លោក Macron ​និយាយ​ជាមួយ​លោក Biden នៅ​មុន​ធ្វើ​ដំណើរ​ទៅ​កាន់​ទីក្រុង​ម៉ូស្គូ

0
137

 

ប្រធានាធិបតីបារាំងលោក Emmanuel Macron បាននិយាយម្តងទៀត កាលពីថ្ងៃអាទិត្យ ទី6 ខែកុម្ភៈ ជាមួយប្រធានាធិបតីអាមេរិកលោក Joe Biden នៅក្នុង “ការសម្របសម្រួលបែបតក្កវិជ្ជា” មុនពេលដំណើរទស្សនកិច្ចរបស់លោកទៅកាន់ទីក្រុងមូស្គូ នៅថ្ងៃច័ន្ទនេះ។ ការហៅទូរសព្ទរយៈពេល 40 នាទី បានអនុញ្ញាតឱ្យមេដឹកនាំទាំងពីរ “ចែករំលែកព័ត៌មានអំពីទំនាក់ទំនងដែលបានធ្វើឡើង ក្នុងអំឡុងចុងសប្តាហ៍” សម្រាប់ការសម្របសម្រួលដ៏ល្អ នៅមុនការធ្វើដំណើរ។ លោក Macron ត្រូវ​ទៅ​បំពេញ​ទស្សនកិច្ច​នៅ​ប្រទេស​រុស្ស៊ី ​នៅ​ថ្ងៃ​ចន្ទ​នេះ ជាប្រទេសដែល​បាន​ដាក់​ពង្រាយ​ទ័ព​យ៉ាង​ច្រើន ​នៅ​ជិត​អ៊ុយក្រែន ​បង្ក​ការ​ភ័យ​ខ្លាចពី​លោក​ខាង​លិច អំពី​ការ​ឈ្លានពាន។ សេតវិមានបាននិយាយថា មេដឹកនាំទាំងពីរបានពិភាក្សាអំពី “កិច្ចខិតខំប្រឹងប្រែងការទូត និងរារាំងជាបន្ត ដើម្បីឆ្លើយតបទៅនឹងការបន្តការកសាងយោធារបស់រុស្ស៊ី នៅតាមព្រំដែនអ៊ុយក្រែន”។ លោក Macron និងលោក Biden បានបញ្ជាក់ពីការគាំទ្ររបស់លោកទាំងពីរ ចំពោះអធិបតេយ្យភាព និងបូរណភាពទឹកដីរបស់អ៊ុយក្រែន ហើយបានយល់ព្រមថា ក្រុមរបស់ពួកលោកនឹងរក្សាទំនាក់ទំនង និងបន្តការប្រឹក្សាជាមួយសម្ព័ន្ធមិត្ត និងដៃគូ រួមទាំងអ៊ុយក្រែនផងដែរ។ រុស្ស៊ីបានបដិសេធផែនការឈ្លានពានអ៊ុយក្រែន ប៉ុន្តែមានកងទ័ពរាប់ម៉ឺននាក់នៅជិតព្រំដែនប្រទេសជិតខាងរបស់ខ្លួន ដែលជំរុញឱ្យសហរដ្ឋអាមេរិកបន្ថែមទាហានប្រហែល 3,000 នាក់ ដើម្បីពង្រឹងផ្នែកខាងកើតរបស់អង្គការណាតូ នៅក្នុងប្រទេសប៉ូឡូញ និងរូម៉ានី។ ខណៈដែលរុស្ស៊ីប្រមូលផ្តុំកងទ័ពជាង 100,000 នាក់ នៅជិតព្រំដែននោះ ទីក្រុងម៉ូស្គូបាននិយាយថា ខ្លួនអាចចាត់វិធានការយោធាដែលមិនជាក់លាក់ ប្រសិនបើការទាមទារសន្តិសុខរបស់ខ្លួនមិនត្រូវបានបំពេញ។ ទាំង​នោះ ​រួម​មាន​ ការ​សន្យារបស់អង្គការ​ណាតូ អំពីការ​មិន​ព្រម​ទទួល​យក​អ៊ុយក្រែន​ជាសមាជិក​ ដែល​អាមេរិក ​និងណាតូ ​បាន​ហៅ​ថា ​មិន​អាច​ទទួល​យក​បាន៕ (Reuters ថ្ងៃទី០៧ ខែកុម្ភៈ)

LEAVE A REPLY

Please enter your comment!
Please enter your name here