រដ្ឋមន្ត្រីការបរទេសអង់គ្លេសលោក Dominic Raab បានជួបជាមួយនឹងរជ្ជទាយាទ អារ៉ាប៊ី សាអ៊ូឌីត ព្រះអង្គម្ចាស់ Mohammed bin Salman នៅរាជធានីរីយ៉ាដ ដើម្បីពិភាក្សាអំពីប្រទេសអ៊ីរ៉ង់ និងទំនាក់ទំនងទ្វេភាគី ក៏ដូចជា បញ្ហាប្រែប្រួលអាកាសធាតុផងដែរ។ នេះបើតាមក្រសួងការបរទេសអង់គ្លេស។ ដំណើរទស្សនកិច្ចរបស់លោក Raab ធ្វើឡើង នៅពេលដែលមហាអំណាចពិភពលោកកំពុងធ្វើការចរចា ដើម្បីស្ដារកិច្ចព្រមព្រៀងនុយក្លេអ៊ែរ ឆ្នាំ ២០១៥ ដែល អារ៉ាប៊ី សាអ៊ូឌីត បានជំទាស់ ដោយសារកិច្ចព្រមព្រៀងមិនបានដោះស្រាយបញ្ហាកម្មវិធីមីស៊ីលអ៊ីរ៉ង់ និងការគាំទ្រក្រុមប្រដាប់អាវុធក្នុងតំបន់ ដូចជា នៅក្នុងប្រទេសយេម៉ែន។ សេចក្ដីថ្លែងការណ៍របស់ក្រសួងការបរទេសអង់គ្លេស បានដកស្រង់សម្តី លោក Raab បាននិយាយថា៖ «ចក្រភពអង់គ្លេសបញ្ជាក់ជាថ្មី នូវការប្តេជ្ញាចិត្តរបស់យើង ក្នុងការដោះស្រាយបញ្ហាសន្តិសុខរួមរបស់យើង រួមទាំងការគំរាមកំហែងពីអ៊ីរ៉ង់ និងជម្លោះដែលកំពុងបន្តនៅក្នុងប្រទេសយេម៉ែន»។ អារ៉ាប៊ី សាអ៊ូឌីត ដែលកំពុងជាប់ក្នុងការប្រកួតប្រជែង ជាមួយសត្រូវអ៊ីរ៉ង់ បានជំរុញមហាអំណាចពិភពលោកឱ្យទាមទារលក្ខខណ្ឌតឹងរ៉ឹង និងមានសុពលភាពវែងជាងមុន នៅក្នុងកិច្ចចរចានៅទីក្រុងវីយែន ប្រទេសអូទ្រីស ដែលធ្វើឡើងដើម្បីសហរដ្ឋអាមេរិក និងអ៊ីរ៉ង់ឱ្យត្រឡប់មកអនុលោមតាមកិច្ចព្រមព្រៀងវិញ។ អារ៉ាប៊ី សាអ៊ូឌីត ក៏ដឹកនាំសម្ព័ន្ធភាពយោធាក្នុងការប្រយុទ្ធ ជាមួយក្រុមឧទ្ទាមហ៊ូទី ដែលគាំទ្រដោយអ៊ីរ៉ង់នៅប្រទេសយេម៉ែន ផងដែរ៕ AFP
