អង្គការ​សិទ្ធិ​មនុស្ស​ថា ​ច្បាប់​របស់​ថៃ​ស្ដីពី​អង្គការ​ក្រៅ​រដ្ឋាភិបាល ​ជា «ការ​គំរាម​កំហែង»

0
86

ក្រុម​​តស៊ូ​មតិ​ផ្នែក​សិទ្ធិ​មនុស្ស​បាន​ព្រមាន​ថា ច្បាប់​ថ្មី​មួយ​ដែល​រដ្ឋាភិបាល​ថៃ​កំពុង​តាក់តែង ​​ដើម្បី​ដាក់​កំហិត​លើ​អង្គការ​មិន​ស្វែងរក​ប្រាក់​កម្រៃ នឹង​បង្ក​ជា «ការ​គំរាម​កំហែង» ចំពោះ​កិច្ចការ​របស់​អង្គការ​ការពារ​សិទ្ធិ​មនុស្ស​នានា​នៅ​ក្នុង​ប្រទេស​ថៃ ហើយ​អាចបង្ក​ឲ្យ​អង្គការ​មួយ​ចំនួន​ត្រូវ​បិទ​ទ្វារ ឬ ​ចាកចេញ​ពី​ប្រទេស​នេះ។ សំណើ​ច្បាប់​នេះ បាន​តម្រូវ​ឲ្យ​អង្គការ​មិន​ស្វែងរក​ប្រាក់​កម្រៃ​ទាំង​អស់ ​ចុះ​បញ្ជី​ជាមួយ​រដ្ឋាភិបាល ប្រកាស​អំពី​ប្រភព​នៃ​ថវិកា​របស់​ខ្លួន​ទាំង​អស់​ជា​រៀងរាល់​ឆ្នាំ ប្រកាស​អំពី​របៀប​ដែល​ពួកគេ​ចំណាយ​ថវិកា​ទាំង​នោះ និង​ប្រគល់​របាយការណ៍​សវនកម្ម ​និង​ឯកសារ​ប្រកាស​ពន្ធ​ប្រចាំ​ឆ្នាំ​ឲ្យ​រដ្ឋាភិបាល។ មេដឹកនាំ​នៃ​អង្គការ​ណា ​ដែល​មិន​បាន​ចុះ​បញ្ជី ​អាច​ប្រឈម​នឹង​ការ​ជាប់​ពន្ធនាគារ ​រហូត​ដល់​ទៅ ៥ ឆ្នាំ។ សំណើ​ច្បាប់​នេះ ​ក៏​នឹង​អនុញ្ញាត​ផងដែរ ​ឲ្យ​ក្រសួង​មហាផ្ទៃអាច​ចូល​ទៅ​ក្នុង​ការិយាល័យ​របស់​អង្គការ​ទាំង​នោះ បាន​គ្រប់​ពេល​ទាំង​អស់ និង​ប្រមូល​យកឯក​សារ​​នានា​ ដោយ​មិន​ចាំបាច់​មាន​ដីកា​បង្គាប់​ពី​តុលាការ។ ជាង​នេះ​ទៀត សំណើ​ច្បាប់​នេះ ​បាន​បញ្ជាក់​ថា អង្គការ​មិន​ស្វែងរក​ប្រាក់​កម្រៃ ​អាច​ចំណាយ​ថវិកា​ដែល​បាន​មកពី​បរទេស ​សម្រាប់​តែ​កិច្ចការ​ណា «ដែល​ក្រសួង​មហាផ្ទៃ​អនុញ្ញាត​ឲ្យ» តែ​ប៉ុណ្ណោះ។ សំណើ​ច្បាប់​នេះ​បាន​ធ្វើ​ឡើង បន្ទាប់ពី​មាន​រលក​នៃ​ការ​ប្ដឹងផ្ដល់ ​និង​ការ​ចាប់​ខ្លួន​អ្នក​រិះគន់​រដ្ឋាភិបាល ​និង​អ្នក​រិះគន់​ស្ថាប័ន​ព្រះមហាក្សត្រ​ដ៏​មាន​ឥទ្ធិពល ​នៅ​ក្នុង​ប្រទេស។ អ្នក​រិះគន់​ទាំង​នោះ​រង​ការ​ចោទ​ប្រកាន់​ពី​បទ​ញុះញង់ ​ឲ្យ​មាន​ការ​បះបោរ និង​បទ​ប្រមាថ​រាជរង្សានុវង្ស​ព្រះមហាក្សត្រ ជា​បទ​ឧក្រិដ្ឋ​ដែល​អាច​ធ្វើ​ឲ្យ​អ្នក​ប្រព្រឹត្តិ​ខុស​ជាប់​ពន្ធនាគារ ​រហូត​ដល់​ទៅ ១៥ ឆ្នាំ៕ AFP

LEAVE A REPLY

Please enter your comment!
Please enter your name here