ប្រធានាធិបតីស៊ីរីលោក បាសា អាល់-អាសាដ បានឈ្នះអាណត្តិទី៤ ដោយទទួលបានសំឡេងគាំទ្រ ៩៥,១% នៅក្នុងការបោះឆ្នោតមួយ ដែលក្រុមប្រឆាំង និងប្រទេសលោកខាងលិច បាននិយាយថា ជាការក្លែងបន្លំ។ រដ្ឋាភិបាលរបស់លោក អាសាដ និយាយថា ការបោះឆ្នោតកាលពីថ្ងៃពុធ បង្ហាញថា ប្រទេសស៊ីរី កំពុងដំណើរការជាធម្មតា ទោះបីជាមានសង្គ្រាមស៊ីវិលអាយុកាល ១ ទសវត្សរ៍ក្តី ដែលបានសម្លាប់មនុស្សរាប់សែននាក់ និងបានជម្លៀសមនុស្សចំនួន ១១ លាននាក់ ដែលប្រហែលជាងពាក់កណ្ដាលចំនួនប្រជាជនសរុប។ ប្រធានសភាស៊ីរីលោក Hammouda Sabbagh បានប្រកាសលទ្ធផលនៅក្នុងសន្និសីទសារព័ត៌មានមួយ កាលពីថ្ងៃព្រហស្បតិ៍ ទី២៧ ខែឧសភា ដោយនិយាយថា ចំនួនអ្នកទៅបោះឆ្នោតមានប្រមាណ ៧៨ ភាគរយ ដែលស្មើនឹងប្រជាជនស៊ីរីជាង ១៤ លាននាក់។ គូប្រជែងការបោះឆ្នោតលោក អាសាដ គឺអតីតអនុរដ្ឋមន្ត្រីទីស្ដីការគណៈរដ្ឋមន្ត្រីលោក Abdallah Saloum Abdallah និងលោក Mahmoud Ahmed Marei ប្រធានគណបក្សប្រឆាំងតូចមួយ ដែលត្រូវបានអនុម័តឱ្យឈរឈ្មោះជាផ្លូវការ។ លោក Marei ទទួលបានសំឡេងគាំទ្រ ៣,៣ ភាគរយ ខណៈដែលលោក Saloum ទទួលបាន ១,៥%។ រដ្ឋមន្ត្រីការបរទេស បារាំង អាល្លឺម៉ង់ អ៊ីតាលី អង់គ្លេស និងសហរដ្ឋអាមេរិក បានធ្វើការរិះគន់នៅក្នុងសេចក្ដីថ្លែងការណ៍មួយថា ការបោះឆ្នោតនេះ គឺមិនសេរី ឬ យុត្តិធម៌ទេ។ តួកគី ដែលជាសត្រូវរបស់លោក អាសាដ ក៏បាននិយាយផងដែរថា ការបោះឆ្នោតនេះ គឺខុសច្បាប់៕ AFP
