ប្រធានាធិបតីបារាំងលោក អេម៉ានុយអែល ម៉ាក្រុង និងសមភាគីចិនលោក ស៊ី ជីនពីង បានជួបសន្ទនាគ្នាតាមទូរស័ព្ទ កាលពីថ្ងៃពុធ ទី១៦ ខែកុម្ភៈ។ នៅក្នុងកិច្ចសន្ទនា ប្រធានាធិបតីបារាំងលោក ម៉ាក្រុង និងសមភាគីចិនលោក ស៊ី ជីនពីង បានយល់ស្របគ្នាថា គ្រប់ភាគីពាក់ព័ន្ធនឹងវិបត្តិអ៊ុយក្រែនត្រូវឲ្យអាទិភាពលើកិច្ចសន្ទនា ដើម្បីស្វែងរកដំណោះស្រាយផ្លូវទូត។ លោក ស៊ី ជីនពីង បានគាំទ្រកិច្ចខិតខំប្រឹងប្រែង និងគំនិតផ្តួចផ្តើមរបស់បារាំង ជាមួយអាល្លឺម៉ង់ គឺការចរចាក្នុងក្របខណ្ឌទម្រង់ណរម៉ង់ឌី ចូលរួមដោយ ៤ភាគី គឺបារាំង អាល្លឺម៉ង់ រុស្ស៊ី និងអ៊ុយក្រែន។ កិច្ចចរចាទម្រង់ណរម៉ង់ឌី ដែលបានចាប់ផ្តើមក្នុងខែតុលា ឆ្នាំ២០១៥ មានគោលដៅដោះស្រាយជម្លោះប្រដាប់អាវុធ រវាងអ៊ុយក្រែន និងក្រុមអ្នកទាមទារផ្តាច់ទឹកដីនិយមគាំទ្ររុស្ស៊ី ក្នុងតំបន់ដុនបាស់ ស្ថិតប៉ែកខាងកើតអ៊ុយក្រែន។ ក្រៅពីវិបត្តិអ៊ុយក្រែន កិច្ចសន្ទនារវាងលោក ម៉ាក្រុង និងលោក ស៊ី ជីនពីង ក៏បានផ្តោតលើទំនាក់ទំនងរវាងបារាំង-ចិន និងអឺរ៉ុប-ចិន។ អ្វីដែលលោក ម៉ាក្រុង ទាមទារចង់បានពីលោក ស៊ី ជីនពីង រវាងអឺរ៉ុប-ចិន គឺទំនាក់ទំនងស្មើភាពមានទៅមានមក ពិសេស នៅក្នុងការដោះដូរពាណិជ្ជកម្ម។ បន្ទាប់មក លោក ម៉ាក្រុង បានស្នើឲ្យចិនលើកទណ្ឌកម្មប្រឆាំងប្រទេសលីទុយអានីចេញវិញ។ ដោយឡែក នៅក្នុងទំនាក់ទំនងទ្វេភាគីបារាំង-ចិន លោក ម៉ាក្រុង ចង់ឲ្យបង្កើនចំនួនជើងហោះហើររវាងប្រទេសទាំងពីរដែលបានកាត់បន្ថយខ្លាំង ដោយសារវិធានការបិទខ្ទប់របស់ចិន ដើម្បីទប់ស្កាត់នឹងការឆ្លងកូវីដ១៩។ ចុងក្រោយ លោក ម៉ាក្រុង បានរម្លឹកពីការរង់ចាំរបស់បារាំង និងអឺរ៉ុប ទាក់ទងនឹងការឲ្យសច្ចាប័នរបស់ចិន លើសន្ធិសញ្ញាជាមូលដ្ឋានរបស់អង្គការពលកម្មអន្តរជាតិ ពិសេស ទាក់ទងនឹងការងារដោយបង្ខំ និងក្តីបារម្ភទាក់ទងនឹងស្ថានការណ៍នៅក្នុងតំបន់ស៊ីនជាំង៕ (AP ថ្ងៃទី១៦ ខែកុម្ភៈ)
