បេសកជន​អាមេរិក​ថា កិច្ចព្រមព្រៀង AUKUS មិនបាន​គំរាម​កំហែង​ស្ថិរភាព​​តំបន់​ឥណ្ឌូ​ប៉ាស៊ីហ្វិក​នោះ​ទេ

0
45

កិច្ចព្រមព្រៀង​ការពារ​ជាតិ​រវាង​ប្រទេស​អូស្ត្រាលី សហរដ្ឋ​អាមេរិក​ និង​ចក្រភព​អង់គ្លេស​ មិនបាន​គំរាម​កំហែង​ដល់​ស្ថិរភាព​តំបន់​ឥណ្ឌូ​ប៉ាស៊ីហ្វិក ហើយ​មិនមាន​គោលដៅ​ទៅលើ​ប្រទេស​ណា​មួយនោះ​ទេ។ នេះ​បើ​តាម​បេសកជន​សហរដ្ឋ​អាមេរិកបាននិយាយកាលពី​ថ្ងៃ​ពុធ នៅពេល​ដែល​មាន​ការព្រួយ​កង្វល់អំពី​ឥទ្ធិពល​របស់​ចិន​កំពុង​កើន​ឡើងនៅក្នុងតំបន់។ ប្រទេស​ឥណ្ឌូនេស៊ី មាន​ការបារម្ភ​ថា កិច្ចព្រមព្រៀង​ដែល​ហៅ​ថា AUKUS ដែល​នៅ​ក្នុង​នោះ អូស្ត្រាលីនឹង​ទទួល​បាន​បច្ចេកវិទ្យា​នុយក្លែអ៊ែ​ពី​សហរដ្ឋ​អាមេរិក នឹង​ធ្វើ​ឲ្យ​មាន«ការប្រកួត​ប្រជែង​អាវុធ»កាន់តែ​អាក្រក់​ឡើង​នៅ​ក្នុង​តំបន់។ ប្រទេស​ម៉ាឡេស៊ីបាន​សម្តែង​ការព្រួយ​បារម្ភ​ប្រហាក់​ប្រហែល​គ្នា​នេះ​ដែរ ខណៈ​ពេល​ដែល​ប្រទេស​ហ្វីលីពីន ដែល​ជា​សម្ព័ន្ធមិត្ត​របស់​សហរដ្ឋ​អាមេរិក​នោះ​ ក៏​បាន​សម្តែង​ការព្រួយ​បារម្ភ​របស់​ខ្លួន​ផងដែរ។ លោក Sung Kim ​ឯកអគ្គរដ្ឋទូត​សហរដ្ឋ​អាមេរិក​ប្រចាំ​នៅ​ប្រទេស​ឥណ្ឌូនេស៊ី បាន​ប្រាប់​វេទិការ​តាម​អនឡាញ​មួយ​ថា «ការណ៍​នេះនឹង​ពង្រឹង​ការបន្ត​កិច្ចសហប្រតិបត្តិការ​របស់​យើង ​ជាមួយ​ប្រទេស​សំខាន់ៗ ​ដូចជា ​ឥណ្ឌូនេស៊ី ​ដើម្បី​ធ្វើ​ឲ្យ​ប្រាកដ​ថា យើង​មាន​តំបន់​ឥណ្ឌូ​ប៉ាស៊ីហ្វិក​សេរី​ និង​បើក​ចំហរ​មួយ ​ដែល​គោរព​នីតិរដ្ឋ»។ លោក Kim បាន​ថ្លែង​ទៀត​ថា លោក​មិន​មាន​ការព្រួយ​បារម្ភ​អំពី​ការប្រណាំង​ប្រជែង​អាវុធ​ ឬ​ ការរីកសាយ​អាវុធ​នុយក្លែអ៊ែ​នោះ​ទេ ដោយ​លោក​បាន​ហៅ​ថា វា​ជា​កិច្ចផ្តួចផ្តើមវិជ្ជមាន​មួយ ​ដែល​នឹងផ្តល់​ការពេញចិត្ត​សម្រាប់ប្រទេស​ឥណ្ឌូនេស៊ី។ កិច្ចព្រមព្រៀង AUKUS ភាគច្រើន​ត្រូវ​បាន​គេមើលឃើញ​ថា​ ជាការឆ្លើយតប​ដោយ​សម្ព័ន្ធមិត្ត​ប្រទេស​លោក​ខាង​លិច ​ដើម្បី​បញ្ចៀស​អនុត្តរភាព​របស់​ចិន ​នៅ​ក្នុង​តំបន់​អាស៊ី​អាគ្នេយ៌​ និង​ហួសពី​តំបន់​នោះ ជា​ពិសេស​នៅ​ក្នុង​សមុទ្រ​ចិន​ខាង​ត្បូង​ ដែល​ជា​ផ្លូវពាណិជ្ជកម្ម​ដឹកជញ្ជូន​តាម​នាវាធំ​ទី៣ លើពិភពលោក ​ដែល​រដ្ឋាភិបាល​ក្រុង​ប៉េកាំង​បាន​ទាមទារ​អធិបតេយ្យភាព ​ផ្អែកលើ​ប្រវត្តិសាស្ត្រ។ ប្រទេស​ឥណ្ឌូនេស៊ី​ នៅ​ដើម​ខែ​នេះ បាន​បង្កើន​ការយាមល្បាត​នៅ​ក្នុង​ការឆ្លើយតប​ដល់​នាវា​អាមេរិក ​និង​ចិន៕ (Reuters ថ្ងៃទី២៩ ខែកញ្ញា)

 

LEAVE A REPLY

Please enter your comment!
Please enter your name here