ប្រធានភ្នាក់ងារសន្តិសុខផ្ទៃក្នុងអ៊ីស្រាអែល បានធ្វើការប្រាប់ឱ្យប្រុងប្រយ័ត្នជាមុន កាលពីថ្ងៃសៅរ៍ ទី៥ ខែមិថុនា អំពីអំពើហិង្សាដែលអាចកើតឡើង អំឡុងពេលដែលភាពតានតឹងនយោបាយបានកើនឡើងយ៉ាងខ្លាំង ខណៈលោកនាយករដ្ឋមន្ត្រី Benjamin Nethanyahu ប្រឈមនឹងការធ្លាក់ពីតំណែង។ ការគ្រប់គ្រងរយៈពេល ១២ ឆ្នាំរបស់លោក Nethanyahu នឹងត្រូវបានបញ្ចប់ បន្ទាប់មេដឹកនាំបក្សប្រឆាំងលោក Yair Lapid បានប្រកាសកាលពីថ្ងៃពុធថា លោកបានជោគជ័យក្នុងការបង្កើតរដ្ឋាភិបាលថ្មី។ លោក Nethanyahu បាននិយាយថា រដ្ឋាភិបាលថ្មីនេះ ដែលមិនទាន់បានធ្វើពាក្យសម្បថចូលកាន់អំណាច គឺជា «រដ្ឋាភិបាលឆ្វេងនិយមដ៏គ្រោះថ្នាក់» ហើយអាចប៉ះពាល់ដល់ស្ថិរភាព និងសន្តិសុខជាតិ។ ក្រុមស្តាំនិយមខ្លះ បានបញ្ចេញកំហឹងទៅកាន់លោក Naftali Bennett ដែលជាប្រធានគណបក្សជាតិនិយមតូចមួយ និងត្រូវបានគេរំពឹងថា នឹងក្លាយជានាយករដ្ឋមន្ត្រីក្រោមកិច្ចព្រមព្រៀងចែករំលែកអំណាច ជាមួយលោក Lapid ដោយសារ មុនពេលបោះឆ្នោតលោក Bennett បានធ្វើការសន្យាថា នឹងមិនចូលរួមក្នុងរដ្ឋាភិបាលចម្រុះ ជាមួយលោក Lapid ឬ គណបក្សជនជាតិអារ៉ាប់ទេ។ លោក Bennett បានទទួលសារគំរាមកំហែងហិង្សាលើខ្លួនលោកជាច្រើន នៅលើបណ្ដាញសង្គម។ នៅក្នុងសេចក្ដីថ្លែងការណ៍មួយ លោក Nadav Argaman ប្រធានភ្នាក់ងារសន្តិសុខ Shin Bet ថា៖ «ថ្មីៗនេះ យើងបានរកឃើញការកើនឡើងនូវសុន្ទរកថា ហិង្សានិយម និងញុះញង់ ដែលកាន់តែខ្លាំងឡើង ជាពិសេសនៅក្នុងបណ្ដាញសង្គម»។ លោកបានបន្តទៀតថា៖ «សុន្ទរកថាបែបនេះ អាចត្រូវបានក្រុម ឬ បុគ្គលមួយចំនួនយល់ឃើញថា ជាការអនុញ្ញាតឱ្យមានសកម្មភាពហិង្សា និងខុសច្បាប់ ដែលអាចបង្កអន្តរាយដល់រាងកាយផងដែរ»។ ចាប់តាំងពីលោក Bennett បានប្រកាសថា លោកបានចូលរួមជាមួយលោក Lapid ភ្នាក់ងារសន្តិសុខបានបង្កើនការការពារលោក ខណៈក្រុមស្ដាំនិយមធ្វើបាតុកម្មនៅគេហដ្ឋានរបស់លោក និងសមាជិកបក្សលោក៕ AFP
