ចិន​បាញ់​បង្ហោះ​រ៉ូបូត​គំរូ​មាន​សមត្ថភាព​ចា​ប់យក​សំរាម​អវកាស​ជាមួយនឹង​សំណាញ់​

0
78

ក្រុមហ៊ុន​រុករក​រ៉ែ​អវកាស​ទើប​បង្កើត​ថ្មី​មួយ​របស់​ចិន​បាន​បាញ់​បង្ហោះ​ទៅ​គន្លង​ផែនដី​ទាប​កាលពី​ថ្ងៃ​អង្គារ​ទី​២៧​មេសា​នូវ​រ៉ូបូត​គំរូ​មួយ ដែល​អាច​ប្រមូល​កម្ទេចកម្ទី​បន្សល់​ដោយ​យានអវកាស​ផ្សេងទៀត​ជាមួយនឹង​សំណាញ់​ដ៏​ធំ​។​

​ទីភ្នាក់ងារ​សារព័ត៌មាន​ស៊ីនហួ​បាន​រាយការណ៍​ថា រ៉ូបូត NEO-01 ដែល​នឹង​ចូល​ជ្រៅ​ក្នុង​ទី​អវកាស​ដើម្បី​សង្កេតមើល​ភព​តូចៗ​ផង​ដែរ​នោះ​ត្រូវបាន​បាញ់​បង្ហោះ​នៅ​​លើ​រ៉ុក្កែត Long March 6 របស់​រដ្ឋាភិបាល​រួម​ជាមួយ​ផ្កាយរណប​មួយចំនួន​។​

​យោង​តាម​ក្រុមហ៊ុន Origin Space បានឱ្យដឹងថា រ៉ូបូត​ទម្ងន់ ៣០ គីឡូក្រាម ដែល​អភិវឌ្ឍ​ដោយ​ក្រុមហ៊ុន​មាន​មូលដ្ឋាន​នៅ​ទីក្រុង​សិន​ចិន​នេះ នឹង​ត្រួសត្រាយ​ផ្លូវ​សម្រាប់​បច្ចេកវិជ្ជា​នាពេល​អនាគត ដែល​មាន​សមត្ថភាព​រុក​រក​រ៉ែ​នៅលើ​អាចម៍ផ្កាយ​។​

​ចាប់តាំងពី​ការបង្កើត​ក្រុមហ៊ុន​រុករក​រ៉ែ​អាចម៍ផ្កាយ​ដំបូងបង្អស់​នៅលើ​ពិភពលោក​ក្នុង​ឆ្នាំ ២០០៩ ឥឡូវ​មាន​ក្រុមហ៊ុន​រាប់សិប​នៅ​ទូទាំង​ពិភពលោក​បាន​ចូលប្រឡូក​ក្នុង​វិស័យ​ថ្មី​នេះ រួម​ទាំង​ក្រុមហ៊ុន 3D Systems របស់​សហរដ្ឋ​អាម៉េរិក និង ក្រុមហ៊ុន Astroscale របស់​ជប៉ុន​។​

​ខុស​ពី​បច្ចេកវិជ្ជា​របស់​ក្រុមហ៊ុន Astroscale ដែល​ប្រើ​មេដែក​ដើម្បី​ប្រមូល​សំរាម​អវកាស រ៉ូបូត NEO-01 នឹង​ប្រើ​សំណាញ់​ដើម្បី​ចាប់​យក​កម្ទេចកម្ទី​ហើយ​បន្ទាប់​មក​ដុត​វា​ដោយ​ប្រព័ន្ធ​បញ្ឆេះ​អគ្គិសនី​របស់ខ្លួន នេះ​យោងតាម​របាយការណ៍​នៅលើ​វេបសាយ​របស់​ក្រុមហ៊ុន​។​

​ផ្កាយរណប​រាប់ពាន់​ត្រូវ​បាន​បាញ់​បង្ហោះ​នៅ​ទូទាំង​ពិភពលោក​។ នៅពេលណា​ដែល​ពួក​វា​ហួស​សម័យ វា​នឹង​ក្លាយ​ជា​សំរាម​អវកាស បង្ក​គ្រោះថ្នាក់​ដល់​ផ្កាយរណប​ដទៃទៀត​៕

LEAVE A REPLY

Please enter your comment!
Please enter your name here