លោក Gary Neville បានកោតសរសើរភាពក្លាហានរបស់អ្នកចាំទី Dean Henderson បន្ទាប់ពីក្រុម Manchester United ដេញតាមពីក្រោយយកឈ្នះក្រុម Tottenham ៣-១។
អ្នកចាំទីវ័យ២៤ឆ្នាំរូបនេះស្ថិតក្នុងទម្រង់លេងល្អ ខណៈក្រុមបិសាចក្រហមដណ្តើមបានជ័យជម្នះដ៏ត្រចះត្រចង់ ដែលធ្វើឲ្យពួកគេកាត់បន្ថយគម្លាតមកត្រឹម១១ពិន្ទុពីក្រុមនាំមុខ Manchester Cityនិងនៅសល់មួយប្រកួតក្នុងដៃ។
អតីតវីរបុរស United រូបនេះបានបង្ហាញការកោតសរសើររបស់លោកចំពោះការវិវឌ្ឍរបស់កីឡាករ Henderson ចាប់តាំងពីកីឡាកររូបនេះចូលជំនួសកីឡាករ David de Gea ជាអ្នកចាំទីដៃទី១។
Neville បាននិយាយថា “ខ្ញុំចាប់អារម្មណ៍ជាមួយនឹង Henderson ។ វាគឺជារឿងអស្ចារ្យ ហើយជាតំណែងដែលគ្រប់គ្នាតាមមើល” ។
លោកបន្តថា “គាត់គឺជាកីឡាករវ័យក្មេង ប៉ុន្តែនៅក្នុង៥ឬ១០ប្រកួតដំបូងដែលគាត់បានលេង គាត់ពិតជាមានទំនុកចិត្តមែនទែន”។
Henderson បានបង្ហាញមុខ៨លើកនៅក្របខណ្ឌ Premier League សម្រាប់ក្រុម United នៅរដូវកាលនេះ ដោយរក្សាបានឃ្លីនស៊ីតបួនលើកនៅក្នុង៨ប្រកួតនោះ៕
