សំណង់​គោល​ប្រវត្តិសាស្ត្រ សម័យ​អាណានិគម​បារាំង តាម​ដង​ទន្លេមេគង្គ នឹងដាក់​ជា​សម្បត្តិ បេ​តិ​ភណ្ឌ​ជាតិ​

0
113

ថ្មគោល គឺជា​សំណង់​ដែល​បាន​សង់​ឡើង យ៉ាងរឹងមាំ​សម្រាប់ នាវាចរណ៍​ផ្លូវទឹក​តាម​ដង ទន្លេមេគង្គ ខេត្តក្រចេះ​- ស្ទឹងត្រែង ដល់​ព្រំដែន កម្ពុជា​-​ឡាវ រហូតមក​ទល់នឹង​ពេលនេះ មាន​រយៈកាល រយ​ឆ្នាំ​មកហើយ​។​

​អ្នកស្រី ញោច សារឿន ប្រធាន​មន្ទីរ​វប្បធម៌ និង​វិចិត្រសិល្បៈ ខេត្តស្ទឹងត្រែង បាន​ប្រាប់​នៅ​ព្រឹក​ថ្ងៃទី​៦ ខែ ឧសភា ឆ្នាំ​២០២១​ថា រាល់​សំណង់​ដែល​សង់​ឡើង មាន​អាយុកាល ចាប់ពី ៥០ ឆ្នាំ​ឡើង ទៅ​ចាត់ទុកថា ជា​សម្បត្តិ​បេតិកភណ្ឌ​ជាតិ​។ ចំពោះ​សំណង់​ថ្មគោល នៅតាម​ដង​ទ​ន្ល​មេគង្គ ខេត្តស្ទឹងត្រែង យើង​អាច​ហៅ​បាន​ថា ជា​សំណង់​ប្រវត្តិសាស្ត្រ ឬ​សំណង់​សម័យ​អាណានិគម​បារាំង​។ ចំពោះមុខ​សំណង់​បែបនេះ អាច​នឹង​ក្លាយជា​សម្បត្តិ​បេតិកភណ្ឌ របស់​ជាតិ​យើង​។​

ទាក់ទង​ទៅនឹង​សំណង់ តាម​ផ្លូវទឹក​នេះដែរ លោក សរ គឹម​ណាត ប្រធាន​មន្ទីរ​សាធារណការ និង​ដឹកជញ្ជូន ខេត្តស្ទឹងត្រែង បាន​ប្រាប់ថា សំណង់​គោល បាន​សង់​ឡើង កាលពី​សម័យ អាណានិគម​បារាំង មាន​ចាប់ពី​ស្រុក​សំបូរ ខេត្តក្រចេះ រហូត ដល់​ព្រំដែន​កម្ពុជា​-​ឡាវ នៅតាម​ដង​ទន្លេមេគង្គ​។​

​លោក សរ គឹម​ណាត បាន​ប្រាប់ថា សំណង់​បែបនេះ គឺជា​បង្គោល​ចរាចរណ៍ បង្ហាញ​ផ្លូវទឹក ដោយសារ​ផ្លូវទឹក ពី​ខេត្តក្រចេះ មក​ព្រំដែន​កម្ពុជា​-​ឡាវ សម្បូរ​ដោយ​ថ្ម ទឹក​ហូរ​ខ្លាំង ការធ្វើដំណើរ តាមផ្លូវ​ទឹក មានការ​លំបាក ជួប​ឧបសគ្គ​ច្រើន ទើប​គេ​សង់​បង្គោល​ស៊ីម៉ងត៍ នៅតាម​ប្រឡោះ​ផ្លូវទឹក នា​រដូវប្រាំង ដើម្បី​ជាស​ញ្ញា​ងាយស្រួល សម្រាប់​អ្នកបើក​កប៉ាល់ (​កាប​ពី​ទែន​)​។​

​ការធ្វើដំណើរ​តាមផ្លូវ​ទឹក នៅ​រដូវប្រាំង​ទូក​កាណូត កប៉ាល់ ដែល​អាច​ដឹក​សម្ភារៈ ចំណុះ​ចាប់ពី ១០០ តោន​ចុះក្រោម​។​បើ​វស្សា​ចាប់ពី​ខែសីហា​ខែកញ្ញា​ទូក​ធំ​អាចដាក់​សម្ភារៈ​ទំនិញ​ឬ​ដឹង​ប្រេង​ចំណុះ​ចាប់ពី​លើស ១០០ តោន​បាន​។​

