ជប៉ុន​សម្ដែង​ការព្រួយបារម្ភ ចំពោះ​ការពង្រីក​សមត្ថភាព​យោធា​របស់​ចិន

0
52
^

តាមរបាយការណ៍ការទូតប្រចាំឆ្នាំរបស់ជប៉ុន ឬ សៀវភៅខៀវការទូតចុះផ្សាយនៅថ្ងៃទី ២៧ មេសា កន្លងទៅ រដ្ឋាភិបាល​ជប៉ុន​បាន​សង្កត់ធ្ងន់​អំពី​ការព្រួយបារម្ភ​របស់ខ្លួន​ទៅលើ​ការពង្រីក​សមត្ថភាព​យោធា​របស់​ចិននៅ​តំបន់​សមុទ្រ​ចិន​ខាងកើត និង​សមុទ្រ​ចិន​ខាងត្បូង។ ក្នុង​សៀវភៅ​ខៀវ​នោះ ជប៉ុន​មើលឃើញ​ថា ចិន​ពង្រីក​សមត្ថភាព​យោធា​របស់ខ្លួន ដោយ​មិនមាន​តម្លាភាព និង​ប្រកប​ដោយ​ឯកតោភាគី​និយម ដែល​ឆ្ពោះទៅរក​ការផ្លាស់ប្ដូរ​តុល្យភាព​អំណាច​នៅ​តំបន់​ដែនសមុទ្រ​អាស៊ី។ ជប៉ុន​យល់ឃើញថា ទង្វើ​ទាំងនេះ​បង្កើត​ភាពព្រួយបារម្ភ​យ៉ាងខ្លាំង​ទៅ​ដល់​តំបន់ និង​សហគមន៍​អន្តរជាតិ។ ជាងនេះ​ទៅ​ទៀត​ក្នុង​សៀវភៅ​ខៀវ​នេះ ជប៉ុន​បាន​ចាត់ទុក​សំណុំរឿង​នៃ​ការចោទប្រកាន់​ចិន​ថា រំលោភសិទ្ធិ​មនុស្ស​នៅ​តំបន់ Xinjiang និង​ការបង្ក្រាប​នៅ​ហុងកុង​ជា​រឿង​គួរឱ្យ​ព្រួយបារម្ភ​ដ៏ធ្ងន់ធ្ងរ​មួយ។ ឆ្លើយតប​នឹង​ការព្រួយបារម្ភ​របស់​ជប៉ុន អ្នកនាំពាក្យ​នៃ​ក្រសួង​ការបរទេស​ចិន​លោក Wang Wenbin បាន​និយាយថា៖ «សៀវភៅ​ខៀវ​ការទូត​ថ្មី​របស់​ជប៉ុន ពន្លើស​ជាមួយ​នឹង​ពាក្យ​ថា ‘ការគំរាម​កំហែង​របស់​ចិន’ ព្រមទាំង​វាយប្រហារ និង​បំបាក់​មុខមាត់​ចិន ហើយ​ជ្រៀតជ្រែក​ទាំង​មិន​សម​ហេតុផល​លើ​រឿង​កិច្ចការ​ផ្ទៃក្នុង​របស់​ចិន។ ចិន ប្រឆាំង​ជាដាច់ខាត​នឹង​ទង្វើ​ទាំងនេះ»។ «ទំនាក់ទំនង​ចិន-ជប៉ុន ស្ថិតក្នុង​សភាព​ស្រួចស្រាល់​មួយ។ យើង​សំណូមពរ​ឲ្យ​ជប៉ុន​កែ​កំហុស​របស់ខ្លួន និង​ប្រែក្លាយ​គំនិត​របស់​ជប៉ុន ដែល​ចង់​កសាង​ទំនាក់ទំនង​ដ៏មាន​ស្ថិរភាព​ជាមួយ​ចិន​ទៅ​ជា​សកម្មភាព​ពិតប្រាកដ» ។ នាយក និង​អ្នកស្រាវជ្រាវ​នៃ​វិទ្យាស្ថាន​សិក្សា​អាស៊ី​ឦសាន​នៃ​បណ្ឌិត្យសភា​វិទ្យាសាស្ត្រ​សង្គម​ខេត្ត​ហីឡុងជាំង លោក Da Zhigang បាន​លើកឡើងថា​សៀវភៅ​ខៀវ​នេះ​ជា​រង្វាស់​មួយ​របស់​គោលនយោបាយ​ជប៉ុន ហើយ​វា​បានបង្ហាញ​ឲ្យ​ឃើញថា ជប៉ុន​មាន​កាយវិការ​សហការ​ជាមួយ​អាមេរិក ដើម្បី​ប្រឆាំងនឹង​ចិន។ កាយវិការ​នេះ​នឹង​ធ្វើឲ្យ​ជះ​នូវ​ភាពអវិជ្ជមាន ដែល​នឹង​កើត​ឡើងជា​បន្តបន្ទាប់​ទៅកាន់​វិស័យ​ផ្សេងៗ​ទៀត​ដូចជា វិស័យ​សន្តិសុខ និង​វិស័យ​សេដ្ឋកិច្ច។ ទាក់ទិន​នឹង​ចំណង​ការទូត​រវាង​ជប៉ុន​ជាមួយ​អាមេរិក សៀវភៅ​ខៀវ​ការទូត​របស់​ជប៉ុន​ក៏បាន​រំលេច​ថា ទំនាក់ទំនង​នេះ​ជា​មូលដ្ឋាន​ស្នូល​មួយ​នៃ​គោលនយោបាយ​ការបរទេស និង​គោលនយោបាយ​សន្តិសុខ​របស់​ជប៉ុន។ ទំនាក់ទំនង​ជាមួយ​អាមេរិក​កាន់តែ​សំខាន់​ឡើង ចំពេល​ដែល​មាន​ការកើនឡើង​នៃ​ភាពមិន​ប្រាកដប្រជា​នៅក្នុង​សន្តិសុខ​តំបន់។ ជប៉ុន​ និង​អាមេរិក​ជា​សម្ព័ន្ធមិត្ត​សន្ធិសញ្ញា​ចាប់តាំងពី​សង្គ្រាម​លោក​លើកទី ២ ដែល​បានបញ្ចប់​នៅ​ឆ្នាំ ១៩៤៥៕ AFP

^

LEAVE A REPLY

Please enter your comment!
Please enter your name here