WHO៖ វីរុស​អូមីក្រុង​ថ្មីមាន​កម្រិត​ធ្ងន់ធ្ងរ ​ប្រហាក់ប្រហែល​នឹង​អូមីក្រុង​ដើម

0
371

ទម្រង់​ថ្មី​មួយ​នៃ​វីរុស​បំប្លែង​ថ្មី​អូមីក្រុង (omicron) ​ដែលទើប​លេចចេញ​ឡើង ហាក់​ដូចជាមិន​មាន​ភាព​ធ្ងន់ធ្ងរ​ជាង​ប្រភេទ​វីរុស​អូមីក្រុងទម្រង់​ដើមនោះ​ទេ។ នេះ​បើ​តាម​ការ​បញ្ជាក់​របស់​អង្គការ​សុខភាព​ពិភពលោក (WHO)​ កាលពី​ថ្ងៃពុធ។ លោក​វេជ្ជបណ្ឌិត Boris Pavlin នៃ​ក្រុម​ឆ្លើយតប​កូវីដ១៩ ​របស់​អង្គការ​សុខភាព​ពិភពលោក បាន​ថ្លែង​អំពី​វីរុសអូមីក្រុង​ទម្រង់ថ្មីនេះ​ ដែល​មាន​ឈ្មោះបច្ចេកទេស​ថា BA.2 នៅ​ក្នុង​សន្និសីទ​កាសែត​តាម​អនឡាញ​ ខណៈ​វា​កំពុង​ចាប់​ផ្តើមចេញមក​ជំនួសវីរុស​អូមីក្រុង​ទម្រង់​ដើម ​ដែល​មាន​ឈ្មោះ​បច្ចេកទេស​ថា BA.1 ​នៅ​ក្នុង​ប្រទេស​ដាណឺម៉ាក ​និង​ប្រទេស​ផ្សេង​ទៀត។ លោក​វេជ្ជបណ្ឌិត Pavlin បាន​និយាយ​ថា៖ «បើ​យើង​ក្រឡេក​មើល​ប្រទេស​នានា​ ដែល​វីរុសអូមីក្រុង BA.2 កំពុង​រាតត្បាត យើង​មិន​បាន​ឃើញ​មនុស្ស​ដែល​ចូល​សម្រាក​ក្នុង​មន្ទីរពេទ្យ​ច្រើន​ជាង​ការរំពឹង​ទុក​នោះ​ទេ»។ លោក​វេជ្ជបណ្ឌិត Pavlin បានលើកឡើងដោយ​ផ្អែក​លើ​ទិន្នន័យបាន​មក​ពី​ប្រទេស​ដាណឺម៉ាក​ ជា​ប្រទេស​ទី១ ​ដែល​វីរុសអូមីក្រុងថ្មី BA.2 មាន​ចំនួនច្រើន​លើស​វីរុស​អូមីក្រុង​ដើម BA.1។ លោក​បាន​និយាយ​ទៀត​ថា វ៉ាក់សាំងបាន​បន្ត​ផ្តល់​ការការពារ​ស្រដៀង​គ្នា ​ប្រឆាំង​នឹង​ទម្រង់​អូមីក្រុង​ប្រភេទ​ផ្សេង​ទៀត។ ប្រភេទ​វីរុស​ថ្មី​នេះ​ ឆ្លង​ខ្លាំង​ជាង​វីរុស​ដើម BA.1 នេះ​បើ​តាម​ការសិក្សា​របស់​ដាណឺម៉ាក ​ដែល​បាន​ធ្វើ​ការវិភាគ​អំពី​ការឆ្លង​នៅ​ក្នុង​គ្រួសារដាណឺម៉ាកជាង ​៨.៥០០ គ្រួសារ ​នៅ​ខែ​ធ្នូ​ និងខែ​មករា។ វីរុសអូមីក្រុង​ប្រភេទថ្មី​នេះ ក៏​កំពុង​រាលដាល​លើសលុប​ច្រើនជាងមេរោគកូវីដ​ប្រភេទ​ផ្សេងៗ​ទៀត​នៅ​ក្នុង​ប្រទេស​ឥណ្ឌា នេប៉ាល់ ហ្វ៊ីលីពីន​ និង​កាតា​ផង​ដែរ​ ក៏​ប៉ុន្តែ​ការ​រាលដាលរបស់​វា​នៅប្រទេស​ដាណឺម៉ាក ​មិន​បាន​បញ្ឈប់​អាជ្ញាធរ​នៅ​ក្នុង​ប្រទេស​នេះ ឲ្យ​លុប​ចោល​ការរឹតត្បិតសង្គម​នានានោះ​ទេ៕ (AFP ថ្ងៃទី០៣ ខែកុម្ភៈ)

 

LEAVE A REPLY

Please enter your comment!
Please enter your name here