កាលនោះ គេ​ប្រើ​កប៉ាល់​ដឹកទំនិញ​ពាណិជ្ជកម្ម ក្នុង​តំបន់​ឥណ្ឌូចិន ពី​ក្រុងភ្នំពេញ ខេត្តកំពង់ចាម -​ក្រចេះ -​ស្ទឹងត្រែង ទៅ​ចត​នៅ​កំពង់ផែ ប្រទេស​ឡាវ​។ អ្នកបើក​នាវា​ឆ្លងកាត់ ភូមិសាស្ត្រ​ខេត្តស្ទឹងត្រែង ពិតជា​ជំនាញ​ខ្លាំងណាស់​។​

​ជំនាន់​នោះ កប៉ាល់​ធំៗ ដឹកទំនិញ​ពាណិជ្ជកម្ម ក្រុងភ្នំពេញ មក​ចត​នៅក្នុង​ខេត្តក្រចេះ និង​សាង​បន្ត​ពី ខេត្តក្រចេះ មក​ស្ទឹងត្រែង ទៅ​កំពង់ផែ​ឡាវ​។ អ្នក​បើកទូក​ដឹកទំនិញ ពី​ភ្នំពេញ​មក​ចត​ត្រឹម​ក្រចេះ​។ ផ្ទេរ​ទំនិញ​ពី​ផែ​ខេត្តក្រចេះ មក​ស្ទឹងត្រែង តាម​ទូក គេ​ហៅ​ប្រភេទ​ជើង​បង្កង​ជា​បន្ត​។ ទូក​ជើង​បង្កង គឺជា​ទូក​ស្លាប​ចាក់ លើក​ចុះឡើង​បាន មាន​ចង្កូត​នៅ​ខាងក្រោយ និង​មាន​ល្បឿន​លឿន ងាយស្រួល ដល់​អ្នក​បើកទូក​រេ​ចុះឡើង តាម​ខ្សែទឹក​ហូរ ឆ្លងកាត់​ថ្មគោល​នីមួយៗ​។ ទូក​ប្រភេទ​ជើង​បង្កង​នេះ មាន​ចំណុះ​ក្រោម ១០០ តោន អាច​ផ្ទុកទំនិញ​បាន និង​មាន​ទទឹង មិន​លើសពី ១០ ម៉ែត្រ​ទេ​។ ពេល​ខែវស្សា ទឹកទន្លេ ចាប់​ផ្ដើមឡើង​ខ្លាំង អ្នកបើក​ទូក​ធំៗ មិនបាច់​ឆ្លងកាត់ គោល​នោះ​ទៀត​ទេ​។ គេ​ធ្វើដំណើរ​ក្បែរ ជ្រាំងទន្លេ​បាន​។​

​កាល​ជំនាន់​នោះ អ្នកបើក​ទូក​នៅ​ភ្នំពេញ មិន​ហ៊ាន​បើក​មក​ខេត្តស្ទឹងត្រែង​ទេ គឺ​បាន​ត្រឹម​ខេត្តក្រចេះ​។ គេ​ជួល​អ្នក​ស្ទឹងត្រែង ទៅ​បើកទូក​បន្ត​ពី​ខេត្តក្រចេះ មក​ព្រំដែន​ឡាវ ព្រោះថា អ្នក​ស្ទឹងត្រែង ស្គាល់​ភូមិសាស្ត្រ មាន​ជំនាញ​ក្នុងការ​បើកទូក​។​

​កំឡុងពេល​បើកទូក​ចេញពី​ក្រចេះ មកដល់​ស្រុក​សំបូរ ចត​សំរាក​មួយ​យប់ ត្រង់ចំណុច​កោះ​ដំបង ជិត​ព្រំប្រទល់​ស្ទឹងត្រែង និង​បន្ត​មកទៀត ក្នុង​រយៈពេល​មួយ​យប់ ឬ​ពីរ​ថ្ងៃ ដល់​ព្រំដែន​ឡាវ​។ ពេល​ត្រឡប់​ទៅវិញ ប្រើពេល​មិនយូរ​ទេ ដោយសារ​បើកទូក ចុះ​តាម​ទឹក​ហូរ មាន​ល្បឿន​លឿន​។​

