ប្រធានាធិបតីហ្វីលីពីនលោក Rodrigo Duterte បានរារាំងគណៈរដ្ឋមន្រ្តីរបស់លោកមិនឲ្យនិយាយជាសាធារណៈអំពីបញ្ហាសមុទ្រចិនខាងត្បូងទេ ប៉ុន្តែបាននិយាយថា បទបញ្ជានេះមិនមែនមានន័យថា ប្រទេសហ្វីលីពីនកំពុងវង្វេងស្មារតីមិនការពារសិទ្ធិអធិបតេយ្យភាពរបស់ខ្លួននោះទេ ។ ការសម្រេចរបស់លោកធ្វើឡើងបន្ទាប់ពីមានការរិះគន់ពីប្រទេសចិនជាច្រើនសប្តាហ៍ ដោយរដ្ឋមន្ត្រីរបស់លោកបានលើកឡើងអំពីនាវានេសាទចិនរាប់រយគ្រឿងនៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីន ដែលកំពុងបង្កភាពតានតឹងប្រឆាំងនឹងគោលនយោបាយរបស់លោក Duterte ។ លោក Duterte បាននិយាយតាមទូរទស្សន៍អំពីតំបន់សេដ្ឋកិច្ចផ្តាច់មុខរបស់ហ្វីលីពីនថា «នេះជាបទបញ្ជារបស់ខ្ញុំ។ គណៈរដ្ឋមន្រ្តីនិងអ្នកទាំងអស់ ដែលនិយាយក្នុងនាមរដ្ឋាភិបាលត្រូវចៀសវាងការពិភាក្សាអំពីបញ្ហាសមុទ្រខាងលិចរបស់ហ្វីលីពីនជាមួយនរណាម្នាក់» ។ ប៉ុន្តែក្រោយមកលោក Duterte បានបញ្ជាក់ច្បាស់ថា បទបញ្ជារបស់លោកមិនគួរត្រូវបាន បកស្រាយថា ជាភាពទន់ខ្សោយទេ ហើយកាលពីថ្ងៃអង្គារលោកបាននិយាយថា ការល្បាតតាមសមុទ្រត្រូវតែបន្ត ។ រដ្ឋាភិបាលក្រុងប៉េកាំងទាមទារសមុទ្រចិនខាងត្បូងស្ទើរតែទាំងអស់ និងបានដំឡើងបរិក្ខារយោធាដែលបំពាក់ ដោយមីស៊ីលនៅតំបន់ថ្មប៉ប្រះទឹក ដែលមានវិវាទរួមទាំងតំបន់សេដ្ឋកិច្ចពិសេសរបស់ហ្វីលីពីនដោយមានវត្តមានកងទ័ពឆ្មាំសមុទ្រនិងនាវានេសាទជាប្រចាំ ៕ Reuters
