ពី​ប៉ូលិស ក្លាយជា​ជនល្មើស ហើយពី​ជនល្មើស ទៅជា​ជនរងគ្រោះ​!

0
164

ភ្នំពេញ​: ករណី​ប៉ូលិស​អនុវត្ត​ការត្រួតពិនិត្យ​បទល្មើស​ចរាចរណ៍ រហូតដល់​វាយ​បែកក្បាល​នារី​ម្នាក់ កាលពី​យប់​ថ្ងៃទី​៨ ខែកញ្ញា ឆ្នាំ​២០២១ គឺ​នារី​រងរបួស​ដែលជា​អ្នករួមដំណើរ​ជាមួយ​ជនល្មើស​ច្បាប់​ចរាចរណ៍ បានទាមទារ​សំណង​មួយ​ម៉ឺន​ដុល្លារ​។ ចរចា​មិន​ត្រូវរ៉ូវ​គ្នា ក៏​បញ្ជូន​ប៉ូលិស​ខណ្ឌ ៧​មករា ដែលជា​ជនដៃដល់ ទៅ​តុលាការ​។​នារី​រូបនេះ​ក៏​មិនបាន​ពាក់មួក​សុវត្ថិភាព​ដែរ​ក្នុងពេល​ធ្វើដំណើរ​។​

​ហេតុការណ៍​នោះបាន​កើតឡើង​កាលពី​ម៉ោង​ជិត​៨​យប់​ថ្ងៃទី​៨​ខែកញ្ញា​នៅ​ប៉ុស្តិ៍​ត្រួតពិនិត្យ​បទល្មើស​និង​ច្បាប់​ចរាចរណ៍​របស់​សមត្ថ​កិច្ច នៃ​អធិការដ្ឋាន​នគរបាល​ខណ្ឌ ៧​មករា នៅ​ម្ដុំ​អាងទឹក​ពហុ​កីឡដ្ឋាន​ជាតិ​អូឡាំពិក​តាម​បណ្ដោយ ផ្លូវ ២១៥ ក្នុង​សង្កាត់​វាលវង់ ខណ្ឌ​៧​មករា រាជធានី​ភ្នំពេញ​។​

​មន្ត្រីប៉ូលិស​ដែល​វាយ​នារី​ម្នាក់ ឲ្យ​បែកក្បាល ដោយសារតែ​ជិះ​ម៉ូតូ​មិន​ពាក់មួក ហើយ​រត់គេច​ពី​ប៉ូលិស​នោះ ឈ្មោះ ម៉ាត់ ពិសី អាយុ ៣០​ឆ្នាំ មាន​ឋានន្តរស័ក្តិ អនុសេនីយ៍ទោ បម្រើ​ការងារ​នៅ​ផ្នែក​អន្តរាគមន៍​នៃ​អធិការដ្ឋាន នគរបាល​ខណ្ឌ ៧​មករា រាជធានី​ភ្នំពេញ​។ ប៉ូលិស​រូបនេះ ត្រូវបាន​នគរបាល​ផ្នែក​ព្រហ្មទណ្ឌ​ខណ្ឌ ៧​មករា កសាង​សំណុំរឿង បញ្ជូនទៅ​តុលាការ ដោយ​ចោទប្រកាន់​ពីបទ​ហិង្សា​តាម​មាត្រា ២១៧ នៃ​ក្រមព្រហ្មទណ្ឌ​។​

​សំណុំរឿង​ដដែល​នោះ ប៉ូលិស​ក៏បាន​ចោទប្រកាន់​លើ​អ្នកបើកបរ​ម៉ូតូ មិន​គោរព​ច្បាប់​ចរាចរណ៍ ឈ្មោះ ង​ន សិលា ភេទ​ប្រុស អាយុ ១៨​ឆ្នាំ ពីបទ​មិន​គោរព​បង្គាប់បញ្ជា តាម​មាត្រា ៥៤១ នៃ​ក្រមព្រហ្មទណ្ឌ​។ សំណុំ​រឿងនេះ បាន​ស្ថិតនៅក្នុង​ដៃ​លោក ឆាយ ហុង ព្រះរាជអាជ្ញារង នៃ​អយ្យការ​អម​សាលាដំបូង​រាជធានី​ភ្នំពេញ បើក​ការ​ស៊ើបសួរ កាលពី​ថ្ងៃទី​១០ ខែកញ្ញា ឆ្នាំ​២០២១​។​

