ឃាត់ខ្លួន​ឪពុកចុង ជាប់ចោទ​រំលោភ​កូនចុង នៅ​ស្រុក​កូន​មុំ​

0
98

រតនគិរី : សមត្ថកិច្ច​នគរបាល បាន​ឃាត់ខ្លួន​ឪពុកចុង​ម្នាក់ ដែល​រង​ការ​ចោទថា បាន​រំលោភ​កូនចុង ទើបនឹង​មាន​អាយុ ១២​ឆ្នាំ មក​សាកសួរ នៅ​អធិការ​រដ្ឋា​ន​នគរបាល ស្រុក​កូន​មុំ នៅ​ព្រឹក​ថ្ងៃទី​២៩ ខែកញ្ញា ឆ្នាំ​២០២១​។​

​យោងតាម​របាយការណ៍ នគរបាល បាន​ឲ្យ​ដឹងថា នៅវេលា​ម៉ោង​៦​និង​៣០​នាទី ព្រឹក​ថ្ងៃទី​២៩ ខែកញ្ញា ឆ្នាំ​២០២១ មន្ត្រី​ប៉ុស្តិ៍​បានទទួល​បណ្ដឹង ពី​សាច់ញាតិ​ជនរងគ្រោះ​ថា នៅ​ចំណុច​ភូមិ​១ ឃុំ​ត្រពាំង​ច្រេស ស្រុក​កូន​មុំ មាន​ករណី​រំលោភ​សេពសន្ថវៈ​លើ​កុមារ​។ ជនរងគ្រោះ ឈ្មោះ គ ស ធ ជា​កូនស្រី​ចុង អាយុ ១២ ឆ្នាំ ជា​សិស្ស ។ ជនសង្ស័យ ជា​ឪពុកចុង​របស់​ជនរ​ង​គ្រោះ ឈ្មោះ ប៊ុន គ្រី (​ហៅ​គុណ​) អាយុ ៦០ ឆ្នាំ​។​

​នគរបាល បាន​អោយដឹងទៀតថា តាម​បណ្ដឹង​ជនរងគ្រោះ បាន​រៀបរាប់ថា អំឡុង​ថ្ងៃទី​២៥ ខែកញ្ញា ឆ្នាំ​២០២១ ពេល​ថ្ងៃត្រង់​នៅលើផ្ទះ​ជនសង្ស័យ បាន​ចាប់រំលោភ​សេពសន្ថវៈ ១​លើក ។ លុះដល់​ថ្ងៃទី​២៧ ខែកញ្ញា ឆ្នាំ​២០២១ វេលា​ម៉ោង​១​រសៀល ជនសង្ស័យ បាន​ចាប់រំលោភ​សេពសន្ថវៈ ១​លេ​ី​កទៀត តែ​មិនបាន​សម្រេច ដោយ​ជនរងគ្រោះ បាន​រើបម្រះ រួចខ្លួន ហើយ​បាន​រត់ទៅរក​ម្ដាយ​។ នៅ​ថ្ងៃទី​២៩ ខែកញ្ញា ឆ្នាំ​២០២១ ទើប​ម្ដា​យមក​ដាក់ ពាក្យបណ្ដឹង ដល់​សមត្ថកិច្ច ឲ្យ​ជួយ​អន្តរាគមន៍​។​

​ក្រោយ​ទទួលបាន​ពាក្យបណ្ដឹង ពី​ម្ដាយ​ជនរងគ្រោះ សមត្ថកិច្ច​បាន​ឈានទៅ​ចាប់បាន ជនសង្ស័យ​ជា​ឪពុកចុង​។ បច្ចុប្បន្ន សមត្ថកិច្ច កំពុង​កសាង​សំណុំរឿង បញ្ជូន​ជនសង្ស័យ ទៅ​តុលាការ ចាត់ការ​តាម​នីតិវិធី​៕

LEAVE A REPLY

Please enter your comment!
Please enter your name here