ក្រុមមន្ត្រីសហរដ្ឋអាមេរិកនិយាយថា សហរដ្ឋអាមេរិកនឹងលក់រថក្រោះប្រភេទ M1 Abrams ចំនួន ២៥០ គ្រឿងឲ្យប្រទេសប៉ូឡូញ សម្រាប់ពង្រឹងសន្ដិសុខនៅក្នុងប្រទេសនេះ ចំពេលមានការកើនឡើងភាពតានតឹងជាមួយរុស្ស៊ី ជុំវិញបញ្ហាអ៊ុយក្រែន។ រដ្ឋមន្ត្រីក្រសួងការពារជាតិសហរដ្ឋអាមេរិកលោក Lloyd Austin បានថ្លែងប្រាប់អ្នកសារព័ត៌មានក្នុងរដ្ឋធានីវ៉ាសូវី កាលពីចុងសប្តាហ៍ថា លោក និងលោក Antony Blinken រដ្ឋមន្ត្រីការបរទេសសហរដ្ឋអាមេរិក បានជូនដំណឹងដល់សភា អំពីបំណងនៃការលក់រថក្រោះនេះហើយ។ លោក Austin ថ្លែងថា៖ «ពេលវេលាជាក់លាក់នៃការដឹកជញ្ជូនរថក្រោះទាំងនេះ កំពុងស្ថិតក្រោមការពិភាក្សា»។ ប្រទេសប៉ូឡូញបានប្រកាសផែនការទិញរថក្រោះពីសហរដ្ឋអាមេរិក កាលពីរដូវក្ដៅ ឆ្នាំមុន ជាផ្នែកមួយនៃកិច្ចព្រមព្រៀង ដែលមានតម្លៃប្រមាណ ៦ ពាន់លានដុល្លារ ប៉ុន្តែការលក់រថក្រោះនេះ ចេះតែត្រូវបានពន្យារពេល។ លោក Austin បានមានប្រសាសន៍ថា ការទិញរបស់ប្រទេសប៉ូឡូញនេះ ក៏នឹងជួយ «ធានានូវការចែកចាយមួយកាន់តែមានសមធម៌» នៃការទទួលខុសត្រូវផ្នែកការពារ ក្នុងចំណោមក្រុមសម្ព័ន្ធមិត្តរបស់អង្គការណាតូផងដែរ»។ លោក Austin បានថ្លែងអំណរគុណដល់ប្រទេសប៉ូឡូញ ដែលបានទទួលទាហានសហរដ្ឋអាមេរិកបន្ថែមចំនួន ៤.៧០០ នាក់ ដែលត្រៀមខ្លួនរួចជាស្រេចដើម្បីឆ្លើយតប ប្រសិនបើរុស្ស៊ីលុកលុយអ៊ុយក្រែន។ មានកងកម្លាំងសហរដ្ឋអាមេរិកចំនួនពី ៩ពាន់ ទៅ ១ម៉ឺននាក់ ក្នុងប្រទេសប៉ូឡូញ ចាប់តាំងពីប្រធានាធិបតីសហរដ្ឋអាមេរិកលោក Joe Biden បញ្ជាឲ្យបញ្ជូនកងកម្លាំងទៅឈរជើងបន្ថែមទៀត កាលពីដើមខែនេះមក៕ (AFP ថ្ងៃទី២១ ខែកុម្ភៈ)
