ទ្រី​នី​ដា​ត​៖ ចាក់​វ៉ាក់សាំង​ងាប់​ប្រដាប់ភេទ​និង​ហើម​ពងស្វាស​ជា​ការមិនពិត​

0
129

រដ្ឋ​មន្ត្រី​សុខាភិបាល​ប្រទេស​ទ្រី​នី​ដា​ត និង​តូ​បា​ហ្គោ កាលពី​ថ្ងៃ​ពុធ​ទី​១៥​កញ្ញា​បាន​រិះគន់​ថា​ជា​«​ការអះអាង​មិន​ពិត​»​ពី​តារា​ចំរៀង​រ៉ែ​ប​អាម៉េរិក​នាង និក​គី មីន​ណា​ច​(Nicki Minaj)​ដែល​បាន​អះអាងថា មនុស្ស​ម្នាក់​នៅ​កោះ​ក្នុង​តំបន់​កា​រ៉ា​អ៊ី​ប​នេះ​បាន​ងាប់​ប្រដាប់ភេទ​និង​ហើម​ពងស្វាស​ក្រោយ​ចាក់​វ៉ាក់សាំង​កូវី​ដ​១៩​។​

​តារាចំរៀង​អាម៉េរិក ដែល​កើត​នៅ​ទ្រី​នី​ដា​ត​រូបនេះ​បាន​បង្ក​កំហឹង​អន្តរជាតិ​នៅ​ពេល​នាង​បាន​ចោទប្រកាន់​តាម​បណ្តាញ​សង្គម​ទ្វី​ត​ធឺ​ថា បងប្អូន​ជីដូនមួយរ​បស់​នាង​ម្នាក់​នៅ​ទ្រី​នី​ដា​ត​ បាន​បដិសេធ​មិន​ចាក់​វ៉ាក់សាំង ដោយសារ​មិត្ត​របស់​គាត់​បាន​ងាប់​ប្រដាប់​ភេទ​និង​ហើម​ពង​ក្រោយ​ចាក់​វ៉ាក់សាំង​។​

​នាង​មីណា​ច​ដែលមាន​អ្នកគាំទ្រ​តាម​ទ្វី​ត​ធឺ​២២,៦​លាន​នាក់ បាន​និយាយ​កាលពី​ថ្ងៃ​ចន្ទ​ថា «​ពងស្វាស​របស់​ជន​នោះ​បាន​ហើមប៉ោង​។​មិត្ត​របស់​គាត់​នៅសល់​ពេល​ប៉ុន្មាន​សប្តាហ៍​ទៀត​​នឹង​រៀបការ ឥឡូវ​កូនក្រមុំ​សុំ​ឈប់​រៀបការ​»»​។​

​សម្តី​របស់​នាង​បាន​បង្ក​ប្រតិកម្ម​ជា​អន្តរជាតិ ដោយ​មន្ត្រី​សុខាភិបាល​អង់គ្លេស​និង​អាម៉េរិក​ថ្កោលទោស​ការអះអាង​នេះ​។​

​នៅពេល​ត្រូវ​បាន​សួរ​អំពី​ការអះអាង​របស់​នាង​មីណា​ច លោក​បណ្ឌិត អ៊ែន​ថូ​នី ហ្វោ​ស៊ី អ្នកជំនាញការ​ជំងឺឆ្លង​ជាន់ខ្ពស់​អាម៉េរិក បាន​និយាយថា​«​មាន​ព័ត៌មាន​មិន​ពិត​ច្រើន​នៅលើ​បណ្តាញ​​សង្គម​។​ខ្ញុំ​មិន​បន្ទោស​នរណា​ទេ តែ​នាង​គួរ​គិត​២​ដង​អំពី​ការឃោសនា​ព័ត៌មាន​ដែល​គ្មាន​មូលដ្ឋាន​និង​គ្មាន​ភស្តុតាង​វិទ្យាសាស្ត្រ​សោះ​»​។​

​អ្នកជំនាញការ​បាន​និយាយថា មិន​មាន​ភស្តុតាង​បង្ហាញថា វ៉ាក់សាំង​កូវី​ដ​១៩​បង្ក​អោយ​ហើម​ពង​ឬ​អសមត្ថភាព​ផ្លូវភេទ​ទេ​៕

LEAVE A REPLY

Please enter your comment!
Please enter your name here