​ផឹកស្រា​បៀរ ABC អស់​៣​កំប៉ុង ស្រវឹង វាយ​បងស្រី និង​ក្មួយប្រុស ឲ្យ​របួសធ្ងន់

0
144

បន្ទាយ​មាន​ជ័​យៈ ជនសង្ស័យ​ម្នាក់ ដែល​ក្រុមគ្រួសារ ស្ទើរតែ​ក្រុមគ្រួសារ ផាត់​ចោល លែង​ទទួលស្គាល់​ទៅហើយ ដល់ពេល​ចូល​ផ្ទះ​លើក​នេះ បាន​ផឹកស្រា​បៀរ ABC អស់​៣​កំប៉ុង ក៏​ចាប់ផ្តើម​រករឿង​វាយ បង ក្មួយ បណ្តាល​ឲ្យ​របួសធ្ងន់ ក៏ប៉ុន្តែ​ក្រោយ​កើតហេតុ កងរាជអាវុធហត្ថ បាន​ឃាត់ខ្លួន និង​បាន​បញ្ជូនទៅ​តុលាការ នៅ​ថ្ងៃទី​១៧ ខែកញ្ញា នេះ​។​

​ស្ត្រី​ម្នាក់​ឈ្មោះ សូរ វ​ត្តី អាយុ ៤៣ ឆ្នាំ រស់នៅ​ភូមិ​សែ​សិន សង្កាត់​អូរ​អំបិល ក្រុង​សេរី​សោភ័ណ ខេត្តបន្ទាយមានជ័យ បាន​ប្ដឹង​កងរាជអាវុធហត្ថ ក្រុង​សិរីសោភ័ណ ដោយ​ចោទប្រកាន់​ឈ្មោះ គីម សំរឹទ្ធិ ភេទ​ប្រុស អាយុ ៣៣ ឆ្នាំ ត្រូវជា​ប្អូនបង្កើត ពីបទ​វាយ​ធ្វើបាប​គាត់ និង​ក្មួយប្រុស បណ្ដាល​ឲ្យ​របួសធ្ងន់ ។​

​ក្រោយពី​ទទួលបាន​ពាក្យ​ប្តឹង លោក​វរសេនីយ៍ត្រី យ៉ាន់ សុវណ្ណ មេបញ្ជាការ កងរាជអាវុធហត្ថ ក្រុង​សិរីសោភ័ណ បាន​ដឹកនាំ​កម្លាំង​អាវុធហត្ថ មួយក្រុម ចុះ​ឃាត់ខ្លួន​ជនសង្ស័យ ឈ្មោះ គីម សំ​រិ​ទ្ធិ បាន​នៅវេលា​ម៉ោង ៣ រសៀល ថ្ងៃទី ១៦ ខែកញ្ញា ឆ្នាំ​២០២១ នៅ​ចំណុច​ភូមិ​សែ​សិន សង្កាត់​អូរ​អំបិល ក្រុង​សិរីសោភ័ណ ខេត្តបន្ទាយមានជ័យ នាំមក​កាន់​ទីបញ្ជាការ កងរាជអាវុធហត្ថ​ខេត្ត ដើម្បី​សាកសួរ ក្នុងនោះ កំលាំង​អាវុធហត្ថ បានធ្វើ​តេស្ត​រហ័ស រកមើល​មេរោគ​១៩ លើ​ជនសង្ស័យ ដើម្បី​ចាត់ការ តាម​នីតិវិធី​។​

​លោក យ៉ាន់ សុវណ្ណ បានបញ្ជាក់​ឲ្យ​ដឹងថាៈ តាម​ការបំភ្លឺ​របស់​ឈ្មោះ សូរ វ​ត្តី ត្រូវជា​បងស្រី​របស់ ជនសង្ស័យ បាន​រៀបរាប់ថា ឈ្មោះ​គីម សំរឹទ្ធ នេះ ត្រូវជា​ប្អូនប្រុស​បង្កើត របស់គាត់ រស់នៅ​ជាមួយ​គាត់​។​
​តែ​តាំងពី​ឪពុកម្ដាយ​ពួកនាង ស្លាប់​បាត់ទៅ ឈ្មោះ គីម សំរិទ្ធ ពុំ​សូវ​មក​ដេក​ផ្ទះ​ទេ ដើរលេង ដេក​ផ្ទះ​មិត្ត​ភ​ក្កិ​រហូត ទើប​ដល់​វេលា​ខាងលើ មក​ដេក​ផ្ទះ​ម្ដង គ្រាន់​ចូលមក​ដល់ផ្ទះ បាន​ទិញ​ស្រា​បៀរ យកមក​ផឹក ឡើង​ស្រវឹង​ធ្ងន់​ក្បាល ក៏បង្ក​ជម្លោះ​ជាមួយ​បង និង​ក្មួយប្រុស​គាត់​។​

​ជនសង្ស័យ​ឈ្មោះ គីម សំរិទ្ធ បាន​ឆ្លើយ​សារភាពថាៈ រូបគេ​ពិតជា​បាន​ផឹកស្រា​ស្រវឹង វាយ​បងស្រី ឈ្មោះ សូរ វ​ត្តី និង​ក្មួយប្រុស ពិតមែន ព្រោះ​ខឹង និង​ដោយសារ​ក្មួយ នៅ​ក្មេង​សោះ ព្រហើន ហ៊ាន​ហារ​មាត់​ប្រដៅ​អប់រំ​ខ្លួន​។​

​ក្រោយ​ការស៊ើបអង្កេត ឃើញថា តាម​ពាក្យបណ្ដឹង​របស់​ជនរ​ង​គ្រោះ និង​ស្ដាប់​ចម្លើយ​របស់​ជនសង្ស័យ គឺមាន​ភាពស៊ីសង្វាក់​គ្នា យ៉ាង​ជាក់លាក់ នៃ​ករណី​ខាងលើ ជនសង្ស័យ ត្រូវបាន​បញ្ជូនទៅ​តុលាការ នៅ​ថ្ងៃទី​១៧ ខែកញ្ញា​នេះ ៕

ប្រភព :-រស្មីកម្ពុជា

LEAVE A REPLY

Please enter your comment!
Please enter your name here