ពិធី​ដង្ហែ​ភ្លើងគប់​កីឡា​អូឡាំពិក​រដូវរងា​ក្រុង​ប៉េកាំង ​បាន​ចាប់ផ្តើម​ហើយ

0
146

 

ទីក្រុង​ប៉េកាំង​បាន​ចាប់​ផ្តើម​តួនាទីរបស់​ខ្លួន ​ជា​ម្ចាស់ផ្ទះ​នៃ​ការ​ប្រកួត​កីឡា​អូឡាំពិក​រដូវរងា​ឆ្នាំ​២០២២ ជាមួយ​នឹង​ពិធី​ដង្ហែ​ភ្លើងគប់ ​ដែល​តែងតែ​ធ្វើឡើង​ជា​ប្រពៃណី​ កាលពី​ថ្ងៃ​ពុធ​ម្សិលម៉ិញ។ ឧបនាយករដ្ឋមន្ត្រី Han Zheng បាន​ចាប់ផ្តើម​ពិធី​នេះ ​នៅ​ពេល​ដែល​លោកបាន​ហុច​ភ្លើងគប់​ជូន​លោក Luo Zhihuan ដែលជា​អ្នក​ចូល​ប្រកួត​កីឡា​រំអិល​លើទឹកកក​ល្បឿនលឿន​អន្តរជាតិ​ទីមួយ​របស់​ប្រទេស​ចិន ​ដែល​មាន​អាយុ​ ៨០ឆ្នាំ និង​ជា​ជើងឯក​នៃ​កីឡា​អូឡាំពិក​រដូវរងា​ទីមួយ ក្នុង​ពិធី​មួយ​នៅ​ឯសួន​អូឡាំពិក​បរទេស (Olympic Foreign Park)។ អ្នកដង្ហែ​ភ្លើងគប់​ជាង​មួយ​ពាន់​នាក់ បាន​កាន់​ភ្លើងគប់​អូឡាំពិកឆ្លង​កាត់​តំបន់​ប្រកួត​៣ ដែល​រួមមាន ​ទីក្រុង​ប៉េកាំង ទីក្រុង Zhangjiakou ក្នុង​ខេត្ត Hebei ដែល​នៅ​ជិត​ខាង​ មុន​នឹង​វិល​ត្រឡប់​មកកាន់​ទីក្រុង​ប៉េកាំង​វិញ ​នៅ​ថ្ងៃសុក្រ ​សម្រាប់​ពិធី​បើក​ការប្រកួត​កីឡា​អូឡាំពិក។ ពិធី​ដង្ហែ​ភ្លើងគប់ ​៣ថ្ងៃនេះ ​មាន​ការ​រឹតត្បិត​ខ្លាំងជាង​ពិធី​ធម្មតា​កន្លងមក ដោយសារ​មានការ​បារម្ភ​អំពី​ជំងឺ​កូវីដ១៩ ដោយ​មាន​ការ​អនុញ្ញាត​ឲ្យតែ​សាធារណជន​ខ្លះ​មើល​តែប៉ុណ្ណោះ។ កាល​ពីឆ្នាំ ២០០៨ ឯនោះវិញ មុន​ការ​ប្រកួត​កីឡាអូឡាំពិក​រដូវ​ក្តៅ រដ្ឋាភិបាល​ក្រុង​ប៉េកាំង​បានធ្វើ​ពិធី​ដង្ហែ​ភ្លើងគប់​នៅ​ជុំវិញ​ពិភពលោក ដែលពេល​នោះ​នាំ​ឲ្យ​មាន​ការប្រឆាំង​តវ៉ា ​ចំពោះ​ការ​បំពាន​សិទ្ធិមនុស្ស​របស់​ចិន ​នៅ​តាម​កន្លែង​ឈប់​សំចតខ្លះៗ។​ ឆ្នាំ​នេះ ​ប្រទេស​ជាច្រើន ​រួមមាន សហរដ្ឋ​អាមេរិក អូស្ត្រាលី ចក្រភព​អង់គ្លេស និង​កាណាដា បាន​បដិសេធ​មិន​បញ្ជូន​គណៈប្រតិភូ​ផ្លូវការ ​ទៅ​ចូលរួម​ក្នុង​ការ​ប្រកួត​កីឡា​អូឡាំពិក​រដូវ​រងា​ នៅ​ទីក្រុង​ប៉េកាំង​ទេ ប៉ុន្តែកីឡាកររបស់ប្រទេសទាំងនោះចូលរួមប្រកួតជាធម្មតា។ នៅក្នុង​ការ​ប្រកួត​កីឡា​អូឡាំពិក​នេះ អត្តពលិក ក្រុមមន្ត្រី អ្នកធ្វើការ និង​អ្នកយក​ព័ត៌មាន ត្រូវដាក់ឲ្យ​ស្ថិត​នៅ​ដាច់​ពីគេ ដើម្បី​ទប់​ស្កាត់​កុំ​ឱ្យ​ឆ្លង​ជំងឺ​កូវីដ១៩៕ (AFP ថ្ងៃទី០៣ ខែកុម្ភៈ)

 

LEAVE A REPLY

Please enter your comment!
Please enter your name here