ទស្សនកិច្ចរបស់សមាជិកព្រឹទ្ធសភាអាមេរិកនៅតៃវ៉ាន់ ជាមួយនឹងការសន្យាផ្តល់ជំនួយវ៉ាក់សាំង ចំនួន ៧៥០ ០០០ដូស

0
308

កាលពី​ថ្ងៃ​អាទិត្យ ទី៦ ខែមិថុនា សមាជិក​ព្រឹទ្ធសភា​អាមេរិក​ចំនួន ៣នាក់ ក្នុង​នោះ មាន ២នាក់ ​មក​ពី​គណបក្ស​ប្រជាធិបតេយ្យ និង​ម្នាក់មក​ពី​គណបក្ស​សាធារណរដ្ឋ ​បាន​ទៅ​ដល់​ទឹកដី​តៃវ៉ាន់ ​តាម​ជើង​យន្តហោះ​យោធា។ គណៈប្រតិភូ​អាមេរិក​ទាំង ៣រូប បាន​ប្រកាស​ពី​ការ​ផ្តល់​ជំនួយ​វ៉ាក់សាំង​ឲ្យ​តៃវ៉ាន់ ​ចំនួន ៧៥០ ០០០ដូស  ខណៈ​ដែល​តៃវ៉ាន់​កំពុង​ប្រឈម​នឹង​សន្ទុះ​កំណើន​ករណី​ឆ្លង​កូវីដ១៩ និង​ចំ​ពេល​ដែល​តៃវ៉ាន់​កំពុង​ខ្វះ​វ៉ាក់សាំង។ ​នៅ​អាកាសយានដ្ឋាន ​សុងឆាន ​ក្នុង​ទីក្រុង​តៃប៉ិក ​ដែល​យន្តហោះ​យោធា ​មួយ​គ្រឿង ​ដឹក​សមាជិក​ព្រឹទ្ធសភា​អាមេរិក ​ចំនួន ៣រូប​ បាន​ចុះ​ចត គឺ​លោកស្រី Tammy Duckworth លោក Christopher Coons និង​លោក Dan Sullivan។ លោកស្រី Tammy Duckworth បានថ្លែងថា « យើង​នៅ​ទី​នេះ ​ក្នុង​នាម​ជា​មិត្ត​របស់​តៃវ៉ាន់ ព្រោះ​យើង​ដឹង​ថា​សព្វថ្ងៃ តៃវ៉ាន់​កំពុង​ប្រឈម​នឹង​ការ​លំបាក​ជា​ច្រើន។ នេះ​ហើយ​ជា​ហេតុផល​សំខាន់​នៃ​វត្តមាន​របស់​យើង​ទាំង ៣នាក់ ​មក​ពី​គណបក្ស​ទាំង​ពីរ»។ ​ក្នុង​រយៈពេល​ប៉ុន្មាន​សប្តាហ៍​ចុង​ក្រោយ​នេះ ចំនួន​ករណី​ឆ្លង​បាន​ស្ទុះ​ឡើង​គួរ​ឲ្យ​ព្រួយបារម្ភ ​ដែល​មាន​ប្រមាណ ១០ ០០០នាក់ និង​​ស្លាប់ ១៦៦នាក់ ​គិត​ត្រឹម​ថ្ងៃ​អាទិត្យ ទី៦ ខែមិថុនា។ ទាក់ទង​នឹង​វ៉ាក់សាំង តៃវ៉ាន់​ដែល​មាន​ពលរដ្ឋ​ចំនួន ២៣លាន​កន្លះ​នាក់ ​ទើប​ទទួល​បាន​វ៉ាក់សាំង AstraZeneca តែ​ចំនួន ៧២៦ ៦០០ដូស និង​វ៉ាក់សាំង Moderna ចំនួន ១៥០ ០០០ដូសប៉ុណ្ណោះ។ ភាព​យឺតយ៉ាវ​នៃ​ការ​ទទួល​វ៉ាក់សាំង ​ត្រូវ​បាន​តៃវ៉ាន់​ចង្អុល​មុខ និង​ទម្លាក់​ការ​ទទួល​ខុស​ត្រូវ​ដាក់​ចិនដីគោក។ គួរ​រម្លឹក​ថា អាមេរិក​បាន​ផ្តាច់​ទំនាក់ទំនង​ការទូត​ ជា​មួយ​តៃវ៉ាន់​ ក្នុង​ឆ្នាំ ១៩៧៩ ដើម្បី​ទទួល​ស្គាល់​ចិនដីគោក​ជា​តំណាង​ចិន​ផ្លូវការ​តែ​មួយ។ តែ​ក្នុង​ពេល​ជាមួយ​គ្នា អាមេរិក​បន្ត​ស្ថិត​ជា​មិត្ត​ចាក់ទឹកមិនលេច​របស់​តៃវ៉ាន់ និង​ជា​អ្នក​ផ្គត់ផ្គង់​អាវុធ​ទី១ ឲ្យ​តៃវ៉ាន់។ ក្រៅ​ពី​អាមេរិក ជប៉ុន​ក៏​បាន​ប្រកាស​កាលពី​ថ្ងៃ​សុក្រ ទី៤ ខែមិថុនា ​ពី​ការ​ផ្តល់​ជំនួយ​វ៉ាក់សាំង AstraZeneca ចំនួន ១,២លាន​ដូស ​ឲ្យ​តៃវ៉ាន់៕ AFP

LEAVE A REPLY

Please enter your comment!
Please enter your name here