សម្តេច​ពិជ័យ​សេនា ទៀ បាញ់ៈ មិនមាន​ករណី​បាញ់​ទម្លាក់ យន្តហោះ​វៀតណាម នៅ​ខេត្ត​មណ្ឌល​គី​រី​ទេ​

0
806

ភ្នំពេញៈ សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ បាន​បដិសេធ និង​ច្រានចោល ចំពោះ​ការផ្សព្វផ្សាយ របស់​គេហទំព័រ KHMER MEKONG NEW ថាៈ ទាហាន​កម្ពុជា បាន​បាញ់​ទម្លាក់​យន្តហោះ​វៀតណាម ដែល​បាន​រំលោភ ដែនអាកាស​កម្ពុជា នៅ​ខេត្ត​មណ្ឌល​គី​រី កាលពី​ប៉ុន្មាន​ថ្ងៃ កន្លងមកនេះ គឺជា​ការ​ប្រឌិត​ព័ត៌មាន ដើម្បី​ធ្វើ​ឲ្យ​មានការ​ភ័ន្តច្រឡំ ពី​សំណាក់​ប្រជាពលរដ្ឋ និង​មជ្ឈដ្ឋាន​ទូទៅ តែប៉ុណ្ណោះ​។​

សម្តេច​ពិជ័យ​សេនា ទៀ បាញ់ បាន​មានប្រសាសន៍ បញ្ជាក់ប្រាប់​រស្មី​កម្ពុជា​ថាៈ “ ព័ត៌មាន​ដែល​បាន​ផ្សព្វផ្សាយ​នេះ គឺជា​ការ​ប្រឌិត ចេះតែ​និយាយ​ផ្តេសផ្តាស គ្មាន​ការពិត មិនមែន​តែ​រឿង​នឹង​មួយ​ទេ គឺមាន​រឿង​ផ្សេងៗ​ទៀត វា​ចេះតែ​ប្រឌិត គ្មាន​រឿង​អីចេះ តែ​និយាយ​ទៅ គ្មាន​បានការ ” ។​

​ចំណែក លោក​ឧ​ត្ត​ម​សេនីយ៍​ទោ ឡោ សុខា ស្នងការ​នគរបាល ខេត្ត​មណ្ឌល​គី​រី បាន​មាន ប្រសាសន៍ បញ្ជាក់ប្រាប់​រស្មី​កម្ពុជា នៅ​រសៀល ថ្ងៃទី​២២ ខែមិថុនា​នេះ​ថាៈ មិនមាន​ករណី បាញ់​ទម្លាក់ យន្តហោះ​វៀតណាម នៅ​ខេត្ត​មណ្ឌល​គី​រី ដូចជា ការផ្សព្វផ្សាយ​របស់ គេហទំព័រ KHMER MEKONG NEW នោះទេ​។ ហើយ​ការផ្សាយ​នេះ គឺ​បំពុលសង្គម​។

​​លោកស្នងការ បានបញ្ជាក់​យ៉ាង​ដូច្នេះ​ថាៈ “ អត់​មាន​ទេ ដូចជា​មិន​មានអី​ដល់​ថ្នាក់​នឹង​ទេ បាញ់​យន្តហោះ​វៀតណាម ឯណា ពួកនេះ ពួក​បំពុលសង្គម​ទេ ” ។​

​រីឯ​ប្រជាពលរដ្ឋ នៅ​ខេត្ត​មណ្ឌល​គី​រី បាន​អះអាង​ប្រាប់​រស្មី​កម្ពុជា​ថាៈ ប៉ុន្មាន​ថ្ងៃ​មកនេះ គឺ​មិនមាន​ហេតុការណ៍ អ្វី​កើតឡើង គួរ​ឲ្យ​ភ្ញាក់ផ្អើល​នោះទេ គឺមាន​ភាពស្ងប់ស្ងាត់​។ ហើយ​ចំពោះ ព័ត៌មាន​ដែលថា មានការ​បាញ់ យន្តហោះ​វៀតណាម​នោះ គឺ​មិនមាន​នោះទេ​។​

​ទាក់ទង​ការ​បង្ហោះ​ព័ត៌មាន​នេះ អ្នកលេង​បណ្តាញ​សង្គម ជាច្រើន បាន​ចូល​ខម​មិន នៅក្នុង​គេហទំព័រ KHMER MEKONG NEW ថាៈ ព័ត៌មាន​ដែល​បាន​ផ្សាយ​នេះ គឺជា​ព័ត៌មាន​មិន​ពិត និង​បាន​ហៅ​ការផ្សាយ​ព័ត៌មាន​នេះ​ថា ជាការ​ញុះញង់ និង​បាន​សូម​ឲ្យ​សមត្ថកិច្ច ចាត់វិធានការ តាមផ្លូវ​ច្បាប់​។​

​គណនី​ហ្វេ​ស​ប៊ុ​ក ឈ្មោះ Leangchhong Oeung បាន​ខម​មិន​ថាៈ “ ប្រយ័ត្ន​គុក​ណា កុំ​ផ្សាយ​ព័ត៌មាន មិន​ពិត​ច្រើនពេក ដើម្បី​ចង់បាន​លុយ តែ​ប្រយ័ត្ន​ដេក​គុក ស៊ី​បាយ​ស្រាប់ ” ។​

​គណនី​ហ្វេ​ស​ប៊ុ​ក ឈ្មោះ Ney sing office បាន​ខម​មិន​ថាៈ “ ចង់​ឲ្យ​អាជ្ញាធរ តាម​ចាប់​អ្នក ដែល​ផ្សព្វផ្សាយ ព័ត៌មាន​បំផុសបំផុល ” ។​

​គណនី​ហ្វេ​ស​ប៊ុ​ក ឈ្មោះ Kim Kim បាន​ខម​មិន​ថាៈ “ អា​ឡប់​នេះ និយាយ​ភូតភរ​ខ្មែរ​គ្នាឯង ចង់អោយ​ខ្មែរ វង្វេង​ឬ​..??? សូម​បងប្អូន កំណត់​អ្វីខ្លះ​ពិត ហើយ​អ្វីខ្លះ​ថោកទាប បោកប្រាស់ ការពិត​..!!! ” ។​

​គណនី​ហ្វេ​ស​ប៊ុ​ក ឈ្មោះ Boy Kdol បាន​ខម​មិន​ថាៈ “ ព័ត៌មាន​ក្លែងក្លាយ ” ។ គណនី​ហ្វេ​ស​ប៊ុ​ក ឈ្មោះ Sann E2 បាន​ខម​មិន​ថាៈ “ សូម​បងប្អូន​ទាំងអស់ កុំ​ជឿ ព្រោះថា Channel មួយ​នេះ គឺ​បោក​ច្រើនដង​ហើយ ប្រសិនបើ​ខ្មែរ បាន​បាញ់​មែន មិនមែន​តែ Channel មួយ​នេះ បាន​ផ្សព្វផ្សាយ​ទេ គឺមាន Channel ផ្សេងទៀត ផ្សព្វផ្សាយ​ដែរ​ហើយ ជាពិសេស គឺ RFI និង CC Voice” ៕

ប្រភព​ : រស្មីកម្ពុជា

LEAVE A REPLY

Please enter your comment!
Please enter your name here