អង់គ្លេស​អាច​ឡើង​ទៅ​វគ្គ​១/២​ជា​លើក​ទី​ពីរ​ក្នុង​ប្រវត្តិសាស្ត្រ​ទេ​?

0
138

​បាល់ទាត់ ៖ ថ្ងៃ​សៅរ៍​នេះ​មាន​ការប្រកួត​ពីរ​គូ​ក្នុង​យូរ៉ូ ២០២០ វគ្គ ១/៤ ផ្តាច់ព្រ័ត្រ ហើយ​យើង​នឹង​ធ្វើការ​វិភាគ​ជូន​ទាំង​ពីរ​គូ​តែម្តង​។​

– សាធារណរដ្ឋ​ឆែក vs ដា​ណឺ​ម៉ាក (​កីឡដ្ឋាន Baku Olympic Stadium ទីក្រុង​បា​គូ អា​ហ្សែ​បៃ​ហ្សង់​)

​ក្រុម​ទាំង​ពីរ​នេះ​មិនមែន​ជា​ក្រុម​ទាក់ទាញ​អ្នកទស្សនា​ឬ​ជា​ក្រុម​រំពឹង​ឈ្នះ​យូរ៉ូ​ទេ​កាលពី​មួយខែ​មុន ហើយ​មនុស្ស​ភាគច្រើន​លើសលប់​ក៏​មិន​រំពឹង​អ្វី​ច្រើន​ពី​ពួកគេ​នោះដែរ​។ ប៉ុន្តែ​ឥឡូវនេះ​មួយ​ក្នុងចំណោម​ក្រុម​ទាំង​ពីរ​នេះ​នឹង​ឡើង​ទៅ​វគ្គ​ពាក់កណ្តាល​ផ្តាច់ព្រ័ត្រ​យូរ៉ូ​។​

​សាធារណរដ្ឋ​ឆែក​ទទួលបាន​កញ្ចប់​សំណាង​នៅ​ថ្ងៃ​ប្រកួត​ចុង​ក្រោយ​ខណៈដែល​កីឡាករ ម៉ា​ធី​ស ដេលី​ត ត្រូវ​បាន​បណ្តេញ​ចេញ​សម្រាប់​ក្រុម​ហូ​ឡង់​ក្នុង​វគ្គ ១៦ ក្រុម​ចុងក្រោយ​។​

​ទន្ទឹមនឹងនេះ ដា​ណឺ​ម៉ាក​បាន​ប្តេជ្ញា​ចិត្ត​ហើយ​ថា​នឹង​ធ្វើ​ឱ្យ​យុទ្ធនាការ​ប្រកួត​នេះ​ក្លាយជា​រឿង​មិន​អាច​បំភ្លេច​បាន​សម្រាប់​កំពូល​កីឡាករ​របស់ខ្លួន គឺ គ្រី​ស្ទាន អេ​រិក​សុន​។ ទោះបី​ដំបូង​គេ​បារម្ភ​ថា​ទម្រង់​ប្រយុទ្ធ​របស់​ក្រុម​ដា​ណឺ​ម៉ានឹង​លែង​មុតស្រួច​តទៅ​ទៀត​បន្ទា​ប់​ពី​បាត់បង់​កីឡាករ​នាំ​លេង​ដ៏​សំខាន់​រូបនេះ​ក៏ដោយ ក៏​ប៉ុន្តែ​រឿង​បែប​នេះ​មិន​បាន​កើតឡើង​នោះទេ​។​

​ការពិត​ជាក់ស្តែង​មាន​តែ​ដា​ណឺ​ម៉ាក​តែមួយគត់​ដែល​ស៊ុត​ចំ​គោលដៅ​លើសពី ៦ ដង​ឡើងទៅ​នៅ​រាល់​ការប្រកួត​ទាំងអស់​នៅ​យូរ៉ូ​មកទល់​ឥឡូវនេះ​។​

