ក្រសួងសុខាភិបាល ណែនាំ​បន្ថែម អំពី​សុវត្ថិភាព ក្នុងការ​គ្រប់គ្រង និង​ការចាត់ចែង សាកសព​អ្នកជំងឺ​កូ​វីដ​-១៩

0
156

ភ្នំពេញៈ នៅ​ថ្ងៃអាទិត្យ ទី​១១ ខែកក្កដា ឆ្នាំ​២០២១ លោក ម៉ម ប៊ុនហេង រដ្ឋមន្ត្រី​ក្រសួងសុខាភិបាល និង​ជា​ប្រធាន​គណៈកម្មការ​អន្តរក្រសួង ដើម្បី​ប្រយុទ្ធ​នឹង​ជំងឺ​កូ​វីដ​-១៩ បាន​ជម្រាបជូន អភិបាល​នៃ គណៈ​អភិបាល រាជធានី​-​ខេត្ត និង​ជា​ប្រធាន​គណៈកម្មការ ប្រយុទ្ធ​នឹង​ជំងឺ​កូ​វីដ​-១៩ ថ្នាក់​រាជធានី​-​ខេត្ត ស្ដីពី​ការអប់រំ​ណែនាំ​បន្ថែម អំពី​សុវត្ថិភាព ក្នុងការ​គ្រប់គ្រង និង​ការចាត់ចែង​សាកសព ដែលមាន​ផ្ទុក​វីរុស កូ​វីដ​-១៩​។​

​យោងសេចក្តី​សម្រេច​លេខ ០៧៨ សន​ក ចុះ​ថ្ងៃទី​១៦ ខែមីនា ឆ្នាំ​២០២១​របស់ ក្រសួងសុខាភិបាល ស្ដីពី​ការដាក់ឱ្យ​អនុវត្ត គោលការណ៍​ណែនាំ ស្តីពី​វិធាន​សុវត្ថិភាព ផ្នែក​សុខាភិបាល ទាក់ទង​នឹង​ការគ្រប់គ្រង និង​ការចាត់ចែង​សាកសព​ដែលមាន​ផ្ទុក វីរុស​កូ​វីដ​-១៩ ក្រសួងសុខាភិបាល បាន​ដាក់ឱ្យអនុវត្ត​នូវ គោលការណ៍​ណែនាំ ស្តីពី​វិធាន​សុវត្ថិភាព ផ្នែក​សុខាភិបាល ទាក់ទង​នឹង​ការគ្រប់គ្រង និង​ការចាត់ចែង សាកសព ដែលមាន​ផ្ទុក​វីរុស​កូ​វីដ​-១៩ ក្នុង​គោលបំណង រក្សា​សុវត្ថិភាព សេចក្តីថ្លៃថ្នូរ បង្ការ និង​ទប់ស្កាត់ ការចម្លង​វីរុស​កូ​វីដ​-១៩ និង​កាត់បន្ថយ​ហានិភ័យ​សុខភាព សាធារណៈ​។​

​បន្ថែម​ទៅលើ គោលការណ៍​ណែនាំ​នេះ រដ្ឋមន្ត្រី​ក្រសួងសុខាភិបាល និង​ជា​ប្រធាន គណៈកម្មការ អន្តរក្រសួង ដើម្បី​ប្រយុទ្ធ​នឹង​ជំងឺ​កូ​វីដ​-១៩ បាន​ជម្រាបជូន អភិបាល​នៃ គណៈ​អភិបាល រាជធានី​-​ខេត្ត និង​ជា​ប្រធាន​គណៈកម្មការ ប្រយុទ្ធ​នឹង​ជំងឺ​កូ​វីដ​-១៩ ថ្នាក់​រាជធានី​-​ខេត្ត ឱ្យ​យកចិត្តទុកដាក់ អប់រំ​ណែនាំ​ឲ្យ អនុវត្តតាម​ខ្លឹមសារ ដូចខាងក្រោម​៖

១-​វីរុស​កូ​វីដ​-១៩ ឆ្លង​ពី​មនុស្ស​ម្នាក់ ទៅ​មនុស្ស​ម្នាក់ តាមរយៈ​តំណក់​ទឹកតូចៗ ដែល​ចេញពី​អ្នកជំងឺ​កូ​វីដ​-១៩ តាមរយៈ ការនិយាយ​ទល់មុខ​ជិតគ្នា ក្អក កណ្តាស និង​ការប៉ះពាល់​ផ្ទៃ ឬ​វត្ថុ​ផ្សេងៗ ដែលមាន​មេរោគ​។ គ្រប់​សាកសព​អ្នកជំងឺ​កូ​វីដ​-១៩ ពុំ​ត្រូវបាន​អនុញ្ញាត ឱ្យធ្វើ​កោសល្យវិច័យ ឬ​វះកាត់​ពិនិត្យ​សាកសព​ឡើយ​។ សាកសព ត្រូវបាន​រៀបចំ ដោយ​រុំ​ក្រណាត់​រួច​ដាក់ ក្នុង​ថង់​ប្លា​ស្ទិ​កបិទ​ជិត យ៉ាង​ត្រឹមត្រូវ ដោយ​បុគ្គលិក ក្នុង​មន្ទីរពេទ្យ ហើយ​សាកសព​ខ្លះ ត្រូវ​បានដាក់​បង្កក រក្សាទុក មុនពេល​ដាក់ ទៅក្នុង​មឈូស មុន​យកទៅ​បូជា ឬ​បញ្ចុះ​។ ដូច្នេះ​ឱកាស នៃ​ការចម្លង វីរុស​កូ​វីដ​-១៩ ពុំ​អាច​កើតមាន​ឡើយ ប្រសិនបើ​ពុំមាន ការរុះរើ ឬ​បើក​ថង់​រុំ សាកសព​នោះ​។​

