អង់គ្លេស​ត្រៀម​កងទ័ព​ចំនួន ​១.០០០ ​នាក់​ សម្រាប់​ជួយ​ដល់​សកម្មភាព​មនុស្សធម៌ ​ជុំវិញ​​បញ្ហា​​អ៊ុយក្រែន

0
148

ចក្រភព​អង់គ្លេសបាន​បញ្ជា​ឲ្យ​កងទ័ព​ ១.០០០ ​នាក់ ​ត្រៀម​ខ្លួនសម្រាប់​ការគាំទ្រ​ក្នុង​ករណី​មាន​វិបត្តិ​មនុស្សធម៌ណា​មួយ ​ដែល​បណ្តាល​មក​ពី​ការ​ឈ្លានពាន​របស់​ប្រទេសរុស្ស៊ី មុន​ពេល​ដំណើរ​ទស្សនកិច្ច​របស់​នាយករដ្ឋមន្ត្រី Boris Johnson ដើម្បី​ជួប​ជាមួយ​មេដឹកនាំ​អង្គការ​ណាតូ ​និង​ទៅ​ប្រទេស​ប៉ូឡូញ​ កាលពី​ថ្ងៃ​ព្រហស្បតិ៍។ លោក Johnson បាន​ធ្វើ​ដំណើរ​ទៅ​កាន់​ទីក្រុង​ប្រ៊ុចសែល ​និង​វ៉ាសូវី ​ដើម្បី​បញ្ជាក់​ពី​តម្រូវការ​ក្នុង​ការប្រកាន់​ខ្ជាប់​នូវ​គោលការណ៍​របស់​អង្គការណាតូ ​និង​ពិភាក្សា​អំពី​វិធី​ដែល​ចក្រភព​អង់គ្លេស​អាច​ផ្តល់​ការ​គាំទ្រ​ផ្នែក​យោធា ខណៈ​ដែល​រុស្ស៊ី​ដាក់​ពង្រាយ​កងទ័ព​របស់​ខ្លួន​ នៅ​ជិត​ព្រំដែន​ប្រទេស​អ៊ុយក្រែន។ ប្រធានាធិបតី​បារាំង​លោក Emmanuel Macron បាន​ជួប​ជាមួយ​ប្រធានាធិបតី​រុស្ស៊ី​លោក Vladimir Putin កាលពី​ដើម​សប្តាហ៍​នេះ ហើយ​អនុ​ប្រធានាធិបតី​អាមេរិក​លោក​ស្រី Kamala Harris នឹង​ជួប​ផ្ទាល់​ជាមួយ​សម្ព័ន្ធមិត្ត ​និង​ដៃគូ​របស់​សហរដ្ឋ​អាមេរិក ​នៅ​សន្និសីទ​សន្តិសុខ​ទីក្រុង Munich នៅ​សប្តាហ៍​ក្រោយ។ រដ្ឋមន្ត្រី​ការ​បរទេស ​និង​រដ្ឋមន្ត្រី​ការពារ​ជាតិ​ចក្រភព​អង់គ្លេស គ្រោង​នឹង​ធ្វើ​ដំណើរ​ទៅ​កាន់​ទីក្រុង​មូស្គូ​ នៅ​ក្នុង​សប្ដាហ៍​នេះ ​ដើម្បី​ពិភាក្សា​ជា​មួយ​សមភាគី​របស់​ពួក​លោក។ លោក Johnson បាន​បញ្ជាក់​នៅ​ក្នុង​សេចក្តីថ្លែងការណ៍​ថា៖ «ចក្រភព​អង់គ្លេស​នៅ​តែ​មិន​ផ្លាស់ប្តូរ​ការ​ប្តេជ្ញាចិត្ត ​ចំពោះ​សន្តិសុខ​អឺរ៉ុប​ឡើយ។ ក្នុង​នាម​ជា​សម្ព័ន្ធមិត្ត យើង​ត្រូវ​កំណត់​ព្រំដែន​ឲ្យ​ច្បាស់​លាស់ ហើយ​ត្រូវ​ធ្វើ​ឲ្យ​ប្រាកដ​ថា មាន​គោលការណ៍​ដែល​យើង​នឹង​មិន​សម្រប​សម្រួល»។ ចក្រភព​អង់គ្លេស​បាន​ឲ្យ​ដឹង​កាល​ពី​ថ្ងៃ​ច័ន្ទ​ថា ខ្លួនបាន​បញ្ជូន​ទាហាន ​ចំនួន ​៣៥០​ នាក់​បន្ថែម​ទៀត ​ទៅ​កាន់​ប្រទេសប៉ូឡូញ បន្ទាប់​ពី​ខ្លួន​បាន​បញ្ជូន​ទាហាន​ចំនួន​ ១០០​នាក់ ​កាល​ពី​ឆ្នាំមុន ដើម្បី​ជួយ​ដោះ​ស្រាយ​វិបត្តិ​ជនចំណាកស្រុក​នៅ​ព្រំដែន ​ជាមួយ​ប្រទេស​បេឡារុស៕ (Reuters ថ្ងៃទី១១ ខែកុម្ភៈ)

LEAVE A REPLY

Please enter your comment!
Please enter your name here