​ដំណឹង​ជើង​សាធារណរដ្ឋ​ឆែក ៖

​ខ្សែ​ប្រយុទ្ធ ផា​ទ្រី​ក ស៊ី​ក អាយុ​២៥​ឆ្នាំ​បាន​ស៊ុត​ចូល​៤​គ្រាប់​ចាញ់​តែ​រ៉ូ​ណាល់​ដូ ១ គ្រាប់​ប៉ុណ្ណោះ ប៉ុន្តែ​ដោយហេតុថា​ព័រ​ទុយ​ហ្គាល់​ធ្លាក់​បាត់ទៅហើយ ដូច្នេះ​នេះ​ជា​ឱកាស​ល្អ​បំផុត ដែល​កីឡាករ​រូប​នេះ​អាច​ស៊ុត​បង្កើន​គ្រាប់​បាល់​ដើម្បី​ឈ្នះ​ស្បែកជើង​មាស​។

​គ្រូបង្វឹក​លោក ចារ៉ូ​ស្លាវ ស៊ី​ល​ហា​វី នឹងដាក់​ការទុកចិត្ត​ទាំងស្រុង​លើ​ខ្សែប្រយុទ្ធ​មុត​ស្រួច​រូបនេះ​នៅថ្ងៃនេះ ហើយ​រំពឹង​ថា​ខ្សែបម្រើ​ដ៏​ល្អ​ទាំង​ទ្វេ ថូ​ម៉ាស ស៊ូ​សេក និង ថូ​ម៉ា ហូ​ឡេស នឹង​ជួយ​បញ្ជូន​បាល់​ឱ្យ​ខ្សែប្រយុទ្ធ​ខ្លួន​ស៊ុត​បំប៉ោង​សំណាញ់​ដា​ណឺ​ម៉ាក​។

​ដំណឹង​ជើង​ដា​ណឺ​ម៉ាក ៖

​ប្រធាន​ក្រុម ស៊ីម៉ុន ខា​អឺ ត្រូវបាន​ប្តូរ​ចេញ​នៅ​ប្រកួត​វគ្គ​១៦​ក្រុម​ចុង​ក្រោយ​ដោយសារ​របួស ហើយ​នេះ​ជា​ក្តីបារម្ភ​ធំ​បំផុត​របស់​គ្រូបង្វឹក​លោក កាស្ពើ ហូល​មែន​។

​ខ្សែប្រយុទ្ធ​ឡើង​ជើង​ទាំង​ពីរ កាស្ពើ ដូល​បឺក និង ម៉ា​ទីន ប្រេត​វេត នឹង​ចាប់ផ្តើម​ជម្រើស​ដំបូង​ដដែល​នៅថ្ងៃនេះ​។

​ព្យាករណ៍ ៖

​ក្រុម​ទាំង​ពីរ​ជួប​គ្នា​លើក​ចុងក្រោយ​ក្នុង​យូរ៉ូ គឺ​ឆែក​ឈ្នះ ៣-០​។​

​ឆែក​តែង​ស៊ុត​ចូល​២​ឬ​៣​គ្រាប់​នៅ​៥​ប្រកួត​ចុងក្រោយ ហើយ​បរាជ័យ​ចុងក្រោយ​បំផុត​របស់​ឆែក​គឺ​ចាញ់​អង់គ្លេស​។ ឆែក​ថ្ងៃនេះ​ពឹងផ្អែក​ខ្លាំង​ទៅលើ​ផា​ទ្រី​ក ស៊ី​ក ដែល​មើលទៅ​មុត​ស្រួច​ជាងគេ​នៅ​យូរ៉ូ​ឆ្នាំនេះ​។