​ឈ្មោះ ង​ន សិលា ជា​អ្នកបើកបរ​ម៉ូតូ ដឹក​នារី​ម្នាក់ ដែល​លោក​ប៉ូលិស ម៉ាត់ ពិសី វាយ​នឹង​អាយ​ឌី បែកក្បាល កាលពី​យប់​ថ្ងៃទី​៨ ខែកញ្ញា​ដោយសារតែ​អ្នក​ទាំងពីរ មិន​ពាក់មួក​សុវត្ថិភាព ហើយ​ពេល​ក្រុមប៉ូលិស ស្ទាក់​ឃាត់ បែរជា​បើក​ម៉ូតូ បក​ក្រោយ​យ៉ាង​លឿន ហើយ​លោក​ប៉ូលិស ម៉ាត់ ពិសី ចេញ​ស្ទាក់ និង​វាយ​លើ​អ្នកជិះ​ម៉ូតូ​តែម្តង​។​

​សេចក្តីរាយការណ៍ បាន​ឲ្យ​ដឹងថា សមត្ថកិច្ច​កសាង​សំណុំរឿង បញ្ជូន​មន្ត្រីនគរបាល ម៉ាត់ ពិសី ដែល​ប្រើ​អាយ​ឌី វាយ​បែកក្បាល​នារី​ជិះ​ម៉ូតូ​នោះ ដោយសារតែ​ដោះស្រាយ​សំណង​រដ្ឋប្បវេណី​មិន​ត្រូវរ៉ូវ​គ្នា​។ ខាង​ស្ត្រី​បែកក្បាល ទាមទារ​ប្រាក់​សំណង ក្នុងការ​ថ្លៃ​ព្យាបាល រហូតដល់​ទៅមួយ​ម៉ឺន​ដុល្លារ​អាម៉េរិក​។ ចំណែក​មន្ត្រីនគរបាល ម៉ាត់ ពិសី មិនមាន​លទ្ធភាព​សង​ទេ​។

​វិ​ដេ​អូ​នៃ​ហេតុការណ៍​ប៉ូលិស​វាយ​ជនល្មើស​ជិះ​ម៉ូតូ​មិន​ពាក់មួក​សុវត្ថិភាព ហើយ​ជិះ​រត់ បក​ក្រោយ បញ្ច្រាសទិស ដែល​បង្ហោះ​ចែកចាយ​តាម​បណ្តាញ​សង្គម បង្ហាញថា មុនពេល​កើតហេតុ បុរស និង​ស្ត្រី​ពីរ​នាក់​បងប្អូន បាន​ជិះ​ម៉ូតូ ដោយ​មិន​ពាក់មួក​សុវត្ថិភាព ជិះ​នៅតាម​បណ្ដោយ​ផ្លូវ ២១៥ មកដល់​ម្ដុំ​អាងទឹក​ពហុ​កីឡដ្ឋាន​ជាតិ​អូឡាំពិក ចំណុច​គោលដៅ​ត្រួតពិនិត្យ ក៏​ព្យាយាម​ជិះ​បក​ក្រោយ​វិញ ហើយក៏​ត្រូវ​មន្ត្រីនគរបាល យក​ទិ​ទ្យុ​ទាកទង ID វាយ បណ្តាល​ឲ្យ​នារី​ជិះ​ខាងក្រោយ បែកក្បាល (​ដេរ ៣​ថ្នេរ​) និង​ធ្លាក់​ពីលើ​ម៉ូតូ​។

​កើតហេតុ​នេះ នាំ​ឲ្យ​មានមតិ ថ្កោលទោស​យ៉ាងខ្លាំង​លើ​មន្ត្រីនគរបាល ដែល​ប្រើ​ហិង្សា​ហើយក៏​មានមតិ​មួយចំនួន ទៀត បន្ទោស​ទៅ​ភាគី​ខាង​ម៉ូតូ ដែល​ល្មើសច្បាប់​ចរាចរណ៍ មិន​ពាក់មួក​សុវត្ថិភាព ហើយ​ព្យាយាម​បើក ម៉ូតូ​រត់គេច រហូតដល់​ក្លាយជា​រឿងរ៉ាវ​ដូច្នេះ​។​

​សំណុំ​រឿងនេះ ប៉ូលិស ដែលជា​អ្នកអនុវត្ត​ច្បាប់ ក្លាយជា​ជនល្មើស ខណៈដែល​ជនល្មើស​នឹង​ច្បាប់​ចរាចរណ៍ ក្លាយជា​ជនរងគ្រោះ​ទៅវិញ​។

