នៅក្នុងបទសម្ភាសន៍មួយជាមួយប្រព័ន្ធផ្សព្វផ្សាយក្នុងស្រុក កាលពីល្ងាចថ្ងៃសៅរ៍ ទី២៤ ធ្នូ នាយករដ្ឋមន្ត្រីកាណាដាលោក ហ្សូសស្តាំង ទ្រុយដូ និយាយថា ចិនកំពុងតែលេងនយោបាយបំបែកបំបាក់សាមគ្គីភាពរបស់បណ្តាប្រទេសលោកខាងលិច និងអាចប្រើការបង្ខិតបង្ខំការទូតបាន។ ដូច្នោះហើយ មេដឹកនាំកាណាដាបានជំរុញឲ្យប្រទេសសម្ព័ន្ធមិត្តរួបរួមសាមគ្គីគ្នាឲ្យកាន់តែខ្លាំង ដើម្បីប្រឆាំងទល់នឹងទីក្រុងប៉េកាំង។ បើតាមលោកទ្រុយដូ បញ្ហាប្រឈមមួយសម្រាប់ក្រុមលោកខាងលិច គឺការប្រកួតប្រជែងគ្នាក្នុងចំណោមសម្ព័ន្ធមិត្ត ពីព្រោះ ក្នុងនាមជាប្រទេសប្រជាធិបតេយ្យមូលធននិយម ប្រទេសទាំងនោះត្រូវខំព្យាយាមធ្វើឲ្យបានល្អ ជាពិសេស នៅពេលមានឱកាសសេដ្ឋកិច្ចហុចឲ្យនៅក្នុងប្រទេសចិន ជាទីដែលវណ្ណៈកណ្តាលកំពុងកើនឡើងច្រើន។ លោកនាយករដ្ឋមន្ត្រីកាណាដា បានលើកឡើងជាឧទាហរណ៍ជាក់ស្តែង ដូចក្នុងករណីដែលកាដាណាកំពុងព្យាយាមសម្លឹងមើលពីវិធីនាំចេញសាច់គោរបស់ខ្លួនឲ្យបានច្រើនជាងសាច់គោអូស្ត្រាលី ចូលទៅកាន់ទីផ្សាររបស់ចិន។ និន្នាការនេះ អនុញ្ញាតឲ្យទីក្រុងប៉េកាំងអាចបំបែកបំបាក់ប្រទេសទាំងពីរនេះបាន។ ការអត្ថាធិប្បាយរបស់មេដឹកនាំកាណាដានេះបានកើតឡើង ស្របពេលកំពុងមានបញ្ហានឹងគ្នា ជាមួយរដ្ឋាភិបាលក្រុងប៉េកាំង។ កាលពីចុងឆ្នាំ ២០១៨ ទំនាក់ទំនងទ្វេភាគីកាណាដា-ចិន បានធ្លាក់ចុះខ្លាំង បន្ទាប់ពីប្រធានផ្នែកហិរញ្ញវត្ថុក្រុមហ៊ុន Huawei ត្រូវបានចាប់ខ្លួននៅកាណាដា និងក្រោយចិនចាប់ឃុំខ្លួនជនជាតិកាណាដា ពីរនាក់ ពីបទបានធ្វើឲ្យប៉ះពាល់សន្តិសុខជាតិចិន និងបានហាមឃាត់ការនាំចូលមួយចំនួនពីកាណាដាទៀតផង។ ថ្មីៗនេះ កាណាដាបានចូលរួមពហិការការទូតមួយដឹកនាំមុខដោយអាមេរិក ក្នុងកម្មវិធីកីឡាអូឡាំពិករដូវរងារនៅប៉េកាំង នាខែកុម្ភៈខាងមុខ ដើម្បីប្រឆាំងនឹងអំពើរំលោភសិទ្ធិមនុស្សនៅចិន។ រដ្ឋបាលរបស់លោកនាយករដ្ឋមន្ត្រី ទ្រុយដូ ឥឡូវនេះក៏កំពុងពិចារណាដែរ ពីការហាមឃាត់បច្ចេកវិទ្យា 5G របស់ក្រុមហ៊ុន Huawei នៅក្នុងប្រទេសកាដាណា៕ (AP ថ្ងៃទី២៦ ខែធ្នូ)
Publicité
