លោក ឡាក់ ប៊ុ​ន​ធី​ម ត្រូវ​បញ្ចប់​តួនាទី​ នាយករង​រដ្ឋបាល​សាលាក្រុង​ច្បារមន​ ​រឿង​ទាត់​កញ្ច្រែង​លក់​ព្រីង​ក្មេង​ស្រី​ម្នាក់

0
359

ខេត្តកំពង់ស្ពឺ ៖ ករណី​សន្តិសុខ​ផ្សារ​កំពង់ស្ពឺ បាន​ទាត់​កញ្ច្រែង​ក្មេង​ស្រី​ម្នាក់​លក់​ព្រីង បណ្ដាល​ឲ្យ​កំពប់​ទៅ​លើ​ដី​កាលពី​ថ្ងៃ​ទី​១៩ ខែឧសភា​នោះ ការ​ពិត​គឺជា​លោក ឡាក់ ប៊ុ​ន​ធី​ម នាយករង​រដ្ឋបាល​សាលាក្រុង​ច្បារមន ត្រូវ​បាន​លោក​អភិបាលក្រុងច្បារមន សម្រេច​បញ្ចប់​តួនាទី​ភារកិច្ច នៅ​ថ្ងៃ​ទី​២១ ឧសភា ឆ្នាំ​២០២១​នេះ​ហើយ ។

លោក វ៉ី សំណាង អភិបាលខេត្ត​កំពង់ស្ពឺ បានអោយ​ដឹង​ថា «​នេះ​ក្នុង​នាម​ថ្នាក់ដឹកនាំ​ខេត្ត មិន​គាំទ្រ​ចំពោះ​ទ​ង្វើ​របស់​មន្ត្រី ដែល​យក​តួនាទី​ភារកិច្ច ទៅ​អនុវត្ត​ខុស​វិជ្ជាជីវៈ ខុស​ក្រមសីលធម៌ រហូត​ធ្វើ​ឲ្យ​ប្រជាពលរដ្ឋ​ស្លូតត្រង់​ស្រក់​ទឹកភ្នែក​នោះ​ឡើយ ។ ក្នុង​ន័យ​នេះ ខ្ញុំ​ក៏​សូម​អំពាវនាវ​យ៉ាង​ទទូច ដល់​ពុក​ម៉ែ​មាមីង​បងប្អូន​ទាំងអស់ ដែល​ប្រកប​របរ​រក​ទទួលទាន សូម​មេត្តា​ស្ដាប់​តាម​ការ​ណែនាំ​របស់​អាជ្ញាធរ ដើម្បី​ធ្វើ​យ៉ាងណា យើង​អាច​រក្សា​បាន​នូវ​សណ្ដាប់ធ្នាប់​សាធារណៈ ដែល​បង្ក​ឡើង​ដោយ​ភាព​អាណា​ធិ​ប​តេ​យ្យ​របស់​បងប្អូន​យើង​មួយ​ចំនួន​តូច ។ សូម​អរគុណ​!» ។

សូម​រំលឹក​ថា កាលពី​ថ្ងៃ​ទី​១៩ ក្មេង​ស្រី​ក្រីក្រ សុំ​មិន​បញ្ចេញ​ឈ្មោះ រស់នៅ​ក្រុង​ច្បារមន បាន​យក​ព្រីង​និង​ខ្នុរ ទៅ​លក់​នៅ​ក្រៅ​បរិវេណ​ផ្សារ​កំពង់ស្ពឺ គាប់​ជួន​ក្រុម​សន្តិសុខ​មក​ដេញ​អោយទៅ​លក់​នៅ​កន្លែង​ថ្មី តែ​នាង​រៀបចំ​មិន​ទាន់​ធ្វើ​អោយ សន្តិសុខ​ខឹង​ក៏​ទាត់​ថាស​ព្រីង និង​ខ្នុរ​បណ្តាល​អោយ​កំពប់​អស់ ត្រូវ​បាន​មហាជន​ថត ហើយ​យក​មក​បង្ហោះ​សុំ​អន្តរាគមន៍ ចំពោះ​អំពើ​អ​សីលធម៌​របស់​សន្តិសុខ​ផ្សារ ដែល​ធ្វើ​ដាក់​ក្មេង​ស្រី​រង​គ្រោះ ។

ករណី​នេះ ក៏​មានការ​រិះគន់​ផង​ដែរ​ទៅ​លើ​ក្រុម​សន្តិសុខ​ថា «​បេះដូង​ក្រុម​សណ្តាប់ធ្នាប់​នៅ​ផ្សារ​កំពង់ស្ពឺ​ដែល​ទៅ​ទាត់​ថាស លក់​ផ្លែ​ឈើ​របស់​ប្អូនស្រី​ដែល​គាត់​លក់​បន្តិចបន្តួច ដើម្បី​រស់​ចោល​បែប​នេះ តើ​បេះដូង​ក្រុម​មនុស្ស​ទាំងនោះ​សាង​មក​ពី​អ្វី ហេតុ​អ្វី​បានជា​មានចិត្ត និង​បេះដូង​ឃោរឃៅ​ខ្មៅ​យ៉ាងនេះ​ទៅ​វិញ ៕

LEAVE A REPLY

Please enter your comment!
Please enter your name here