​ករណី​ចុង​ក្រោយនេះ គួរតែ​គិតគូរ​ឡើងវិញ លើ​ឥរិយាបថ និង​របៀប​អនុវត្ត​ច្បាប់​របស់​អាជ្ញាធរ​សម​ត្ថ​កិច្ច តើ​គួរ​ធ្វើ​បែបណា ដើម្បី​កុំ​ឲ្យ​ក្លាយទៅជា​ជនល្មើស​? តែបើ​ប៉ូលិស មាន​របៀប​ស្ទាក់ចាប់​ជនល្មើស ប្រសើរ​ជាង​នេះ គឺ​មិនមាន​រឿងហេតុ​កើតឡើង​ទេ​។ ពោលគឺ​ប៉ូលិស​សមត្ថកិច្ច និង​អាជ្ញាធរ ត្រូវអនុវត្ត​ច្បាប់ ដោយ​ទន់ភ្លន់ តែ​ម៉ឺងម៉ាត់ តាម​វិជ្ជាជីវៈ និង​ឆ្លងកាត់​ការហ្វឹកហ្វឺន នៅ​សាលារៀន​ត្រឹមត្រូវ​។ ចំណែក​សម្ភារៈ មធ្យោបាយ ឧបករណ៍​ក្នុងការ អនុវត្ត​ច្បាប់ ក៏​ថ្នាក់ដឹកនាំ ត្រូវ​គិតគូរ និង​ផ្តល់​ឲ្យ​គ្រប់គ្រាន់ ដើម្បី​កុំ​ឲ្យ​ប្រើប្រាស់ ID វាយ​គេ​ទៀត​។​

​ចំពោះ​ជនល្មើស​ករណីនេះ​ក៏​គួរតែ​ធ្វើ​ច្បាប់​ពិ​សេសមួយ​ដើម្បី​ផ្តល់​អាទិភាព​ដល់​អាជ្ញាធរ​សមត្ថកិច្ច​មាន​សិទ្ធិ​ក្នុងការ​អនុវត្ត​ច្បាប់​។ តែ​ក៏​មិនមែន​មានន័យថា បាន​ច្បាប់​ពិសេស​ដូច្នេះហើយ អាជ្ញាធរ​សមត្ថកិច្ច អនុវត្ត​ដោយ​ទំនើងចិត្ត ខុស​វិជ្ជាជីវៈ ខុស​ក្រមសីលធម៌ និង​ធ្វើជា​លេស​ប្រព្រឹត្ត​អំពើ​ផ្តេសផ្តាស់​នោះទេ​។​

​ដោយឡែក ជនល្មើស ដែល​ពេលនេះ ក្លាយជា​ជនរងគ្រោះ ក៏ត្រូវ​តែមាន​ស្មារតី​ទទួលខុសត្រូវ ធ្វើជា​ពលរដ្ឋ​ល្អ ដែលជា​អ្នកគោរពច្បាប់​។ សូម្បីតែ​ពាក់មួក​សុវត្ថិភាព ពេលធ្វើ​ដំណើរ និង​ពេល​បើកបរ​ម៉ូតូ​ដើម្បី​តែ​ការពារ​ក្បាល ខ្លួនឯង ធ្វើ​មិនបាន​ផង តើ​ទៅ​គោរព​អ្វី​បាន​? ហើយ​បើ​ខុស​ហើយ ពេល​ប៉ូលិស ហៅ​ឃាត់ និង​ស្ទាក់ចាប់ ហេតុអ្វី មិន​ឈប់​តាម​សម្រួល បង់​ការផាកពិន័យ​តាមច្បាប់ ត្រឹមតែ ៦​ម៉ឺន​រៀល ក្នុង​ម្នា​ក់សោះ ម៉េច​ក៏​គេច​?​ឬក៏​មាន​បទល្មើស អ្វី​ផ្សេងទៀត ទើប​នាំ​រឿងរ៉ាវ​ដូច្នេះ​?

​ករណី​ប៉ូលិស អនុវត្ត​ច្បាប់ រហូតដល់​បង្ក​របួស​ដល់​ជនល្មើស បែកក្បាល ក្នុងពេល​រត់គេច​នេះ​ក៏​គួរតែ​ផ្តល់​យុត្តិធម៌ ដល់​ប៉ូលិស​នោះ​ផង​។ បើ​ជ្រុលដៃ ឃាត់​ស្ទាក់​ដូច្នេះ ហើយ​ក្លាយជា​ជនល្មើស តើ​នឹងមាន​អាជ្ញាធរ​សមត្ថកិច្ច​ណា ហ៊ាន​ចេញ​ធ្វើ​ទៀត​? បើ​ឲ្យ​តែ​បង្ក​គ្រោះថ្នាក់​ដល់​ជនល្មើស ត្រូវ​ជនល្មើស​ប្តឹង​ចាប់​ដាក់គុក​ទារ​សំណង​ថែមទៀត នោះ​៕​

ប្រភព : រស្មីកម្ពុជា

LEAVE A REPLY

Please enter your comment!
Please enter your name here