​ដា​ណឺ​ម៉ាកស៊ុត​ចូល​៤​គ្រាប់​ឬ​ច្រើន​ជាង​នេះ​នៅ​ពីរ​ប្រកួត​ចុងក្រោយ ប៉ុន្តែ​អវត្តមាន​ប្រធាន​ក្រុម​នៅ​ថ្ងៃនេះ​ជា​ការ​វាយ​សំពង​យ៉ាង​ខ្លាំង​លើ​ស្មារតី​ក្រុម បន្ទាប់​ពី​បាត់បង់​ខ្សែបម្រើ​អេ​រិក​សុន ដោយសារ​គាំងបេះដូង​។

​ដោយ​ក្រុម​ទាំង​ពីរ​លេង​បុក​ដូចគ្នា យើង​រំពឹង​មាន​គ្រាប់​បាល់​ស៊ុត​ចូល​គ្នា​ទៅវិញទៅមក ប៉ុន្តែ​លទ្ធភាព​ឈ្នះ​នឹង​បាន​ទៅ​លើ​ឆែក​ច្រើនជាង​។

​លទ្ធផល​ព្យាករណ៍ ឆែក​ឈ្នះ ២-១​។​

– អ៊ុ​យក្រែន vs អង់គ្លេស (​កីឡដ្ឋាន Stadio Olimpico ទីក្រុង​រ៉ូម អ៊ីតាលី​)

​ក្រុម​ទាំង​ពីរ​នឹង​ព្យាយាម​បង្កើត​ប្រវត្តិសាស្ត្រ​នៅ​ទឹកដី​អ៊ីតាលី​នៅថ្ងៃនេះ​។ អង់គ្លេស​នឹង​ព្យាយាម​ឡើង​ទៅ​វគ្គ​ពាក់កណ្តាល​ផ្តាច់​ព្រ័ត​យូរ៉ូ​ជា​លើក​ទី​ពីរ ចំណែក​អ៊ុយ​ក្រែន​សង្ឃឹម​បង្ហាញ​ខ្លួន​លើក​ដំបូង​នៅ​វគ្គ​៤​ក្រុម​ចុងក្រោយ​នៃ​យូរ៉ូ​។​

​អង់គ្លេស​បាន​ឡើង​មក​វគ្គ ១/៤ ផ្តាច់ព្រ័ត្រ​ក្រោយ​ផ្តួល​អាល្លឺម៉ង់​។ ជ័យជម្នះ ២-០ នេះ​ពិតជា​អស្ចារ្យ​និង​ស័ក្តិសម​ទទួល​បាន​ណាស់ ព្រោះ​កូន​ក្រុម​របស់​លោក​សៅ​ហ្គេត​បាន​គ្រប់គ្រង​លើ​ការប្រកួត បន្ទាប់​ពី​លេង​ភ័យៗ ១០ នាទី​ដំបូង​។​

​អង់គ្លេស​មានឱកាស​ស៊ុត​តិច​ជាង​អាល្លឺម៉ង់ ប៉ុន្តែ​អង់គ្លេស​ចេះ​ឆក់​ឱកាស​ទាំងនោះ​ស៊ុត​ចូល​ទី​បានសម្រេច ចំណែកឯ​អាល្លឺម៉ង់​បាន​ចាក់ចោល​ឱកាស​ទាំងអស់ ជា​ពិសេស​ពេល​ដែល​មូលល័​រ ហា​វើត និង​វើន​ន័​រ ស៊ុត​ខុស​គោលដៅ​រាប់​ភ្លេច​។

​រ៉ា​ហ៊ីម ស្ទើ​លីង ដែល​រក​បាន​គ្រាប់​បាល់​បើកឆាក​ឱ្យ​អង់គ្លេស​នោះ ឥឡូវ​ស៊ុត​បាន ៣ គ្រាប់​ពី ៤ ប្រកួត ខណៈ​ទីបំផុត ហា​រី ខេន បាន​ស៊ុត​ចូល​១​គ្រាប់​ឱ្យ​អង់គ្លេស ហើយ​គេ​រំពឹងថា​នឹង​មាន​គ្រាប់​បាល់​ជា​បន្តបន្ទាប់​ទៀត​ពី​ប្រធាន​ក្រុម​អង់គ្លេស​រូបនេះ​។​

