ហេតុ​អ្វី​មានមតិរិះគន់​ច្រើន ​ជុំ​វិញ​ការ​​ចាក់​វ៉ាក់សាំង​ដូស​ទី​៤?

0
124

 

បន្ទាប់​ពី​អ៊ីស្រាអែល គឺ​ប្រទេសស៊ីលី​ ដែល​បើក​យុទ្ធនាការ​ចាក់​វ៉ាក់សាំង​ប្រឆាំងកូវីដ​១៩ ដូស​ទី​បួន។ ស៊ីលី​កំពុង​ប្រឈម​រលកចម្លង​អូមីក្រុង​យ៉ាង​ខ្លាំងក្លា​ តាំង​ពី​ចូល​ឆ្នាំ​២០២២មក ហើយ​សង្ឃឹម​ថា ​នឹងចាប់​ធូរ​ស្បើយ​វិញ ​នៅ​ដើម​ខែ​មីនា​ខាង​មុខ។ ប៉ុន្តែ​ខណៈ​ដែលចំនួន​អ្នក​វិជ្ជមាន​ឡើង​បំបែក​ឯតទគ្គកម្មស្ទើរ​រាល់​ថ្ងៃ ​យុទ្ធសាស្ត្រ​ចាក់​ថ្នាំ​បង្ការ​ដូស​ជំរុញទី​ពីរ​ ឬ ​ដូស​ទីបួន បែរ​ជា​រង​ការរិះគន់​យ៉ាង​ខ្លាំង ជាពិសេស ​ការ​រិះគន់​មក​ពី​ខាង​អង្គការ​សុខភាពពិភពលោក។ ដោយសារ​បាន​បញ្ជា​ទិញ​ថ្នាំ​បង្ការ​កូវី​១៩ តាំង​ពីផ្ទុះ​ជំងឺ​រាតត្បាត​​ដំបូង​ភ្លាម និង​ដោយ​សារ​មាន​វប្បធម៌​ចាក់​ថ្នាំ​បង្ការ ស៊ីលី​ជាប្រទេស​បាន​ចាក់​ថ្នាំបង្ការ​កូវីដ​១៩ ​បាន​ច្រើន​ជាង​បង្អស់​មួយ​នៅ​លើ​ពិភពលោក។ ជិត ​ពីរដូស​កន្លះ ​ជា​មធ្យម ​សម្រាប់​ប្រជាពលរដ្ឋ ​១០០នាក់។ ពិត​ជា​តួលេខ​ដល់​កំពូល​ ​ក្នុង​ចំណោម​បណ្តាប្រទេស​ក្នុង​អង្គការ​កិច្ចសហប្រតិបត្តិការ​ និងអភិវឌ្ឍន៍​សេដ្ឋកិច្ច OCDE។ តាំងពីខែមករា​មក​ ស៊ីលី​បាន​ចាប់​ផ្តើមចាក់​ដូស​ជំរុញ​ទីពីរ ឬ ​ដូស​ទីបួន ដល់​អ្នក​មាន​ជំងឺ​ខ្សោយ​ប្រព័ន្ធការពារខ្លួន និង​ដល់​ក្រុម​បុគ្គលិក​សុខាភិបាល។ យុទ្ធនាការ​ចាក់​ដូស​ទីបួន សម្រាប់​ពលរដ្ឋ​អាយុ​លើ​សពី ៥៥ឆ្នាំ ត្រូវ​ចាប់បាន​ផ្តើមកាលពី​ថ្ងៃចន្ទ ទី៧ ខែកុម្ភៈ។ ប៉ុន្តែ​យុទ្ធនាការ​ចាក់​ដូស​ទីបួន មិន​បានទទួលស្វាគមន៍​ដូច​ដូស​មុនៗ​ទេ។ ​ពាក្យ​រិះគន់មកពី​ខាង​អង្គការ​សុខភាពពិភពលោក​ គឺ​ថ្វីបើវ៉ាក់សាំង​ដូស​ទីមួយ មានប្រសិទ្ធភាព ដោយ​អាច​​ផ្តល់​ភាពស៊ាំដល់​សរីរាង្គកាយ​មនុស្ស​ ហើយ​ដូសទីបួន​នឹង​បង្កើន​អត្រា​អង់ទីក័រឱ្យ​នៅកំរិត​ខ្ពស់​មែន ប៉ុន្តែបើតាមការ​សិក្សា​អ៊ីស្រាអែល វ៉ាក់សាំង​ដូស​ទីបួន​នេះ ​គ្មានប្រសិទ្ធភាព​ទប់​ទល់​នឹងអូមីក្រុង​ទេ។​ ថ្នាំបង្ការ​ផលិត​ឡើង​ដោយ​ផ្អែក​លើ​គំរូ​នៃមេរោគ​កូវីដ​ដើមប៉ុណ្ណោះ។ មូលហេតុទីពីរ​ គឺ​​សង្គមលែង​ចាប់អារម្មណ៍។ បើ​តាម​ការ​សិក្សា​អ៊ីស្រាអែល​ដដែល ក្នុង​យុទ្ធនាការ​ចាក់​ដូស​ជំរុញ​ (ដូសទីបី) ពលរដ្ឋ​នាំ​គ្នា​រួសរាន់​​ទៅ​រក​ចាក់ តែ​គ្មាន​នរណា​សូវ​អើពើសោះ ​​នៅពេលបើក​​យុទ្ធនាការ​ចាក់​ដូស​ទីបួន។ ដូស​ទីបួន មាន​ប្រយោជន៍​មិន​អាច​ប្រកែក​បាន​ ទាំង​​ផ្នែក​វិទ្យាសាស្ត្រ​ និង​សង្គម សម្រាប់​តែ​មាន​ជំងឺ​​ប្រព័ន្ធ​ការ​ពារខ្លួន​​ខ្សោយ ​និង​អ្នកប្រឈម​ខ្លាំង​នឹង​មេរោគ។ ផ្ទុយ​វិញ ​គ្មាន​អ្វី​បន្ទាន់​សោះ​សម្រាប់​មនុស្ស​ធម្មតា មាន​សុខភាព​ល្អ​មាំមួន​នោះ។ ម្យ៉ាងវិញ​ទៀត គេ​អាច​រង់​ចាំ​បាន​ ព្រោះ​ពេល​នេះ ក្រុមហ៊ុន ​Pfizer Moderna កំពុង​សិក្សាធ្វើ​បច្ចុប្បន្នភាព​ថ្នាំបង្ការ ​សម្រប​ទៅ​នឹង​មេរោគ​កូវីដ​១៩ បំប្លែង​ខ្លួន​អូមីក្រុង​ហើយ​។ មន្ទីរ​ពិសោធន៍​ទាំង​ពី​រ សង្ឃឹម​ថា ​ថ្នាំ​បង្ការ​ប្រឆាំង​កូវីដ១៩ ​អូមីក្រុង​នឹងអាច​ធ្វើ​ចរាចរណ៍​បាន​នៅ​រដូវ​ក្តៅ​ខាង​មុខ៕ (Reuters ថ្ងៃទី០៨ ខែកុម្ភៈ)

 

LEAVE A REPLY

Please enter your comment!
Please enter your name here