ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃចន្ទថា វាជាកំហុសឆ្គងដែលបស្ចិមប្រទេសមួយចំនួន រួមទាំងសហរដ្ឋអាមេរិកផងដែរ បានបញ្ជាឲ្យមន្ត្រីការទូតរបស់ខ្លួនចេញពីរដ្ឋធានីកៀវ ដោយភ័យខ្លាចការវាយលុករបស់រុស្ស៊ី។ លោក Zelensky បានបញ្ជាក់ថា៖ «នេះជាកំហុសដ៏ធំមួយ ដែលស្ថានទូតមួយចំនួនសម្រេចប្ដូរទីតាំងទៅភាគខាងលិចប្រទេសអ៊ុយក្រែន» បន្ទាប់ពីស្ថានបេសកកម្មអន្តរជាតិមួយចំនួន បានបើកការិយាល័យរបស់ខ្លួននៅក្នុងទីក្រុង Lviv។ លោកបានបន្ថែមថា៖ «ដោយសារតែភាគខាងលិចប្រទេសអ៊ុយក្រែនក៏នៅតែស្ថិតក្នុងប្រទេសអ៊ុយក្រែនដដែល ដូច្នេះបើមានរឿងអ្វីកើតឡើង នោះវានឹងកើតឡើងគ្រប់ទីកន្លែងទាំងអស់»។ ទីភ្នាក់ងារស៊ើបការណ៍សម្ងាត់សហរដ្ឋអាមេរិក បានព្រមានថា ប្រទេសរុស្ស៊ីដែលបានប្រមូលផ្តុំកងទ័ពជាង ១០០.០០០ នាក់ នៅតាមបណ្ដាយព្រំដែនជាប់ប្រទេសអ៊ុយក្រែន អាចឈ្លានពានអ៊ុយក្រែនក្នុងពេលប៉ុន្មានថ្ងៃទៀត ហើយមន្ត្រីមួយចំនួនខ្លាចមានការវាយប្រហារភ្លាមៗលើរដ្ឋធានីអ៊ុយក្រែន។ ប្រទេសមួយចំនួនបានដកមន្ត្រីការទូតរបស់ខ្លួនចេញពីរដ្ឋធានីអ៊ុយក្រែន និងបានជំរុញពលរដ្ឋរបស់ពួកគេឱ្យចាកចេញពីប្រទេសអ៊ុយក្រែនឲ្យបានឆាប់តាមដែលអាចធ្វើបាន។ សហរដ្ឋអាមេរិកបានបញ្ជាឱ្យបុគ្គលិកការទូតរបស់ខ្លួនភាគច្រើន នៅក្នុងទីក្រុងកៀវចាកចេញ ហើយរក្សាស្ថានកុងស៊ុលរបស់ខ្លួននៅក្នុងទីក្រុង Lviv នៅភាគខាងលិចប្រទេសអ៊ុយក្រែន។ ចំណែកឯប្រទេសកាណាដា និងប្រទេសអូស្ត្រាលីវិញ បានបិទស្ថានទូតរបស់ខ្លួនក្នុងទីក្រុងកៀវ ជាបណ្តោះអាសន្ន ដោយប្តូរប្រតិបត្តិការការទូតរបស់ខ្លួនទៅទីក្រុង Lviv វិញ៕ (AFP ថ្ងៃទី១៥ ខែកុម្ភៈ)
