អ្នកស្រី អួង កន់ធួក -នារីឆ្នេីមនៃយុគសម័យភាពយន្តខ្មែរ​ (១៩៦៦-១៩៧៥)

0
211

អ្នកស្រី​ អួង​ កន់ធួក​ ត្រូវបានចាត់ទុកជានារីដ៏ឆ្នេីមមួយរូប​ ជាអ្នកដឹកនាំរឿងវ័យក្មេង​ ដែលបានកសាងកិត្តិនាមរបស់ខ្លួននៅក្នុងយុគសម័យមាសនៃភាពយន្តខ្មែរទាំងក្នុងសម័យសង្គមរាស្ត្រនិយម​ និងសម័យសាធារណរដ្ឋខ្មែរ។ នៅក្នុងអតីតកាលដ៏រុងរឿងនោះ​ អាចជារឿងដ៏កម្រមួយសម្រាប់ស្ត្រីចូលប្រឡូកក្នុងតួនាទីនេះ​ ដែលយេីងមេីលឃេីញថាពុំសូវជាមានអ្នកដឹកនាំរឿងស្រី​ នៅក្នុងវិស័យនេះសោះឡេីយ​ កុំថាឡេីយភាពយន្តបេីទោះបីជាអ្នកនិពន្ធទំនុកច្រៀងចម្រៀង​ ឬប្រលោមលោកក៏ពុំសូវសម្បូរបែបដូចបុរសដែរ។ យ៉ាងណាមិញ​ ខ្សែភាពយន្តរបស់នាងនៅតែមានភាពលេចធ្លោគួរជាទីមោទនភាព មិនចាញ់ស្នាដៃផលិតករដទៃឡេីយ​ និងទទួលបានការគាំទ្រពីទស្សនិកជនយ៉ាងសន្ធឹកសន្ធាប់ផងដែរ។

ភាពយន្តដែលអ្នកស្រីបានដឹកនាំគឺ​ សុទ្ធសឹងជាភាពយន្តដែលមានលក្ខណ:ជាសម័យនិយម​ ជាទិដ្ឋភាពដែលបង្ហាញពីការពិតក្នុងឆាកជីវិត​ មិនមានភាពប្រតិដ្ឋជ្រុលហួសហេតុខុសតថភាពសង្គមឡេីយ​ ហេីយច្រេីនជាសោដនាដកម្មនៃជីវិត​ ដូចជាជីវិតស្នេហាត្រីកោណ​ ជាដេីម។ មួយវិញទៀត​ ភាពយន្តរបស់នាងគឺមិននិយមដូចភាពយន្តដទៃដែលចូលចិត្តប្រេីតារាសំណេីចកំប្លែងមកបំប្លែងសាច់រឿងឱ្យមានភាពសេីចសប្បាយជ្រុលហួសហេតុឡេីយ​ ក៏មិនបង្កប់អំពេីហិង្សាដែលសាហាវយង់ឃ្នងពេកមកបញ្ចូលក្នុងសាច់រឿងឡេីយ។ ជាក់ស្ដែងភាពយន្តរបស់អ្នកស្រី​ ដែលបាននៅបន្សល់មកដល់សព្វថ្ងៃនោះរួមមានរឿង​ ពេលដែលត្រូវយំ,​ មួយម៉ឺនអាល័យ,​ និងរឿងថាវរីមាសបង​ ជាដេីម​ ដែលសុទ្ធសឹងជាខ្សែភាពយន្តដែលបានសម្រិតសម្រាំងយ៉ាងប្រណិត​ ដែលពួកយេីងនៅតែអាចចូលមេីលបានតាមការបង្ហោះនៅតាមបណ្ដាញសង្គមនានា៕

(ដង់ស្រង់​ និងកែសម្រួល​ ចេញពីសៀវភៅ​ កន្លះសតវត្សរ៍កន្លងទៅ​ របស់អ្នកនិពន្ធ​ ហ៊ុយ​ វឌ្ឍនា​ ត្រង់ទំព័រ​ ១២១,​ ១២២,​ និង១២៣)

LEAVE A REPLY

Please enter your comment!
Please enter your name here