ប្រទេសជប៉ុនគ្រោងនឹងប្រកាសថា ខ្លួននឹងបន្ធូរបន្ថយការគ្រប់គ្រងព្រំដែនដែលដាក់ចេញ ដើម្បីទប់ទល់នឹងការរីករាលដាលកូវីដ-១៩ ដែលជាវិធានការតឹងរ៉ឹងបំផុត ក្នុងចំណោមប្រទេសអ្នកមានជាច្រើន ហើយត្រូវបានរិះគន់ដោយមេដឹកនាំអាជីវកម្ម និងអ្នកអប់រំនានា។ និស្សិតបរទេសប្រហែល ១៥០,០០០ នាក់ បានជាប់នៅក្រៅប្រទេស រួមជាមួយនឹងកម្មករ ដែលជំរុញឱ្យមានការព្រមានអំពីកង្វះកម្លាំងពលកម្ម និងការខូចខាតដល់កេរ្តិ៍ឈ្មោះអន្តរជាតិរបស់ប្រទេសជប៉ុន។ ប្រទេសជប៉ុនបានបន្ធូរបន្ថយច្បាប់ព្រំដែនរបស់ខ្លួន ដែលបិទប្រទេសយ៉ាងមានប្រសិទ្ធភាព ចំពោះអ្នកមិនមែនជាពលរដ្ឋ អស់រយៈពេល ពីរឆ្នាំ នៅចុងឆ្នាំ២០២១ ប៉ុន្តែបានរឹតបន្តឹងម្តងទៀត ត្រឹមតែប៉ុន្មានសប្តាហ៍ក្រោយមក នៅពេលដែលមេរោគអូមីក្រុង បានបង្ហាញខ្លួន។ ក្នុងចំណោមវិធានការនានា ដែលត្រូវបានប្រកាស នឹងត្រូវបង្កើនចំនួនមនុស្សដែលត្រូវបានអនុញ្ញាតឱ្យចូលប្រទេសជប៉ុនពី ៣ ៥០០នាក់ នាពេលបច្ចុប្បន្ន ដល់ ៥ ០០០ នាក់ ក្នុងមួយថ្ងៃ៕ (CNA ថ្ងៃទី១៧ ខែកុម្ភៈ)
