អ្នកឆ្លង និងអ្នកស្លាប់ដោយកូវីដ១៩ នៅឥណ្ឌា កើនខ្ពស់ជាងថ្ងៃមុន និងការព្រមានអំពីរលកទី៣

0
100

ក្រសួង​សុខាភិបាល​ឥណ្ឌា កាល​ពីថ្ងៃព្រហស្បតិ៍​ បាន​ប្រកាស​រកឃើញ​អ្នក​ឆ្លងជំងឺ​កូវីដ​១៩ ក្នុង​ចំនួនខ្ពស់ប្រចាំ​ថ្ងៃមិន​ធ្លាប់​មាន ចំនួនជាង ​៤១២.០០០​នាក់​ និង​មាន​អ្នក​ស្លាប់ដល់​៣.៩៨០​នាក់ ដែល​ធ្វើ​ឲ្យ​ចំនួន​អ្នក​ឆ្លង​សរុបនៅ​ក្នុង​ប្រទេស​ឥណ្ឌារហូត​មក​ដល់​ពេល​នេះ​ កើន​ដល់ជាង​២១​លាន​នាក់​ និង​មានអ្នក​ស្លាប់​សរុបជាង២៣០.០០០​នាក់។​ ​ព្រម​ជាមួយ​គ្នា​នេះ មន្ត្រី​ឥណ្ឌា​មួយ​ចំនួន​ព្រមាន​ថា​ រលក​ទី៣​នៃ​ការ​ឆ្លង​រាត​ត្បាតជំងឺ​កូវីដ​១៩​នេះ​ នឹង​កើត​មាន​នៅ​ទូទាំង​ប្រទេស។​ លោក​ K. Vijay Raghavan ទីប្រឹក្សា​ជាន់​ខ្ពស់​ផ្នែក​វិទ្យាសាស្ត្រ​របស់​រដ្ឋាភិបាល​ឥណ្ឌា បាន​ព្រមាន​ថា​ រលក​ទី​៣​នៃ​ការ​ឆ្លង​រាតត្បាតនេះ ​នឹង​កើត​មាន​ឡើង​ពាស​ពេញផ្ទៃ​ប្រទេស​ ស្រប​ពេល​ដែលប្រទេស​នេះ​ កំពុងប្រយុទ្ធ​ប្រឆាំង​នឹង​រលកទី​២​នៃ​ការ​ឆ្លង​នេះ​នៅ​ឡើយ។​ ​វិបត្តិ​ជំងឺ​កូវីដ​១៩​នៅឥណ្ឌា ​កំពុង​ធ្លាក់​ក្នុង​ស្ថានភាពធ្ងន់ធ្ងរ​ ដោយ​សារ​ការ​ខ្វះ​ខាត​ជា​ខ្លាំង​នូវ​ម៉ាស៊ីន​អ៊ុកស៊ីហ្សែនសម្រាប់​អ្នក​ជំងឺ​ដែល​ត្រូវ​ការ​ជា​ចាំបាច់ ក៏​ដូច​ជា​វត្ថុ​ធាតុដើម​ សម្រាប់​ផលិត​វ៉ាក់សាំង​បង្ការ​ជំងឺ​កូវីដ​១៩​ផង​ដែរ។​ តុលាការ​កំពូល​ឥណ្ឌា​ បានចេញ​ដីកា​បញ្ជា​ឲ្យ​រដ្ឋាភិបាល​ត្រូវ​ដាក់ផែនការដើម្បីឆ្លើយ​តប​នឹង​តម្រូវការ​ម៉ាស៊ីន​អ៊ុកស៊ីហ្សែន​ នៅ​ក្នុង​មន្ទីរ​ពេទ្យនានា​ ក្នុង​រដ្ឋធានី​ញូវដែលី​នៅ​ត្រឹម​ថ្ងៃ​ព្រហស្បតិ៍ម្សិលម៉ិញ។ ទោះ​បី​ឥណ្ឌា​ជា​ប្រទេស​ដែល​មាន​រោងចក្រ​ផលិត​វ៉ាក់សាំង​ធំ​ជាង​គេ​បង្អស់​នៅ​ក្នុង​ពិភពលោកក្តី​ ក៏​ពលរដ្ឋ​ឥណ្ឌា​ចំនួន​តែ​២%​ប៉ុណ្ណោះ​ ​ក្នុង​ចំណោម​ពលរដ្ឋ​សុរបជាង ​១.៣០០​លាន​នាក់​ បាន​ទទួល​វ៉ាក់សាំង​បង្ការ​ជំងឺ​កូវីដ​១៩៕ ​Reuters

LEAVE A REPLY

Please enter your comment!
Please enter your name here