខ្លា​ពពក ជា​ប្រភេទ​សត្វ​ប្រឈម​នឹង​ការ​ជិត​ផុត​ពូជ នៅលើ​ពិភពលោក ដែល​ត្រូវបាន​ចុះ ក្នុង​បញ្ជី​ក្រហម អាយ​.​យូ​.​ស៊ី​.​អិន និង​បញ្ជី​ឧ​ប​សម្ពន្ធ​សាយ​តេស ដែលជា​ប្រភេទ​សត្វ ងាយ​ទទួលរង នូវ​ការគំរាមកំហែង ដោយសារ​ការ​បរបាញ់ ក៏ដូចជា ការខ្វះ​ជម្រក​ជាដើម​។​

​សត្វ​ប្រភេទ​នេះ កំពុង​ឈានទៅរក​ការបាត់បង់ ដោយ​មកដល់​បច្ចុប្បន្ន ត្រូវបាន​ផុត​ពូជ នៅ​ប្រទេស​បង់​ក្លា​ដេ​ស សឹង្ហ​បូរី និង​តៃវ៉ាន់​។ ក្នុងប្រទេស​កម្ពុជា ខ្លា​ពពក​មាន​វត្តមាន នៅ​ភូមិភាគ​ឦសាន និរតី និង​ភាគ​ខាងជើង​៕

ប្រភព : រស្មីកម្ពុជា

 

LEAVE A REPLY

Please enter your comment!
Please enter your name here