នៅពេលវិបត្តិកូវីដ១៩ ទើបផ្ទុះឡើងដំបូង ថៃមានចំណាត់ការល្អ ទទួលបានការកោតសរសើរ កាលពីឆ្នាំ២០២០ ប៉ុន្តែថៃបែរជារងការរិះគន់ខ្លាំងចំពោះភាពយឺតយ៉ាវ ក្នុងការផ្តល់វ៉ាក់សាំងបង្ការដល់ប្រជាពលរដ្ឋទៅវិញ។ យុទ្ធនាការជាតិចាក់វ៉ាក់សាំងប្រឆាំងកូវីដ១៩ ទើបចាប់ផ្តើមកាលពីថ្ងៃទី៧ ខែមិថុនា ឆ្នាំ២០២១ តែប៉ុណ្ណោះ។ នៅពេលនេះ ថៃមានវ៉ាក់សាំងប្រឆាំងកូវីដ១៩ AstraZeneca ចំនួនជិត ពីរលានដូស ផលិតនៅក្នុងស្រុកដោយក្រុមហ៊ុន Siam Bioscience។ អំឡុងខែមិថុនានេះ ថៃនឹងអាចមានវ៉ាក់សាំងសរុបចំនួន ៦លានដូស។ យុទ្ធនាការចាក់វ៉ាក់សាំងថ្នាក់ជាតិបានចាប់ផ្តើម ក្នុងខណៈពេលដែលរលកចម្លងកំពុងចាប់ស្ទុះឡើងជាថ្មី ដោយមានអ្នកឆ្លងថ្មីចំនួន ២ ៦៧១នាក់ និងស្លាប់ ២៣នាក់ កាលពីថ្ងៃអាទិត្យ ទី៦ ខែមិថុនា។ អាជ្ញាធរបានសម្រេចយកលក្ខខណ្ឌអាយុ និងមុខរបប ជាកត្តាសំខាន់។ បុគ្គលិកពេទ្យ គ្រូបង្រៀន មានអាទិភាពទៅចាក់ថ្នាំបង្ការមុនគេ។ អ្នកមានអាជីព ដូចជា អ្នកបើកឡានតាក់ស៊ីដែលប្រឈមនឹងការជួបមនុស្ស ជួបទេសចរបរទេសច្រើន ក៏ស្ថិតនៅក្នុងចង្កោមអាជីពអាទិភាពអាចទៅចាក់ថ្នាំបង្ការមុនគេដែរ ព្រោះ រដ្ឋាភិបាលសង្ឃឹមថា វិស័យទេសចរណ៍ថៃ ដែលជាបង្គោលសេដ្ឋកិច្ចដ៏សំខាន់មួយ នឹងចាប់កំរើកឡើងវិញឆាប់ៗ។ ជាក់ស្តែង កោះភូកេតដ៏ល្បីល្បាញរបស់ថៃ នឹងចាប់បើកទទួលភ្ញៀវទេសចរ ជាបណ្តើរៗ និងបន្តិចម្តងៗ ចាប់ពីខែកក្កដា ឆ្នាំ២០២១នេះ។ ទេសចរបរទេសចាក់វ៉ាក់សាំងរួច អាចមកកំសាន្ត និងដើរហើរសេរីនៅលើកោះនេះ ដោយគ្មានជាប់ចត្តាឡីស័កទេ។ ប្រជាពលរដ្ឋនៅកោះភូកេតភាគខាងត្បូងប្រទេសថៃ បានទទួលថ្នាំបង្ការរួចហើយ តាមរយៈយុទ្ធនាការចាក់ថ្នាំបង្ការថ្នាក់មូលដ្ឋាន ដោយប្រើវ៉ាក់សាំងចិន។បើតាមផែនការរបស់ក្រសួងសុខាភិបាលថៃ ពីពេលនេះរហូតដល់ខែកញ្ញា ប្រជាពលរដ្ឋចំនួន ៧០% នឹងទទួលបានវ៉ាក់សាំង យ៉ាងហោចណាស់ ម្នាក់មួយដូសដំបូងដែរ។ ហើយចាប់ពីខែកញ្ញាទៅ ទើបថៃអនុញ្ញាតឱ្យនាំចេញវ៉ាក់សាំងកូវីដ១៩ ដែលក្រុមហ៊ុនថៃបានទទួលសិទ្ធិពីក្រុមហ៊ុន AstraZeneca ផលិតនៅក្នុងស្រុក សម្រាប់ចែកចាយទៅបរទេស៕ Reuters
