ករណី​ពុល​ស្រា​ស្លាប់​១២​នាក់​នៅ​ស្រុក​ល្វាឯម គឺ​ដោយសារ​ស្រាស និង ស្រាថ្នាំ​មាន​សារជាតិ​មេ​តា​ណុល​ខ្ពស់​

0
314

កណ្តាល​:​ករណី​ពុល​ស្រា​ស្លាប់​១២​នាក់ នៅ​ស្រុក​ល្វាឯម ខេត្តកណ្តាល ក្រសួងសុខាភិបាល​បាន​បញ្ជាក់ថា គឺ​ដោយសារ​ស្រាស ឬ​ស្រាថ្នាំ ដែល​ជនរងគ្រោះ​ពិសា​មាន​សារជាតិ​មេ​តា​ណុល​ខ្ពស់ ។​

​យោងតាម​សេចក្តីប្រកាស​ព័ត៌មាន​របស់​ក្រសួងសុខាភិបាល​នៅ​ថ្ងៃទី​២០ ខែឧសភា​ឆ្នាំ​២០២១​នេះ​បានឱ្យដឹងថា លទ្ធផល​ពី​មជ្ឈមណ្ឌល​ជាតិ​មន្ទីរពិសោធន៍​សុខាភិបាល នៅ​ថ្ងៃទី​១៩ ខែឧសភា​បង្ហាញថា មន្ទីរពិសោធន៍​ទទួលបាន សំណាក​ស្រា​២៨​សំណាក ក្នុងនោះ​ស្រាថ្នាំ​១៥​សំណាក ស្រាស​១៣​សំណាក​ដែលមាន​សារធាតុ​មេ​តា​ណុល (Meliari) លើស កម្រិត​ធំ​ជាង​០,៥​ភាគរយ​( >០,៥​ភាគរយ ) មាន​ចំនួន​២០​សំណាក ដែល​ធ្វើឱ្យពុល​ដែល​កម្រិត​មិន​ពុល​នោះ មិនត្រូវ​លើសពី​០,១​ភាគរយ ឡើយ​។​

​ពាក់ព័ន្ធ​នឹង​ករណី​ខាងលើ​ក្រសួងសុខាភិបាល​សន្និដ្ឋាន​ថា ហេតុការណ៍​ស្លាប់​នៅ​ភូមិ​ទាំងពីរ​ខាងលើ បានកើត​ឡើង ដោយសារ​ពួកគាត់​បាន​ពិសា​ស្រាស ឬ ស្រាថ្នាំ​ដែលមាន​សារជាតិ​មេ​តា​ណុល​ខ្ពស់​។​

​ក្រសួង​សុខ​ភិ​បាល​ក៏បាន​អំពាវនាវ​ឱ្យ​ប្រជាពលរដ្ឋ​បញ្ឈប់​ជាបន្ទាន់​នូវ​ការ​ពិសា​ស្រាស ឬ​ស្រាថ្នាំ​ដែល​ផលិត​ដោយ មិនមាន​បច្ចេកទេស​ត្រឹមត្រូវ ជាពិសេស​ស្រា​ដែល​យក​មេ​តា​ណុល​មក​លាយ ( ហាម​ដាច់ខាត​)​។​បើ​នៅតែ​បន្ត​ពិសា​ស្រាស ឬ​ស្រាថ្នាំ​ទាំងនេះ​ទៀត​នោះ នឹង​បណ្តាល​ឲ្យ​ប៉ះពាល់ ដល់​សុខភាព​ទៅជា​ឈឺ ឬ​អាច​បាត់​បង់ជីវិត​។​ប្រសិនបើ​បងប្អូន មាន​បញ្ហា​សុខភាព ឬ​ជំងឺ​សូម ប្រញាប់​ទៅកាន់ មណ្ឌល​សុខភាព​ឬ​មន្ទីរពេទ្យ​ដែល​នៅ​ជិត​បំផុត ៕​

ប្រភព : រស្មីកម្ពុជា

LEAVE A REPLY

Please enter your comment!
Please enter your name here