សង្រ្គាមពាក្យសម្តីកំពុងបន្តមានយ៉ាងផុសផុល រវាងរុស្ស៊ី និងបស្ចិមប្រទេស ទាក់ទងនឹងវិបត្តិអ៊ុយក្រែន។ ដោយមានភ្ជាប់រូបភាពជាមួយផង រុស្ស៊ីបានប្រកាសពីការបន្តដកទ័ព និងគ្រឿងសព្វាវុធចេញពីតំបន់ស្ថិតនៅជុំវិញអ៊ុយក្រែន ពិសេស ពីតំបន់គ្រីមៀរ ដែលរុស្ស៊ីបានក្រសោកយកកាលពីឆ្នាំ២០១៤។ ការដកទ័ពនេះត្រូវបានរុស្ស៊ីប្រកាសតាំងថ្ងៃអង្គារ ទី១៥ ខែកុម្ភៈ និងត្រូវបានប្រកាសជាថ្មី ដោយក្រសួងការពារជាតិរុស្ស៊ីកាលពីថ្ងៃព្រហស្បតិ៍ ទី១៧ ខែកុម្ភៈ។ ចំណែកវិមានប្រធានាធិបតីរុស្ស៊ី បានប្រកាសបញ្ជាក់លើការដកទ័ពនេះ និងបានបន្ថែមថា ការដកនេះនឹងត្រូវប្រើពេលយូរ ដោយមិនបានលំអិតអ្វីបន្ថែមទេ។ តែបញ្ហានៅត្រង់ថា បស្ចិមប្រទេសមានមន្ទិលសង្ស័យលើបំណងល្អរបស់រុស្ស៊ី និងបន្តចោទរុស្ស៊ីពីគម្រោងវាយប្រហារចូលឈ្លានពានអ៊ុយក្រែន។ លើសពីនេះ វិមានប្រធានាធិបតីអាមេរិក ថែមទាំងអះអាងថា រុស្ស៊ីមិនត្រឹមតែមិនបានដកទ័ពដូចការប្រកាសប៉ុណ្ណោះទេ តែថែមទាំងបានបញ្ជូនចំនួន ៧ ០០០នាក់ទៀត ទៅកាន់ព្រំដែនអ៊ុយក្រែន។ ការអះអាងរបស់អាមេរិកនេះ ត្រូវបានបញ្ជាក់ដោយរដ្ឋមន្រ្តីការពារជាតិអង់គ្លេសលោក បេន វ៉ាឡាស់ ដែលកំពុងចូលរួមនៅក្នុងកិច្ចប្រជុំថ្នាក់រដ្ឋមន្រ្តីការពារជាតិអង្គការណាតូ ក្នុងទីក្រុងព្រុចសែល។ លោក បេន វ៉ាឡាស់ បានបន្ថែមថា ណាតូមិនបានមើលស្រាលចំពោះការគំរាមកំហែងរបស់រុស្ស៊ីលើអ៊ុយក្រែនទេ និងថា ណាតូបានត្រៀមកម្លាំងរួចជាស្រេច ដើម្បីឆ្លើយតបនឹងរុស្ស៊ីវិញ។ ឯខាងអ៊ុយក្រែនវិញ ប្រធានាធិបតីលោក វូឡូឌីមៀរ ហ្សេឡេនស្គី បានបញ្ជាក់ពីការមិនបានឃើញមានសញ្ញាធូរស្រាល និងការធ្លាក់ចុះចំនួនទ័ពរុស្ស៊ីនៅព្រំដែនអ៊ុយក្រែនទេ។ យ៉ាងណាក៏ដោយ ការលើកឡើង និងការចោទរបស់បស្ចិមប្រទេសនេះ ត្រូវបានប្រមុខការទូតរុស្ស៊ីលោក ស៊ែរហ្កី ឡាវរ៉ូហ្វ ពិបាកទទួលយក។ តើការពិតនៅត្រង់ណារវាងការប្រកាសរបស់រុស្ស៊ី និងការលើកឡើងរបស់បស្ចិមប្រទេសពេលនេះ?។ គេមិនអាចឆ្លើយនឹងសំណួរនេះបានទេ។ អ្វីដែលគេអាចនិយាយបាន សង្រ្គាមផ្លូវអាវុធមិនទាន់មានទេ តែសង្រ្គាមពាក្យសម្តីកំពុងបន្តមានយ៉ាងផុសផុល៕ (AP ថ្ងៃទី១៧ ខែកុម្ភៈ)