២-​ការបូជា ឬ​បញ្ចុះ​សាកសព ដែល​អនុវត្ត តាម​គោលការណ៍​ណែនាំ​ត្រឹមត្រូវ អាច​ចៀសវាង បាន​ពី​ការ ចម្លង​វីរុស កូ​វីដ​-១៩​។ ដើម្បី​សុវត្ថិភាព អ្នករៀបចំ និង​អ្នក​ដឹកជញ្ជូន​សាកសព អ្នក​លើក​សាកសព ដាក់ចូល​ក្នុង​មឈូស និង​លើក មឈូស ដាក់​លើ​ទីតាំង​បូជា ត្រូវ​ពាក់​ឧបករណ៍​ការពារ​ខ្លួន (PPE) ឱ្យបាន​ត្រឹមត្រូវ ដូចជា​ពាក់​ម៉ាស់​ពេទ្យ អាវ​អៀម​ការពារ​ខ្លួន និង​ស្រោមដៃ​។ នៅពេល​រៀបចំ​រួចរាល់ ត្រូវ​ដោះ​ឧបករណ៍​ការពារ​ខ្លួន ដែល​ប្រើ​រួច ឱ្យបាន​ត្រឹមត្រូវ ហើយ​លាង​សម្អាត ដៃ​ជាមួយ អាល់កុល ឬ​ជែ​ល ឬ​សាប៊ូ​នឹង​ទឹកស្អាត​ភ្លាមៗ​។​

៣-​ចំពោះ​ការបញ្ចុះ​សាកសព អ្នក​សែង​មឈូស យកទៅ​បញ្ចុះ ត្រូវមាន​ចំនួន​ពី​៤ ទៅ ៦​នាក់ និង​ត្រូវ​ពាក់​សម្ភារៈ ការពារ (PPE) ត្រឹមត្រូវ​។ ចំពោះ​សមាជិកគ្រួសារ ឬ​អ្នកចូលរួម ត្រូវ​ពាក់​ម៉ាស់ ការពារ ឱ្យបាន​ត្រឹមត្រូវ និង​ត្រូវ​កំណត់​ចំនួន​មិនឱ្យ លើសពី ១០​នាក់ ព្រមទាំង​ត្រូវ​រក្សា​គម្លាត រវាង​អ្នកចូលរួម ចំងាយ ១,៥ ម៉ែត្រ ពីគ្នា និង​ចំងាយ ៣ ម៉ែត្រ ពី​សាកសព​។ លើសពីនេះ មិន​អនុញ្ញាតឱ្យ​មានការ​ហែ ក្បួន​ឡើយ​។​

​លោក ម៉ម ប៊ុនហេង បាន​រំលឹក​ឱ្យ​អភិបាល​រាជធានី ខេត្ត ធ្វើការ​អប់រំ​ណែនាំ​បន្ថែម អំពី​សុវត្ថិភាព និង​លើកទឹកចិត្ត​ដល់​មន្ត្រី បុគ្គលិក និង​អ្នក​ដែល​ធ្វើការ​ពាក់ព័ន្ធ នឹង​សាកសព និង​កិច្ច​ការបូជា ឬ​បញ្ចុះសព កុំឱ្យ​មានការ​ភ័យខ្លាច ឬ​មន្ទិលសង្ស័យ និង​សូម​ចូលរួម​អនុវត្ត​កិច្ចការ​នេះ ប្រកបដោយ​ការទទួលខុសត្រូវ សេចក្ដីថ្លៃថ្នូរ ទៅតាម​ទំនៀមទម្លាប់ ប្រពៃណី សាសនា ដើម្បី​បង្ការ និង​ទប់ស្កាត់​ការចម្លង​វីរុស កូ​វីដ​១៩ និង​កាត់បន្ថយ​ហានិភ័យ សុខភាព​សាធារណៈ ឱ្យមាន​ប្រសិទ្ធភាព​ខ្ពស់​៕/V-PC

ប្រភព : រស្មីកម្ពុជា

LEAVE A REPLY

Please enter your comment!
Please enter your name here