នៅក្នុងជំនួបកំពូលអាហ្វ្រិក-អឺរ៉ុប បើកធ្វើកាលពីថ្ងៃព្រហស្បតិ៍ និងថ្ងៃសុក្រនេះ សហភាពអឺរ៉ុប និងមេដឹកនាំបណ្តាប្រទេសអាហ្រ្វិក ត្រូវពិភាក្សាគ្នា ដើម្បីរកផ្លូវដើរថ្មី សម្រាប់សហប្រតិបត្តិការ រវាងទ្វីបទាំងពីរ។ ជំនួបកំពូលអាហ្វ្រិក-អឺរ៉ុប បើកធ្វើឡើងនៅចំថ្ងៃដែលបារាំង និងសម្ព័ន្ធមិត្តអឺរ៉ុបប្រកាសជាផ្លូវការដកទ័ពចេញពីម៉ាលី ជាប្រទេសមួយនៅអាហ្វ្រិកខាងលិច ដែលងាកទៅចាប់ដៃសហការជាមួយទាហានស៊ីឈ្នួលរុស្ស៊ី នៅក្រោយរដ្ឋប្រហារយោធា។ ភាពជាដៃគូរវាងអឺរ៉ុប និងអាហ្វ្រិកត្រូវឈរនៅលើការដោះដូរ និងចែករំលែកគ្នា។ នេះជាសាររួមរបស់ប្រធានសហភាពអឺរ៉ុបលោក Charles Michel និងប្រធានសហភាពអាហ្វ្រិក នៅថ្ងៃបើកជំនួបកំពូលអាហ្វ្រិក-អឺរ៉ុប លើកទី៦ នៅទីក្រុងព្រុចស៊ែល ប្រទេសបែលហ្សិក។ នៅក្នុងជំនួបកំពូលដែលមានការចូលរួមពីមេដឹកនាំប្រទេសអាហ្វ្រិក ចំនួន ៤០ ក្នុងចំណោមសមាជិកសរុប ៥៥ ប្រទេសរបស់សហភាពអាហ្វ្រិក សន្តិសុខ ស្ថិរភាព និងសុខភាពនៅទឹកដីអាហ្វ្រិក ជាសំណុំរឿងសំខាន់ ដែលថ្នាក់ដឹកនាំបណ្តាប្រទេសអាហ្វ្រិក និងមេដឹកនាំប្រទេសសមាជិកសហភាពអឺរ៉ុប ត្រូវជជែកគ្នា ដើម្បីផ្តល់សន្ទុះថ្មីដល់ទំនាក់ទំនងភាពជាដៃគូ រវាងទ្វីបទាំងពីរ។ រដ្ឋប្រហារ ជម្លោះប្រដាប់អាវុធ ភេរវនិយម ការជួញដូរមនុស្ស និងចោរសមុទ្រ នៅទឹកដីអាហ្វ្រិក ក៏កំពុងជះផលអាក្រក់មកលើអឺរ៉ុប ដូចជា បញ្ហាលំហូរជនអន្តោប្រវេសន៍មកពីអាហ្វ្រិក។ តាមប្រមុខការទូតអឺរ៉ុបលោក Josep Borrell អឺរ៉ុបមិនអាចជួយអាហ្វ្រិក ដែលស្គាល់តែអសន្តិសុខ អស្ថិរភាព បានឡើយ។ អាហ្វ្រិកកាន់តែរងរញ្ជួយដោយអស្ថិរភាព ដោយសារមានការលូកដៃពីតួអង្គ ចិន និងរុស្ស៊ី ដែលមានវិធីសាស្រ្ត និងគោលដៅនៅលើទឹកដីអាហ្វ្រិក ខុសប្លែកពីអឺរ៉ុប។ ភូមិសាស្រ្តនយោបាយ និងភាពសំបូរធនធានរ៉ែ បានធ្វើឲ្យអាហ្វ្រិកក្លាយជាគោលដៅចង់បានពីគ្រប់ទិស។ សម្រាប់ប្រមុខការបរទេសអឺរ៉ុប អាហ្វ្រិកមានជម្រើសច្រើន ប៉ុន្តែសហភាពអឺរ៉ុបគ្រាន់តែបញ្ជាក់ទៅបណ្តាប្រទេសនៅអាហ្វ្រិកថា ភាពជាដៃគូដែលអឺរ៉ុបស្នើទៅឲ្យអាហ្វ្រិក គឺនវានុវត្តន៍ និងការគោរពសិទ្ធិជនជាតិអាហ្វ្រិក ពោល គឺមិនមែនមហិច្ឆតាធ្វើអាណានិគមនោះទេ។ សហភាពអឺរ៉ុបចង់ពិនិត្យមើលឡើងវិញផងដែរ នូវជំនួយគាំទ្រហិរញ្ញវត្ថុ សម្រាប់អាហ្វ្រិក។ ទឹកប្រាក់ ១៥០ពាន់លានអឺរ៉ូ ត្រូវបានសហភាពអឺរ៉ុបគ្រោង សម្រាប់ការវិនិយោគ នៅអាហ្វ្រិក ដូចជា ហេដ្ឋារចនាសម្ព័ន្ធ និងសម្រាប់គម្រោងការដែលជនជាតិអាហ្វ្រិកស្នើឡើង សម្រាប់អភិវឌ្ឍសេដ្ឋកិច្ចរបស់ខ្លួន។ នេះជាផ្នែកមួយនៃយុទ្ធសាស្រ្តរបស់អឺរ៉ុប ដែលបានគ្រោងទឹកប្រាក់សរុប ៣០០ពាន់លានអឺរ៉ូ សម្រាប់គម្រោងវិនិយោគលើហេដ្ឋារចនាសម្ព័ន្ធនៅក្នុងពិភពលោក ពីពេលនេះ ដល់ឆ្នាំ ២០២៧ ក្នុងគោលដៅប្រជែងទប់ទល់មហិច្ឆតារបស់មហាអំណាចចិន៕ (Reuters ថ្ងៃទី១៧ ខែកុម្ភៈ)
