សហរដ្ឋអាមេរិក និងចិន មានទំនោរនៃទំនាក់ទំនងការទូតឡើងចុះ នៅរយៈពេលប្រមាណកន្លះសតវត្សរ៍មកនេះ។ ប្រទេសមហាអំណាចទាំង២ បានចាប់ដៃគ្នាជាលើកដំបូង នៅក្នុងដំណើរទស្សនកិច្ចរបស់អតីតប្រធានាធិបតីអាមេរិកលោក រីឆាដ និកសុន ខែកុម្ភៈ ឆ្នាំ១៩៧២ បានបើកផ្លូវឱ្យមានទំនាក់ទំនងការទូតជាផ្លូវការ រវាងអាមេរិក និងចិន ដែលបណ្ដាលឱ្យអាមេរិកទទួលស្គាល់ចិនប្រជាមានិត និងផ្ដាច់ទំនាក់ទំនងជាមួយតៃវ៉ាន់។ សម្រាប់ឆ្នាំ ២០២២ នេះ ខាងចិនក៏គិតគូររៀបចំពិធីរំឭកខួបនៃដំណើរទស្សនកិច្ចរបស់លោក និកសុន មកកាន់ស្រុកចិនទៀតផង។ នេះបើតាមការលើកឡើងរបស់ក្រសួងការបរទេសចិន នៅក្នុងខែកុម្ភៈនេះ។ ក្រោយពីចិន និងសូវៀត មានទំនាក់ទំនងរង្គោះរង្គើផ្នែកនយោបាយជាមួយគ្នា នៅទសវត្សរ៍ឆ្នាំ១៩៦០ បណ្ដាលឱ្យអាមេរិកឆ្លៀតឱកាសទៅទាក់ទងជាមួយចិន ដើម្បីរួមដៃគ្នាប្រឆាំងសូវៀត។ ទំនាក់ទំនងនេះ បានបង្កើតជាពាក្យស្លោកនៅក្នុងចំណោមអ្នកសិក្សាទំនាក់ទំនងអន្តរជាតិ មួយឃ្លាថា៖ «សត្រូវរបស់សត្រូវរបស់យើង ជាមិត្តរបស់យើង»។ អំឡុងទស្សនកិច្ចនៅចិន ប្រធានាធិបតីអាមេរិកបានជួបជាមួយលោក ម៉ៅ សេទុង ដែលជាមេដឹកនាំជាន់ខ្ពស់របស់ចិន និងបានសន្ទនារាប់ម៉ោងជាមួយលោក ជូ អេនឡាយ នាយករដ្ឋមន្ត្រីចិន នៅពេលនោះ។ ដើម្បីប្រឆាំងដាច់ខាតនឹងសូវៀត អាមេរិកនៅពេលនោះ សុខចិត្តបោះបង់តៃវ៉ាន់ ដើម្បីចាប់ដៃជាមួយចិន។ គោលជំហរបែបនេះ ត្រូវបានព្រមព្រៀងចុងក្រោយនៅថ្ងៃទី២៨ ខែកុម្ភៈ ឆ្នាំ១៩៧២ ដែលជាថ្ងៃចុងក្រោយលោក និកសុន មកទស្សនកិច្ចនៅចិន។ ឯកសារនៃកិច្ចព្រមព្រៀងនោះ មានឈ្មោះថា សេចក្ដីថ្លែងការណ៍ទីក្រុងសៀងហៃ ដែលគេបានកត់សម្គាល់ថា អាមេរិកបានធ្វើការគាំទ្រដល់ «គោលនយោបាយចិនតែមួយ» ហើយព្រមព្រៀងក្នុងការកាត់បន្ថយវត្តមានយោធារបស់ខ្លួន នៅកោះតៃវ៉ាន់។ មហាអំណាចទាំង២ ក៏មានទំនាក់ទំនងល្អូកល្អិនផ្នែកសេដ្ឋកិច្ចអំឡុង ៥០ ឆ្នាំនេះដែរ។ អាមេរិកបាននាំចិន ចូលជាសមាជិកអង្គការពាណិជ្ជកម្មពិភពលោក (WTO) នៅឆ្នាំ២០០១ ហើយអាមេរិកក៏បានធ្វើពាណិជ្ជកម្ម និងវិនិយោគនៅស្រុកចិនយ៉ាងច្រើន ក្នុងរយៈពេល ៥ ទសវត្សរ៍មកនេះ។ រហូតមកដល់ទសវត្សរ៍ឆ្នាំ២០១០ គ្រប់យ៉ាងចាប់ផ្ដើមកើនភាពតានតឹងដាក់គ្នា។ ចាប់តាំងពីលោក ស៊ី ជីនពីង ឡើងកាន់តំណែងនៅឆ្នាំ២០១២-២០១៣ មក ចិនចាប់ផ្ដើមកើនឡើងឥទ្ធិពលក្នុងពិភពលោកយ៉ាងខ្លាំង ដោយមហាអំណាចអាស៊ីមួយនេះ បានប្រកាន់យកគោលនយោបាយការបរទេសមួយ ដែលពង្រីកឥទ្ធិពលនៅលើពិភពលោក។ អាមេរិកចាត់ទុកថា ការកើនឡើងអំណាចរបស់ចិន ជាការគំរាមកំហែងដល់សណ្ដាប់ធ្នាប់ពិភពលោក ចំណែកឯចិនវិញចាត់ទុកអាមេរិកថា ជ្រៀតជ្រែកកិច្ចការផ្ទៃក្នុងរបស់ខ្លួន។ ស្ថានភាពនៃការប្រកួតប្រជែងនេះ នៅបន្តរហូតមកដល់ជំនាន់របស់លោក ចូ បៃដិន ដែលឡើងកាន់តំណែងជាប្រធានាធិបតី តាមរយៈការបោះឆ្នោតឆ្នាំ២០២០។ ទំនាក់ទំនងរវាងប្រទេសទាំង២ នៅអំឡុងពេលនេះ ហាក់ដូចជាស្ថិតក្នុងសភាពតានតឹងជាមួយគ្នា ហើយមានអ្នកអត្ថាធិប្បាយខ្លះចាត់ទុកថា សណ្ដាប់ធ្នាប់ពិភពលោកនៅពេលនេះ កំពុងតែស្ថិតក្នុងដំណាក់កាលសង្គ្រាមត្រជាក់ជំនាន់ទី២៕ (AFP ថ្ងៃទី១៧ ខែកុម្ភៈ)
