ចិនថ្កោលទោសការថ្លែងរបស់ក្រុមប្រទេស G7 ដែលវាយប្រហារខ្លួន និងគាំទ្រកោះតៃវ៉ាន់

0
205

ប្រទេស​ចិនកាលពី​ថ្ងៃ​ព្រហស្បតិ៍ ​បាន​ថ្កោល​ទោស​សេចក្តី​ប្រកាស​រួមរបស់​រដ្ឋមន្ត្រី​ការបរទេស ​នៃ​ក្រុម​ប្រទេស G7 ដែល​បាន​គាំទ្រ​កោះ​តៃ​វ៉ាន់​ និងដែល​បាន​ហៅ​រដ្ឋាភិបាលទី​ក្រុង​ប៉េកាំង​ថា ​មាន​ភាព​គឃ្លើន​ដែលក្រសួងការបរទេសចិននិយាយ​ថា ជា​ការ​ចូល​ជ្រៀតជ្រែកចូល​កិច្ចការ​ផ្ទៃ​ក្នុងរបស់​ប្រទេស​ចិន។​ ក្រុម​រដ្ឋមន្ត្រីការបរទេស G7 ថ្លែងក្នុង​សេចក្តី​ប្រកាស​រួមមួយ​ថា ប្រទេស​ចិន​បាន​ប្រព្រឹត្ត​កំហុស​ក្នុង​ការ​រំលោភ​សិទ្ធិ​មនុស្ស ​និងបាន​ប្រើប្រាស់​«គោល​នយោបាយ​សេដ្ឋកិច្ច​បង្ខិតបង្ខំ» ហើយថា ក្រុម​ប្រទេស ​G7 នឹង​​ប្រឹងប្រែង​រួម​គ្នា ​ដើម្បី​បញ្ឈប់ទង្វើរបស់​ចិន​។​ លើសពីនេះ ក្រុម​ប្រទេស​ G7 ក៏​បានសម្តែង​ការ​គាំទ្រ​ឱ្យ​កោះ​តៃវ៉ាន់​អាចចូល​រួមក្នុង​វេទិកា​អង្គការ​សុខភាព​ពិភព​លោក WHO ។ ក្រុមប្រទេស​ G7 ​ក៏​បាន​សម្តែង​នូវ​ក្តី​បារម្ភ​អំពី «សកម្មភាព​ជាឯកតោ​ភាគី​ណា​មួយ ដែលធ្វើ​ឲ្យ​មាន​ភាព​តានតឹង​កើន​ឡើង» នៅច្រក​សមុទ្រ​តៃវ៉ាន់​។ សកម្មភាព​នោះ គឺសំដៅដោយ​ប្រយោល​លើ​សកម្មភាពយោធា​របស់​ចិន។​ អ្នក​នាំ​ពាក្យក្រសួង​ការ​បរទេស​ចិន ​លោក​ Wang Wenbin បាន​ថ្កោល​ទោសនូវ​សេច​ក្តី​ថ្លែង​ការណ៍របស់​ក្រុម​ប្រទេស​ G7​ ដោយ​លើក​ឡើង​ថា ​វាជា​ការ​ចោទ​ប្រកាន់​មួយ​ដែល​គ្មាន​មូលដ្ឋាន​ និង​បាន​ជ្រៀតជ្រែក​ចូល​កិច្ច​ការ​ផ្ទៃ​ក្នុង​របស់​ប្រទេស​ចិន។​ លោក​ថា​ ក្រុម​ប្រទេស​ G7 គួរ​ជំរុញ​សកម្មភាពស្តារ​សេដ្ឋកិច្ចសកល​លោក​ឡើង​វិញ​ ជា​ជាង​ធ្វើ​ឲ្យ​រាំង​ស្ទះ​ដល់​ដំណើរការ​នេះ៕​ Reuters

LEAVE A REPLY

Please enter your comment!
Please enter your name here