អាជ្ញាធរអាកាសចរណ៍ស៊ីវិលវៀតណាម បានសម្រេចថា ចាប់ពីថ្ងៃទី១ ខែមិថុនានេះទៅ នឹងផ្អាកលែងឲ្យជើងហោះហើរអន្តរជាតិ ចុះចតនៅព្រលានយន្តហោះក្រុងហាណូយ រយៈពេល មួយសប្តាហ៍។ ចំណែកនៅទីក្រុងហូជីមីញវិញ វិធានការនេះនឹងបន្តអនុវត្ត រហូតដល់ថ្ងៃទី១៧ ខែមិថុនា។ អាជ្ញាធរវៀតណាមកំពុងព្យាយាមទប់ស្កាត់ការឆ្លងរាលដាលកូវីដ១៩ ទំរង់បំប្លែងខ្លួន កូនកាត់ឥណ្ឌា និងអង់គ្លេស ដែលអ្នកជំនាញជឿថា មានកម្លាំងឆ្លងរាលដាល យ៉ាងលឿនរហ័ស។ ចាប់ពីថ្ងៃទី១ ដល់ថ្ងៃទី៧ ខែមិថុនា ការចុះចតរបស់យន្តហោះ ជើងហោះហើរអន្តរជាតិ នៅព្រលានយន្តហោះ Noi Bai ទីក្រុងហាណូយ នឹងត្រូវហាមឃាត់។ ក៏ប៉ុន្តែជើងហោះហើរអន្តរជាតិ ដែលចាកចេញពីហាណូយ មិនជាប់ក្នុងបំរាមនេះទេ។ ដោយឡែក នៅព្រលានយន្តហោះអន្តរជាតិ ក្រុងហូជីមិញ វិធានការផ្អាកការចុះចត ដែលត្រូវចប់នៅថ្ងៃទី៤ ខែមិថុនា ត្រូវបានអាជ្ញាធរអាកាសចរណ៍ស៊ីវិលវៀតណាម សម្រេចបន្តអនុវត្ត រហូតដល់ថ្ងៃទី១៤ ខែមិថុនា។ សូមបញ្ជាក់ថា បច្ចុប្បន្ននេះ វៀតណាមកំពុងតែប្រឈមនឹងរលកឆ្លងរាលដាលកូវីដ១៩ យ៉ាងលឿនរហ័ស ទោះបីជាមានវិធានការរិតបន្តឹង ដាក់កំហិតឲ្យអ្នកដំណើរដែលមកដល់វៀតណាមតាមយន្តហោះ ត្រូវធ្វើចត្តាឡីស័កក្តី។ ទីក្រុងហូជីមិញ និងទីក្រុងហាណូយ រួមទាំងតំបន់ឧស្សាហកម្មនៅជាយក្រុង ត្រូវបានគេរកឃើញករណីវិជ្ជមានច្រើនបំផុត នាប៉ុន្មានថ្ងៃចុងក្រោយនេះ។ កាលពីថ្ងៃចន្ទ អភិបាលរងក្រុងហូជីមិញ បានអះអាងថា អាជ្ញាធរនឹងផ្តោតការយកចិត្តទុកដាក់ ធ្វើតេស្តប្រមូលសំណាក នៅតាមតំបន់ដែលប្រឈមខ្លាំងបំផុត។ មនុស្សប្រមាណ ៦៧ម៉ឺននាក់ នៅតាមតំបន់ទាំងនេះ ត្រូវដាក់ឲ្យធ្វើចត្តាឡីស័ក។ មនុស្សប្រមាណ ១លាននាក់ នៅក្រុងហូជីមិញ នឹងត្រូវគេធ្វើតេស្តយកសំណាក។ គិតត្រឹមព្រឹកថ្ងៃទី១ ខែមិថុនា ឆ្នាំ២០២១ ចំនួនអ្នកវិជ្ជមានកូវីដ១៩ នៅវៀតណាម មានសរុប ៧ ៤៣២នាក់ ហើយក្នុងនោះ មានស្លាប់ ៤៧នាក់៕ AFP
