ប្រទេសឥណ្ឌូណេស៊ី ធ្វើជាម្ចាស់ផ្ទះរៀបចំកិច្ចប្រជុំថ្នាក់រដ្ឋមន្រ្តីហិរញ្ញវត្ថុ និងប្រធានធនាគារកណ្តាលនៃក្រុមប្រទេស G២០ រយៈពេល ២ថ្ងៃ ដោយចាប់ផ្តើមកាលពីថ្ងៃព្រហស្បតិ៍ ទី១៧ ខែកុម្ភៈ។ កិច្ចប្រជុំនេះ បានចាប់ផ្តើមជាមួយនឹងសុន្ទរកថារបស់ប្រធានាធិបតីឥណ្ឌូណេស៊ីលោក យ៉ូកូ វីដូដូ ដោយលោកបានគូសបញ្ជាក់ដោយព្រមានថា វាមិនមែនជាពេលវេលាដើម្បីសំឡឹងមើលការប្រជែងគ្នា និងការបង្កើតភាពតានតឹងថ្មី ដែលអាចបង្កគ្រោះថ្នាក់ដល់សន្តិសុខពិភពលោក និងបំផ្លាញដល់ការងើបឡើងវិញនូវសេដ្ឋកិច្ចសកលទេ។ តាមលោក វីដូដូ វាជាពេលវេលាដែលទាំងអស់គ្នាត្រូវរួមសហការគ្នា ដើម្បីស្រោចស្រង់សេដ្ឋកិច្ចពិភពលោកឡើងវិញ។ ប្រធានរឿង ដែល G២០ ត្រូវលើកយកទៅជជែកនៅក្នុងកិច្ចប្រជុំ រយៈពេល ២ថ្ងៃ រួមមាន កំណើនអត្រាអតិផរណានៅក្នុងប្រទេសមួយចំនួន គោលនយោបាយរូបិយវត្ថុរបស់ក្រុមប្រទេសអភិវឌ្ឍន៍ចំពោះក្រុមប្រទេសកំពុងអភិវឌ្ឍន៍ កំណែទម្រង់លើការយកពន្ធអន្តរជាតិ ពង្រឹងប្រព័ន្ធសុខាភិបាលសកល ឬ មួយបន្ធូរបន្ធយប្រាក់បំណុលរបស់ក្រុមប្រទេសក្រីក្រ។ ប្រធានរឿង ស្តីពីការពង្រឹងប្រព័ន្ធសុខាភិបាលសកល និងការបន្ធូរបន្ធយប្រាក់បំណុលរបស់ក្រុមប្រទេសក្រីក្រ ត្រូវបានចាប់អារម្មណ៍ខ្លាំងដោយរដ្ឋមន្រ្តីហិរញវត្ថុអាមេរិកលោកស្រី ចានែត យេលែន។ លោកស្រី ចានែត យេលែន យល់ថា វាជារឿងបន្ទាន់បំផុតដែលគេត្រូវពង្រឹងប្រព័ន្ធសុខាភិបាលសកល ដើម្បីអាចមានមធ្យោបាយគ្រប់គ្រាន់ ក្នុងការបង្ការ រៀបចំ និងដោះស្រាយភ្លាមៗ នៅពេលមានផ្ទុះជំងឺឆ្លងសកលជាយថាហេតុ នាពេលខាងមុខ។ ទាក់ទងនឹងការបន្ធូរបន្ធយប្រាក់បំណុលរបស់ក្រុមប្រទេសក្រីក្រត្រូវបានលោកស្រី ចានែត យេលែន អំពាវនាវឲ្យ G២០ ពន្លឿនការងាររបស់ខ្លួន ពិសេសបានស្នើឲ្យមានការចូលរួមបន្ថែមរបស់ចិន។ តាមលោកស្រី ចានែត យេលែន ប្រាក់បំណុលនៅក្នុងក្រុមប្រទេសក្រីក្របានកើនឡើងខ្លាំង នៅក្នុងសម័យកូវីដ១៩៕ (AP ថ្ងៃទី១៧ ខែកុម្ភៈ)
