ដើម្បីធានាថា សហរដ្ឋអាមេរិក គឺជាជើងឯកពិភពលោក កាលពីថ្ងៃទី៨ ខែមិថុនា ឆ្នាំ២០២១ ព្រឹទ្ធសភាអាមេរិកបានអនុម័តគម្រោងច្បាប់ ប្រកបដោយមហិច្ឆតា ទំហំដល់ទៅ ១៧០ពាន់លានដុល្លារ សម្រាប់វិនិយោគវិស័យវិទ្យាសាស្ត្រ និងបច្ចេកវិទ្យា។ ផែនការនេះត្រូវបានគេចាត់ទុកថា ជាច្បាប់ដែលមានលក្ខណៈ “ប្រវត្តិសាស្ត្រ” សម្រាប់ទប់ទល់នឹងឥទ្ធិពល និងគំរូសេដ្ឋកិច្ចចិន។ ព្រឹទ្ធសភាអាមេរិកបានអនុម័តសេចក្តី ព្រាងច្បាប់ ក្នុងសំឡេង ៦៨ ទល់នឹង ៣២ប្រឆាំង។ គម្រោងច្បាប់នេះត្រូវបានគេចាត់ទុកថា មានលក្ខណៈ “ប្រវត្តិសាស្ត្រ” ព្រោះជាផែនការវិនិយោគ ផ្នែកស្រាវជ្រាវ និងអភិវឌ្ឍន៍វិទ្យាសាស្ត្របច្ចេកវិទ្យា តម្លៃជាង១៧០ពាន់លានដុល្លារ។ ប្រធានាធិបតីបានផ្តួចផ្តើមគំនិតវិនិយោគនេះឡើង ដើម្បីអាចរក្សានាមជាមហាអំណាច ជាជើងឯកពិភពលោក ពោល គឺដើម្បីទប់ទល់នឹងការគំរាមកំហែងរបស់ចិន។ គម្រោងច្បាប់បានជំរុញ និងលើកទឹកចិត្តឱ្យក្រុមហ៊ុនសហគ្រាសអាមេរិក ផលិតគ្រឿងផ្សំអេឡិចត្រូនិក ក្នុងទឹកដីអាមេរិក ដូចជា សឺមីកុងឌុចទ័រ បន្ទះឆីប (puces informatiques) ដើម្បីកាត់បន្ថយការរំពឹងលើអ្នកក្រៅ។ គ្រឿងផ្សំអេឡិចត្រូនិក មានប្រើដោយចាំបាច់ ក្នុងវិស័យឧស្សាហកម្មសំខាន់ៗ រាប់តាំងពីឧស្សាហកម្មយានយន្ត ទូរគមនាគមន៍ ឬឧស្សាហកម្មឱសថ ដែលផលិតស្ទើរទាំងស្រុងនៅតំបន់អាស៊ី។ ឆ្លើយតបនឹងតម្រូវការពិភពលោកកាន់តែធំ គ្រឿងផ្សំអេឡិចត្រូនិកទាំងអស់នេះបានក្លាយជាចំណុចយុទ្ធសាស្ត្រ។ ហើយចិនគ្រប់គ្រង ទីផ្សារផលិតកម្ម គ្រឿងផ្សំអេឡិចត្រូនិកដ៏ចាំបាច់ និងជាយុទ្ធសាស្ត្រនេះបាន តាំងពីយូរ។ ផែនការ “ផលិត២០២៥” ដែលចិនបានចាប់អនុវត្តតាំងពី ៥ឆ្នាំមុនមក ហាក់បាននិងកំពុងលើកចិនឱ្យនាំមុនគេ ក្នុងវិស័យបច្ចេកវិទ្យាអនាគត និងគំរាមកំហែងសន្តិសុខអាមេរិក សម្រាប់ក្រសែភ្នែកអាមេរិក តាមរយៈការអភិវឌ្ឍន៍លឿនស្លេវនៃបច្ចេកវិទ្យាទូរគមនាគមន៍ចល័ត 5G។ បច្ចេកវិទ្យា 5G ដែលលោក ដូណាល់ ត្រាំ បានចោទរួចទៅហើយថា ជាប្រភពនាំហានិភ័យ លួចការសម្ងាត់ឧស្សាហកម្ម ឬ អនាគតទៅប៉េកាំង អាចនឹងកាត់ផ្តាច់ប្រព័ន្ធទំនាក់ទំនងទូរស័ព្ទអាមេរិកបានទៀត។ ហេតុដូច្នេះហើយ បានជាអាមេរិកមិនអាចបង្អង់បានទៀតឡើយ។ ជាមួយនឹងទង្វើវាយប្រហារដែលអាមេរិកបានជួបជាញឹកញយមួយរយៈចុងក្រោយនេះទៀត មិនថា លោក ត្រាំ ឬ លោក បៃដិន ពិតជាមានអារម្មណ៍ចង់ទប់ទល់ចិនជាងពេលណាៗទាំងអស់៕ Reuters