​ប្រធាន​មន្ទីរ​សាធារណការ និង​ដឹកជញ្ជូន​ខេត្តស្ទឹងត្រែង រម្លឹកថា ការ​សម័យ​រដ្ឋ​កម្ពុជា ទូក​ដឹកទំនិញ ពាណិជ្ជកម្ម ពី​ភ្នំពេញ​មក​ក្រចេះ ចត​នៅ​ទី​រួម​ខេត្តស្ទឹងត្រែង​។ ទំនិញ​ដែល​ដឹក​បន្ត​ពី​ស្ទឹងត្រែង ទៅ​ព្រំដែន​ឡាវ ក្នុងភូមិ​សាស្ត្រ​ឃុំ​ព្រះ​រំកិល បច្ចុប្បន្ន ឃុំ​ព្រះ​រំកិល ជាប់​ព្រំដែន​ឡាវ បានដាក់​បញ្ចូល ទៅក្នុង​ដែនដី​រដ្ឋបាល ស្រុក​បុរី​អូរ​ស្វាយ​សែន​ជ័យ ខេត្តស្ទឹងត្រែង​។​

​លោក សរ គឹម​ណាត បាន​លើកឡើងថា សំណង់​នីមួយៗ របស់​បារាំង កាល​ជំនាន់​នោះ មាន​ភាពរឹងមាំ​ណាស់ ដូចជា សំណង់ ថ្មគោល​ដាក់​សញ្ញា​សម្គាល់ សម្រាប់​នាវាចរណ៍​ផ្លូវទឹក មាន​អាយុកាល​រយ​ឆ្នាំ មកហើយ នៅតែ​រក្សា​ជាប់​រឹងមាំ​។ បង្គោល​ខ្លះ បាក់​បន្តិចបន្តួច​ប៉ុណ្ណោះ​។ សំណង់​ថ្មគោល​នេះ បាន​ផុស​ចេញពី​ផ្ទៃ​ទឹក នៅ​ខែប្រាំង​។ លុះដល់​ខែវស្សា ទឹក​លិច​រាល់​ឆ្នាំ អ្នក​បើកទូក មិនបាច់​ឆ្លងកាត់​តាម ថ្មគោល​នោះ​ទៀត​ទេ​។​

​ទោះបីជា​សំណង់​ថ្មគោល​នេះ បាន​កន្លងទៅ រយ​ឆ្នាំ​មកហើយ គ្រាន់តែ​សឹករេចរឹល បាក់​នៅ​ធ្លាក់​ជា កំណាត់​ខ្លះ​ក៏ដោយ​។ នៅតែ​រក្សា​រឹងមាំ ជាប់​បន្សល់ទុក រហូតដល់​សព្វថ្ងៃនេះ តាម​ដង​ទន្លេមេគង្គ​។​

​លោក សរ គឹម​ណាត បាន​ឲ្យ​ដឹងថា ចំណុច​ពិសេស នៃ​សំណង់​សម័យ​ជំនាន់​បារាំង មុននឹង​សង់​អ្វីមួយ គេ​ធ្វើ​ដោយ​ផ្ចិតផ្ចង់ យ៉ាង​ល្អ លាយ​គ្រួស​ខ្សាច់​ស៊ីម៉ង់ ត្រឹមត្រូវ តាម​ក្បួនខ្នាត​។​

​សព្វថ្ងៃនេះ ចរាចរណ៍​ដឹកទំនិញ តាមផ្លូវ​ទឹក បាន​កាត់ផ្ដាច់​ទាំងស្រុង ដោយសារ​គមនាគមន៍ ផ្លូវគោក​បង្កលក្ខណៈ​ងាយស្រួល ធ្វើដំណើរ​បាន​គ្រប់ពេលវេលា ឆ្លងកាត់​ពី​រាជធានី ខេត្ត ក្នុង​យុគសម័យ​ប្រទេស មានការ​អភិវឌ្ឍ ដើរ​ទៅមុខ​ក្រោម​ការដឹកនាំ របស់​ប្រមុខ​រាជរដ្ឋាភិបាល​។​

​សូមបញ្ជាក់ថា ផ្លូវទឹក​ទន្លេមេគង្គ ចាប់ពី​ចំណុច​អន្លង់​វិល ព្រំដែន​ឡាវ ទៅ​រាជធានី​ភ្នំពេញ មាន​ប្រវែង ៣៨៨ គីឡូម៉ែត្រ​៕

ប្រភព : រស្មីកម្ពុជា

LEAVE A REPLY

Please enter your comment!
Please enter your name here