UN​ និង​អ៊ីរ៉ង់​ព្រមព្រៀង​គ្នា​បន្ត​​ការ​ត្រួត​ពិនិត្យ​កម្មវិធី​អាវុធ​នុយក្លេអ៊ែរ

0
69

ក្រុម​អ្នក​ត្រួត​ពិនិត្យ​អាវុធ​នុយក្លេអ៊ែរ​របស់​អង្គការ​សហប្រជាជាតិ ​និង​ប្រទេស​អ៊ីរ៉ង់​បាន​ព្រមព្រៀង​គ្នា​ បន្តការ​ត្រួត​ពិនិត្យនូវ​សកម្មភាព​អាវុធ​នុយក្លេអ៊ែរ​របស់​ប្រទេស​អ៊ីរ៉ង់​ សម្រាប់​រយៈ​ពេល​មួយ​ខែ​ទៀត។ លោក Rafael Grossi អគ្គនាយកទីភ្នាក់ងារ​ថាមពល​បរមាណូអន្តរជាតិ​បាន​ប្រាប់​ក្រុម​អ្នក​សារព័ត៌មាន​កាលពី​ថ្ងៃ​ចន្ទ​ម្សិលមិញ​ថា៖ ឧប ករណ៍​ និង​ការ​ផ្ទៀងផ្ទាត់ ​ហើយ​និង​សកម្មភាពត្រួត​ពិនិត្យ​ដែល​យើង​បាន​ព្រមព្រៀង​គ្នា នឹង​បន្ត​សកម្មភាព​ ​ក្នុង​រយៈ​ពេល​មួយ​ខែ​ខាង​មុខ​ទៀត​ដែល​នឹងត្រូវផុត​កំណត់នៅ​ថ្ងៃ​ទី​២៤ ខែ​មិថុនា​ ឆ្នាំ​២០២១​ខាង​មុខ​នេះ។ ការ​បន្តរយៈ​ពេល​មួយ​ខែ​នេះ​ កើត​មាន​ឡើង​ស្រប​ពេលដែល​កំពុង​មាន​ការ​ចរចា​គ្នា​ដើម្បី​ស្តារ​ឡើង​វិញនូវ​កិច្ច​ព្រមព្រៀង​អន្តរជាតិ​ឆ្នាំ​២០១៥ ដែល​បានកម្រិត​កម្មវិធី​អាវុធ​នុយក្លេអ៊ែររបស់​អ៊ីរ៉ង់​ជា​ថ្នូរ​នឹង​ការលើកលែង​ការ​ដាក់​ទណ្ឌកម្ម​មក​លើ​ប្រទេស​នេះ។ រដ្ឋមន្ត្រី​ការបរទេស​អ៊ីរ៉ង់​លោក Mohammad Javad Zarif បាន​និយាយ​ថ្ងៃ​ចន្ទ​ម្សិល​មិញ​ថា ការ​ដក​ចេញ​នូវ​ទណ្ឌកម្ម​អាមេរិកដែលបាន​ដាក់​មក​លើ​អ៊ីរ៉ង់នៅក្រោម​អតីតរដ្ឋបាល​​ប្រធានាធិបតីអាមេរិក​លោក Donal​d Trump នោះ​គឺ​ជា «កាតព្វកិច្ច​សីលធម៌ ​និង​ផ្លូវ​ច្បាប់​មួយ» ហើយ​មិន​មែនជាអ្វី​សម្រាប់​ប្រើ​ប្រាស់ក្នុង​ការ​ដាក់​សម្ពាធទៅ​លើ​ការ​ចរចា​នោះ​​ទេ។ រដ្ឋមន្ត្រី​ការបរទេស​អាមេរិក​លោក Blinken បាន​ប្រាប់​កម្មវិធី​ប្រចាំ​សប្តាហ៍​របស់បណ្តាញ​ទូរទស្សន៍​«ABC This Week» ថា៖ «ខ្ញុំ​គិត​ថា អ៊ីរ៉ង់ដឹង​ថា ខ្លួន​ត្រូវ​ធ្វើ​អ្វីក្នុង​ការ​វិលត្រឡប់​មក​រកការ​អនុវត្ត​នូវ​កិច្ចព្រមព្រៀង​អាវុធ​នុយក្លេអ៊ែរ​នោះ។ ហើយ​អ្វី​ដែល​យើង​នៅ​មិន​ទាន់​បាន​ឃើញ​នៅ​ឡើយ​នោះ​គឺ​ថា​តើ​អ៊ីរ៉ង់​ មាន​ការ​ត្រៀម​ខ្លួន​រួច​ហើយ​ឬ​នៅ​ ហើយ​មាន​សុឆន្ទៈ​ក្នុង​ការ​សម្រេច​ចិត្តធ្វើ​អ្វី​ដែល​ខ្លួន​ត្រូវ​ធ្វើ​នោះ​ឬ​យ៉ាង​ណា។ AP

LEAVE A REPLY

Please enter your comment!
Please enter your name here