​គិត​មក​ទល់​ពេល​នេះ អង់គ្លេស​នៅតែ​ជា​ក្រុម​តែមួយគត់​ដែល​របូត​គ្រាប់​បាល់​តែ​១​គត់​នៅ​យូរ៉ូ​។ អ្វី​ដែល​រឹតតែ​អស្ចារ្យ គឺ កូនក្រុម​របស់លោក ហ្គា​រ៉េត សៅ​ហ្គេត ឈរ​នៅ​លេខ​១​ក្នុងនាម​ជា​ក្រុម​ដែល​ផ្តល់ឱកាស​ស៊ុត​តិច​បំផុត​ដល់​គូប្រជែង​។​

​អ៊ុយ​ក្រែន​ឡើង​មក​ដល់វ​គ្គ​នេះ​មិន​ងាយស្រួល​ទេ ដោយ​យក​ឈ្នះ​ស៊ុយអែត​ទាំង​វេទនា​បំផុត ហើយ​គួបផ្សំ​នឹង​សំណាង​និង​បច្ចេកទេស​ផង ពួកគេ​បាន​យកឈ្នះ​ស៊ុយអែត​នៅ​ចុងបញ្ចប់​នៃ​នាទី​១២០​។​

​កីឡាករ ហ្ស៊ី​ន​ឆិ​ន​កូ របស់​ក្រុម Manchester City គឺជា​កីឡាករ​ឆ្នើម​ប្រចាំ​ការប្រកួត​នោះ ព្រោះ​រូបគេ​ស៊ុត​គ្រាប់​បាល់​ដំបូង​ឱ្យ​ក្រុម មុន​ពេល​បង្កើត​ឱកាស​ស៊ុត​គ្រាប់​បាល់​ជ័យជម្នះ​ចុង​ម៉ោង​ដល់​កីឡាករ អា​តឹម ដូវ​ប៊ី​ក នៅ​វគ្គ​បន្ថែម​ម៉ោង​១៥​នាទី​២​ដង​។​

​អ៊ុយ​ក្រែន​ឡើង​មក​ដល់វ​គ្គ​១/៤​ជា​លើកដំបូង​ក្នុង​ប្រវត្តិសាស្ត្រ​អាច​ចាត់ទុកថា​បាន​សំណាង​ជួយ​ច្រើនជាង ក្រោយ​កីឡាករ​ស៊ុយអែត ម៉ាកូ​ស ដា​នី​ញែល​សុន ទទួលបាន​កាត​ក្រហម​នៅ​វគ្គ​ទី​មួយ​នៃ​ការបន្ថែម​ម៉ោង​៣០​នាទី ជាហេតុ​ផ្តល់​ប្រៀប​ឈ្នះ​ទាំងស្រុង​ដល់​អ៊ុ​យក្រែន​។

​ដំណឹង​ជើង​អ៊ុ​យក្រែន ៖

​កីឡាករ អា​តឹម បេ​សេឌី​ន បាន​រងរបួស ហើយ​របួស​នេះហើយ​ជា​បច្ច័យ​ធ្វើឱ្យ​កីឡាករ​ស៊ុយអែត​ដា​នី​ញែល​សុន​ទទួល​បានកាត​ក្រហម ហើយ​ថ្ងៃនេះ​រូប​គេ​នឹង​អវត្តមាន​។

​កីឡាករ​សំខាន់​ពីរ​នាក់​ទៀត គឺ ដេនី ប៉ូ​ប៉ូវ និង អូ​ឡេកសាន់​ឌឺ ហ្សូបកូវ នឹង​អវត្តមាន​ដោយសារ​របួស​។

