ចិន​ធ្លាក់ចុះ​ចំនួន​ប្រជាជន​ជា​លើកដំបូង​ក្នុង​រយៈពេល ៥ ទសវត្សរ៍​

0
66

កាសែត Financial Times បាន​ដកស្រង់​សម្តី​ប្រភព​ដឹង​រឿង​នេះ​ដោយ​និយាយថា​ចិន​បាន​ត្រៀម​ខ្លួន​រួចជាស្រេច​ក្នុង​ការរាយការណ៍​​អំពី​ការធ្លាក់ចុះ​ចំនួន​ប្រជាជន​លើកដំបូង​របស់​ខ្លួន​ក្នុង​រយៈពេល ៥ ទសវត្សរ៍ បន្ទាប់​ពី​ការធ្វើជំរឿន​ម្តង​ក្នុង​មួយ​ទសវត្សរ៍​។​

​ការធ្លាក់​ចុះ​ចំនួន​ប្រជាជន​នេះ​នឹង​បន្ថែម​សម្ពាធ​លើ​ទីក្រុង​ប៉េកាំង​ដើម្បី​ដាក់ចេញ​នូវ​វិធានការ​នានា​ដើម្បី​លើកទឹកចិត្ត​ដល់​គូ​ស្វាមីភរិយា​ឱ្យ​មាន​កូន​ច្រើន​និង​បញ្ចៀស​ការធ្លាក់ចុះ​ចំនួន​ប្រជាជន ដែល​មិន​អាច​កែ​ត្រឡប់​ក្រោយ​វិញ​បាន​។​

​ការិយាល័យ​ស្ថិតិ​ជាតិ (NBS)​ដែល​គ្រោង​នឹង​ចេញផ្សាយ​របាយការណ៍​នៅ​ដើម​ខែ​មេសា​នូវ​លទ្ធផល​នៃ​ការធ្វើជំរឿន​ដែល​បាន​ធ្វើឡើង​កាលពី​ចុងឆ្នាំ​មុន​មិន​បាន​ឆ្លើយ​​តប​ភ្លាមៗ​ទៅ​នឹង​សំណើ​សុំ​ការបំភ្លឺ​ពី Financial Times ទេ​។​

Financial Times ដែល​ដកស្រង់​ប្រភព​កាលពី​ថ្ងៃ​អង្គារ​ទី​២៧​មេសា បាន​និយាយថា តួលេខ​ចំនួន​ប្រជាជន​មាន​លក្ខណៈ​រសើប​ខ្លាំង​ហើយ​នឹង​មិន​ចេញ​ផ្សព្វផ្សាយ​ទេ​​ដរាបណា​នាយកដ្ឋាន​នានា​របស់​រដ្ឋាភិបាល​ឯកភាព​លើ​ទិន្នន័យ​និង​ផលប៉ះពាល់​របស់​វា​។​

​លោក ចាង ជី​វៃ ប្រធាន​សេដ្ឋវិទូ​ប្រចាំ​ក្រុមហ៊ុន Pinpoint Asset Management មាន​មូលដ្ឋាន​នៅ​ទីក្រុង​សិន​ចិន និយាយថា “​ប្រសិនបើ​ចិន​បញ្ជាក់​ពី​ការធ្លាក់ចុះ​បែបនេះ វា​នឹង​ក្លាយជា​រឿង​ធំ​”​។​

“​ការមូល​មតិ​គ្នា​រំពឹង​ថា​ប្រជាជន​ចិន​នឹង​កើន​ដល់​កម្រិត​ខ្ពស់​បំផុត​នៅ​ត្រឹម​ឆ្នាំ ២០២៧ ដោយ​ផ្អែក​លើ​ការព្យាករណ៍​របស់​អង្គការសហប្រជាជាតិ​។​វា​នឹង​លឿន​ឆាប់​ពេក​​ជាង​អ្វីដែល​ទីផ្សារ​និង​អ្នក​ធ្វើ​គោលនយោបាយ​រំពឹងទុក​”​។​

​មិន​មាន​ការពន្យល់​ប​ក​ស្រាយ​ណាមួយ​សម្រាប់​ការពន្យារពេល​ក្នុង​ការប្រកាស​លទ្ធផល​ទេ​ទោះបីជា​ការិយាល័យ​ស្ថិតិ​បាន​និយាយ​នៅ​ដើមខែ​នេះ​ថា​ការងារ​ជាច្រើន​​ចាំបាច់​ត្រូវ​ត្រៀម​រួចរាល់​សិន​ក៏​ដោយ​។​

​ក្នុង​រយៈពេល​ប៉ុន្មាន​ខែ​ថ្មីៗ​នេះ​ប្រព័ន្ធ​ផ្សព្វផ្សាយ​រដ្ឋ​របស់​ចិន​ហាក់​សម្តែង​ការព្រួយបារម្ភ​ខ្លាំង ដោយ​និយាយ​ថា​ចំនួន​ប្រជាជន​អាច​នឹង​ចាប់ផ្តើម​ធ្លាក់ចុះ​នៅ​ប៉ុន្មាន​​ឆ្នាំ​ខាង​មុខ​។​

​ក្នុង​ឆ្នាំ ២០១៦ ចិន​បាន​លុបចោល​គោលនយោបាយ​កូន​មួយ​ដែលមាន​ចំណាស់​រាប់​ទសវត្សរ៍​ក្នុង​ក្តីសង្ឃឹម​ជំរុញ​ចំនួន​ទារក​ដោយ​ជំនួស​មកវិញ​នូវ​វិធានកា​រគោល​​នយោបាយ​កូន​ពីរ​វិញ​។​

​នៅ​គ្រានោះ ចិន​ក៏​បាន​កំណត់​ទិសដៅ​ជំរុញ​ចំនួន​ប្រជាជន​របស់​ខ្លួន​ឱ្យដល់ ១,៤២ ពាន់​លាន​នាក់​នៅ​ត្រឹម​ឆ្នាំ ២០២០ ពី​ចំនួន ១,៣៤ ពាន់​លាន​នាក់​ក្នុង​ឆ្នាំ ២០១០ ផងដែរ​។​

​ប៉ុន្តែ​អត្រាកំណើត​នៅតែ​បន្ត​ធ្លាក់ចុះ​រហូត​។​

​នោះ​គឺ​មក​ពី​គូ​ស្វាមីភរិយា​នៅតាម​ទីក្រុង ជា​ពិសេស​អ្នក​ដែល​កើត​ក្រោយ​ឆ្នាំ ១៩៩០​បាន​ផ្តល់​តម្លៃ​ដល់​ឯករាជ្យភាព​និង​អាជីព​ការងារ​របស់​ពួកគេ​ច្រើន​ជាង​ការកសាង​​គ្រួសារ ទោះបីជា​មាន​សម្ពាធ​ពី​ឪពុកម្តាយ​ដើម្បី​ឱ្យ​មាន​កូន​ក៏​ដោយ​។​

​ការ​ឡើងថ្លៃ​នៃ​ការរស់នៅ​តាម​ទីក្រុង​ធំៗ ក៏​បាន​រារាំង​គូ​ស្វាមីភរិយា​ពី​ការ​យក​កូន​ផងដែរ​។​

​លោក​ចាង​និយាយថា “​ចិន​ទំនងជា​ត្រូវ​បន្ធូរបន្ថយ​គោលនយោបាយ​ពន្យារកំណើត​ទាំងស្រុង​ហើយ​ពន្យារ​អាយុ​ចូល​និវត្តន៍​ឱ្យ​បាន​លឿន​”៕

LEAVE A REPLY

Please enter your comment!
Please enter your name here