រដ្ឋាភិបាលរុស្សីបាននិយាយកាលពីថ្ងៃអង្គារថា ខ្លួនសោកស្តាយ ដែលយន្តហោះរបស់សហភាពអឺរ៉ុបនឹងបើកវាងដែនអាកាសរបស់ប្រទេសបេឡារុស បន្ទាប់ពីមានការបង្ខំឲ្យចុះចតយន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ Ryanair ដែលមានដឹកសកម្មជនប្រឆាំងរបស់បេឡារុសម្នាក់នៅលើនោះ។ យន្តហោះ Ryanair ដែលធ្វើដំណើរចេញពីក្រុង Athens ប្រទេសក្រិក ទៅកាន់ទីក្រុង Vilnius ប្រទេសលីទុយអានី ត្រូវបានបង្ខំឲ្យចុះចតក្នុងរដ្ឋធានី Minsk របស់ប្រទេសបេឡារុស បន្ទាប់ពីមានការគំរាមថា មានគ្រាប់បែក។ ការបង្ខំឲ្យយន្តហោះនេះចុះចតក្នុងប្រទេសបេឡារុស បានបង្កើតឲ្យមានកំហឹងយ៉ាងខ្លាំងពីប្រទេសជាច្រើននៅលើពិភពលោក ហើយក្រុមហ៊ុនអាកាសចរណ៍ក្នុងសហភាពអឺរ៉ុប បានសម្រេចបើកវាងដែនអាកាសប្រទេសបេឡារុស ដោយមេដឹកនាំសហភាពអឺរ៉ុប បានព្រមានពីការដាក់ទណ្ឌកម្មថ្មីៗប្រឆាំងនឹងប្រទេសនេះ។ អ្នកនាំពាក្យរដ្ឋាភិបាលរុស្សីលោក Dmitry Peskov បានប្រាប់ក្រុមអ្នកសារព័ត៌មានថា៖ «យើងគ្រាន់តែសម្តែងការសោកស្តាយប៉ុណ្ណោះ ដោយសារដែនអាកាសបេឡារុស ជាប្រទេសធំគ្រាន់បើមួយស្ថិតចំកណ្តាលទ្វីបអឺរ៉ុប»។ លោកបន្ថែមទៀតថា៖ «ចុងក្រោយបំផុត ផែនការនេះនឹងធ្វើឲ្យអ្នកដំណើរអស់លុយច្រើន ដោយយន្តហោះត្រូវជិះផ្លូវវាង បន្ថែមកន្លះម៉ោង ឬ មួយម៉ោងទៀត»។ ប្រធានាធិបតីបេឡារុសលោក Alexander Lukashenko និងសម្ព័ន្ធមិត្តរបស់លោក កំពុងរងទណ្ឌកម្មរបស់អាមេរិក និងសហភាពអឺរ៉ុប ចំពោះចំណាត់ការរបស់លោកទៅលើការធ្វើបាតុកម្មប្រឆាំង ដែលកើតមានពាសពេញផ្ទៃប្រទេស ដើម្បីប្រឆាំងនឹងលទ្ធផលបោះឆ្នោតប្រធានាធិបតី កាលពីខែសីហា ឆ្នាំ២០២០៕ AFP