​កីឡាករ អេន​ឌ្រី យ៉ាម៉ូ​លេន​កូ បាន​ដើរ​ប៉ាំង​ខ្ញើក​ពេល​លេង​ទល់​នឹង​ស៊ុយអែត ប៉ុន្តែ​រូបគេ​រំពឹង​លេង​បាន​នៅថ្ងៃនេះ​។ ដូវ​ប៊ី​ក ដែល​ស៊ុត​ចូល​គ្រាប់​ជ័យជម្នះ អាច​នឹង​ជាប់​ជម្រើស​ដំបូង​ចាប់​ដៃគូ​ជាមួយ​កីឡាករ យ៉ា​រ៉េម​ឆាក់​។

​ដំណឹង​ជើង​អង់គ្លេស ៖

​លោក​ហ្គា​រ៉េត សៅ​ហ្គេត កំពុង​បារម្ភ​អំពី​របួស​របស់​កីឡាករ កេ​រ៉ាន់ ទ្រី​ប​ព្យែរ និង ដេ​ក្លាន រ៉ា​យ ពេល​ឈ្នះ​អាល្លឺម៉ង់​។ ប៉ុន្តែ​អង់គ្លេស​មិន​ខ្វះ​កីឡាករ​ល្អ​ចាំ​ជំនួស​ពួកគេ​នោះ​ឡើយ​។

​ថ្ងៃនេះ​ម៉ា​សុន ម៉ោន​នឹង​វិល​ចូល​ជម្រើស​១១​នាក់​វិញ ក្រោយ​ធ្វើ​ចត្តា​ឡីស័​ក​រួចរាល់​។

​ព្យាករណ៍ ៖

​និយាយ​ពី​ជំនួប​ផ្លូវការ ៧ លើកចុងក្រោយ អង់គ្លេស​ឈ្នះ ៤ អ៊ុយ​ក្រែន​ឈ្នះ​១ និង​ស្មើ​២​ដង​។ ជួប​គ្នា​ចុងក្រោយ​ក្នុង​វគ្គ​ជម្រុះ​វើល​ខា​ប់​២០១២-១៣ ក្រុម​ទាំង​ពីរ​ស្មើ​គ្នា​ទាំង​ពីរ​លើក​។

​អង់គ្លេស​ថ្ងៃនេះ​មានប្រៀប​ជាង​អ៊ុយ​ក្រែន​ទាំងប្រ​វត្តិ​និង​ទម្រង់​លេង​។ ស្ទើ​លីង​និង​ហារី​ខេន​រំពឹង​រក​គ្រាប់​បាន​យ៉ាងតិច​ម្នាក់​១​គ្រាប់​នៅ​ថ្ងៃនេះ ហើយ​ដោយ​មាន​កីឡាករ​ម៉ោន​ចូល​មក​ពង្រឹង​ក្រុម យើង​រំពឹង​អង់គ្លេស​លេង​រស់​រវើក​នៅ​តំបន់​បម្រើ​។

​អ៊ុយ​ក្រែន​អវត្តមាន​កីឡាករសំ​ខាន់ៗ​ច្រើន​ណាស់​ដោយសារ​របួស ហើយ​ពួកគេ​ច្បាស់​ជា​លេង​ទប់​អង់គ្លេស​តាំង​ពី​ដើមតង់​។ ក្នុងករណី​អង់គ្លេស​ស៊ុត​នាំ​មុខមុន​១​ឬ​២ យើង​រំពឹង​មាន​គ្រាប់​បាល់​ធ្លាយ​ជា​បន្តបន្ទាប់​នៅ​តំបន់​ការពារ​របស់​អ៊ុ​យក្រែន ព្រោះ​ពួកគេ​មិន​អាច​បន្ត​បិទ​យក​ចាញ់​នោះ​ទេ​។​

​លទ្ធផល​ព្យាករណ៍ អង់គ្លេស​ឈ្នះ​ច្រើន​គ្រាប់​៕

ប្រភព : រស្មីកម្ពុជា

LEAVE A REPLY

Please enter your comment!
Please enter your name here