លោក Mike Pompeo ដែលធ្លាប់បានធ្វើឲ្យចិនដីគោកខឹងសម្បា នៅពេលដែលលោកកាន់តំណែងជារដ្ឋមន្ត្រីការបរទេសអាមេរិក ដោយលោកធ្លាប់បានរិះគន់ និងវាយប្រហារគណបក្សកុម្មុយនីស្តចិននោះ នឹងទៅបំពេញទស្សនកិច្ចកោះតៃវ៉ាន់ នៅសប្តាហ៍ក្រោយ ហើយនឹងជួបជាមួយប្រធានាធិបតីតៃវ៉ាន់លោកស្រី Tsai Ing-wen។ លោក Pompeo បានបម្រើការងារនៅក្រោមអតីតប្រធានាធិបតី Donald Trump ចាប់តាំងពីឆ្នាំ២០១៨ រហូតដល់បញ្ចប់អាណត្តិរបស់រដ្ឋបាលនោះ កាលពីខែមករា ឆ្នាំទៅ។ ក្រសួងការបរទេសតៃវ៉ាន់ បានបញ្ចាក់ថា លោក Pompeo និងភរិយា នឹងទៅបំពេញទស្សនកិច្ចនៅតៃវ៉ាន់ ពីថ្ងៃទី៣ ដល់ថ្ងៃទី៥ ខែមីនា ហើយក៏នឹងជួបជាមួយរដ្ឋមន្ត្រីការបរទេសតៃវ៉ាន់លោក Joseph Wu ហើយនឹងថ្លែងសុន្ទរកថានៅអង្គការស្រាវជ្រាវមួយ។ ក្រសួងការបរទេសតៃវ៉ាន់ បានបញ្ចាក់ថា៖ «អតីតរដ្ឋមន្ត្រីការបរទេសលោក Pompeo គឺជាមិត្តភក្តិដ៏យូរអង្វែង និងប្តូរផ្តាច់របស់តៃវ៉ាន់ ហើយបានរួមវិភាគទានដ៏ច្រើន ដើម្បីលើកស្ទួយចំណងទាក់ទងរវាងកោះតៃវ៉ាន់ និងអាមេរិក ក្នុងអំឡុងពេលដែលលោកកាន់តំណែងជារដ្ឋមន្ត្រីការបរទេស»។ រដ្ឋបាលរបស់អតីតប្រធានាធិបតី Trump បានផ្តល់ការគាំទ្រយ៉ាងខ្លាំងដល់កោះតៃវ៉ាន់ ថ្វីបើមិនមានចំណងទាក់ទងខាងការទូតផ្លូវការក៏ដោយ រួមទាំងការលក់អាវុធដ៏ច្រើន និងដំណើរទស្សនកិច្ចរបស់មន្ត្រីកំពូលៗសហរដ្ឋអាមេរិកទៅកាន់ទីក្រុងតៃប៉ិផងដែរ៕ (Reuters ថ្ងៃទី២២ ខែកុម្ភៈ)
