កីឡាករ Eduardo Camavinga ដែលជាគោលដៅផ្ទេររបស់ក្លឹប Manchester United និង Real Madrid នឹងមិនពន្យារកិច្ចសន្យាជាមួយក្លឹបបារាំង Rennes ហួសពីឆ្នាំ២០២២ទេ នេះបើតាមសេចក្តីរាយការណ៍ជាច្រើន។
កីឡាករវ័យ១៨ឆ្នាំរូបនេះ គឺជាកីឡាករយុវជនដែលគេចាប់អារម្មណ៍នៅអឺរ៉ុប ហើយបានបង្ហាញមុខជាមួយក្រុមជម្រើសជាតិបារាំងបីលើកមកហើយ។
Camavinga បានបង្ហាញមុខ៧៧លើកសម្រាប់ក្រុម Rennes ចាប់តាំងពីបង្ហាញមុខក្នុងក្រុមជម្រើសដំបូងកាលពីពីរឆ្នាំមុន ប៉ុន្តែ Rennes បានត្រឹមឈរនៅលេខរៀងទី៧នៅលើតារាងក្របខណ្ឌ Ligue 1 ហើយគ្រោងនឹងខកខានការប្រកួតនៅក្របខណ្ឌ Champion League នៅរដូវកាលក្រោយ។
ខ្សែបម្រើរូបនេះបានបដិសេធមិនពន្យារកិច្ចសន្យាជាមួយក្លឹប Rennes ដែលអាចធ្វើឲ្យកីឡាកររូបនេះចាកចេញពីក្លឹបបារាំងនេះនៅ រដូវក្តៅនេះ ហើយពួកគេអាចនឹងបាត់បង់ Camavinga នៅដំណាច់រដូវកាលក្រោយ។
Camavinga ត្រូវបានគេភ្ជាប់ទៅនឹងកិច្ចព្រមព្រៀងផ្ទេរចេញទៅកាន់ក្លឹប Real Madrid ស្របពេលមានសេចក្តីរាយការណ៍ថា ខ្សែបម្រើរូបនេះទំនងជាជ្រើសរើសពហុកីឡាដ្ឋាន Santiago Bernabeu ជាជាងក្លឹបផ្សេង ប្រសិនបើលោក Zinedine Zidane នៅដឹកនាំក្លឹប Real Madrid ។
តាមព័ត៌មានថា ក្លឹប United និងPSG ក៏ចាប់អារម្មណ៍ចង់បានខ្សែបម្រើអន្តរជាតិបារាំងរូបនេះផងដែរ៕
